Mũta 5

Kwĩvĩta Mawĩvĩto Maumanĩte na Kĩkĩo kya Ngai

1Ĩsũvĩae maũndũnĩ ala ũkwĩka yĩla walika Ĩkalũnĩ ũthaithe Ngai. Kwĩw'a nĩ kũseo kwĩ kumya nthembo ta wĩ mũndũ mũtumanu, ũla ũtavathũkanasya ũseo na ũthũku. 2Ĩsilasye mbee wa kũneena, na ndũkasembee kwĩvĩta mbee wa Ngai. Nũndũ Ngai e ĩtunĩ, naku wĩkalaa kũũ ĩũlũ wa nthĩ. Kwoou ndeto syaku nĩsyĩthĩawe mbũthũ. 3Ndoto nietawe nĩ mũndũ kwĩthĩwa na mesilya maingĩ, na kũneena ndeto mbingĩ nĩkũtumaa mũndũ aneena ndeto sya ũtumanu. 4#Sav 66.13-14 Kwoou yĩla weevĩta mbee wa Ngai, ndũkaselewe nĩ kwĩanĩsya wĩvĩto ũsu. Nũndũ Ngai ndendeeaw'a nĩ mũndũ mũtumanu, kwoou ĩanĩasya mawĩvĩto maku. 5Nĩ kavaa kũlea kwĩvĩta, kũte kwĩvĩta na ũilea kwĩanĩsya mawĩvĩto maku. 6Ndũketĩkĩle ndeto syaku itume wĩka naĩ, na ũu ũituma wĩsa kũthi kũtavya mũthũkũmi wa Ngai kana ndũneeyumĩtye. Nĩ kyaũ kĩũtuma ũmwĩw'ĩthya Ngai woo nũndũ wa ndeto syaku, na kũtuma ananga wĩa waku ũla ũtethetye? 7O na waota ndoto mbingĩ, kana kũtethya wĩa wa mana, kana kũneena ndeto mbingĩ, waĩlĩte kwĩthĩwa na kĩkĩo kya Ngai.

Thayũ nĩ wa Mana

8Ndũkaseng'e kwona ala me ũtongoinĩ wa kĩ-ũsumbĩ maithĩny'a ala ngya, na kũlea kũmanenga ũsili wa katĩ na kĩla kĩmaĩlĩte. Nũndũ atongoi ala maũngamĩe kĩsio kĩmwe kya nthĩ nĩ maũngamĩwe nĩ angĩ, na o ta ũu asu onthe makaũngamĩwa nĩ angĩ me ndaĩa nene.

9Andũ onthe matethaw'a nĩ ngetha ĩla yumaa mũũndanĩ; mũsumbĩ o ta ũu atethaw'a nĩ mĩũnda ĩla yumaa ngetha ĩsu.

10Ũla wĩ na wendi wa mbesa, ndesaa kwĩanĩwa nĩsyo; ũla wendaa kwĩthĩwa na ũthwii, ndakakwata kyonthe kĩla wendaa. Ũu o naw'o nĩ mana. 11O ũndũ mũndũ wĩ na syĩndũ singĩvĩte, no w'o wĩthĩawa na andũ aingĩ ala ũtethasya. Vai ĩtuvi ũkwataa ate o kũmanya kana we nĩ mũthwii. 12Mũndũ ũla ũtethasya wĩa nũkwataa too akeanĩwa, o na ethĩwa e na lĩu mwingĩ kana mũnini, ĩndĩ syĩndũ mbingĩ sya mũndũ mũthwii nitumaa atakoma aisũanĩa mũno ĩũlũ wasyo.

13Ve ũndũ wĩ kyeva nonete ĩũlũ wa nthĩ: Athwii nĩmeyiĩaa syĩndũ mbingĩ mũno ikesa kũmeka naĩ, 14kana syonthe ikaĩa maũndũnĩ ma mana, na syana syoo iyaĩwa nĩ kĩndũ itiĩwa nĩ asyai moo kĩkaitethya. 15#Yovu 1.21; Sav 49.17; 1Tim 6.7 O ũndũ mũndũ wookie kũũ ĩũlũ wa nthĩ ate kĩndũ, o ta ũu akasyoka ate kĩndũ o na kĩmwe kya ila wathũkũmie akwata e kũũ ĩũlũ wa nthĩ. 16Ũndũ ũsu wĩ kyeva kĩnene! O ũndũ mũndũ wailyĩ ayũka kũũ, akasyoka ailyĩ oou. Waĩ vata mwaũ kwake kũthũkũma mana ta mũndũ ũsembanĩtye na kĩseve, 17na kwĩkala thayũ wake w'onthe e kĩvindunĩ, e na kĩmako, e na mĩnoo mingĩ, e mũwau na kwĩw'ĩa andũ woo.

18Ve kĩndũ kĩseo na kyaĩlu nonete, nakyo nĩ kũya na kũnyw'a na kũtanĩa wĩa ũla mũndũ ũtethasya e ĩũlũ wa nthĩ, ĩvindanĩ ĩkuvĩ yĩla Ngai ũmũnengete kwĩthĩwa thayũ, nũndũ maũndũ asu nĩmo ĩtuvi yake. 19Ethĩwa Ngai nĩwanenga mũndũ ũthwii na syĩndũ na akĩmũtonyethya kwitanĩa, mũndũ ũsu aĩlĩte kũtũngaa mũvea, na kũtanĩaa syĩndũ isu ũthũkũmĩte akakwata, nũndũ ũsu nĩ mũthĩnzĩo kuma kwa Ngai. 20Ngai nũnengete mũndũ ũsu kwĩthĩwa na ũtanu; ndemakĩaa mũno ĩũlũ wa ũndũ thayũ ũkuvĩvĩte.

Currently Selected:

Mũta 5: KAMBA

Highlight

Copy

Compare