Mũta 11

Maũndũ Ala Mũndũ Mũĩ Wĩkaa

1Ĩkaa maũndũ maseo ũtekweteela kũkwata ũtandĩthyo,

nĩkwĩthĩwa ĩtina ũkakwata moseo maumanĩte na maũndũ asu.

2Tũmĩaa syĩndũ syaku na andũ aingĩ,

nũndũ ndwĩsĩ yĩla wĩĩthĩwa na thĩna ĩũlũ wa nthĩ.

3Ethĩwa matu ma mbua nĩmaitava, mbua nĩyuaa.

Mũtĩ wavalũka ũelete ngalĩko o na yĩva, vala wavalũka nĩvo wĩkalaa.

4Mũndũ ũla weteelaa ĩvinda ya nzeve ĩla ĩetae mbua yĩvike, ndesaa kũvanda,

na ũla ũsiasya kana kwĩ matu ndesaa kũketha.

5O tondũ vate mũndũ wĩsĩ nzĩa ya kĩseve, kana ũndũ thayũ wa mũndũ wambĩĩaa ĩvunĩ ya nyinyia, now'o vate mũndũ wĩsĩ ũndũ Ngai Mũmbi wa syĩndũ syonthe wĩkaa maũndũ make. 6Vandaa mbeũ syaku mavinda yonthe, nũndũ ndwĩsĩ nĩ mbeũ sya ĩvinda yĩva ila ikethĩwa na ũsyao mũseo; syonthe nitonya kwĩthĩwa na ũsyao mũseo.

7Kyeni nĩ kĩseo na andũ nĩmendeeaw'a nĩkyo. 8Mũndũ nĩatũnge mũvea ekala myaka mingĩ e thayũ, ĩndĩ nĩalilikane kana mĩthenya ĩla ũtakethĩwa ĩũlũ wa nthĩ nĩyo mingĩ, na vai ũndũ ũngĩ o na wĩva waĩlĩte kweteela.

Ũtao kwa Andũ ma Mũika

9We mũndũ wa mũika, tanĩa ĩvinda ya ũika waku, na ũyĩthĩwa na ũtanu ĩvindanĩ yĩĩ wĩ wa mũika; ĩkaa kĩla ngoo yaku ĩkwenda, na kĩla kĩkwendeesya methonĩ maku. Ĩndĩ manya kana Ngai akakũsilĩla kwondũ wa maũndũ onthe ala ũkwĩka.

10Ndũketĩkĩle kĩndũ o na kĩva kĩkwĩkĩe kĩmako kana woo thayũnĩ waku; ĩvetangĩe mathĩna ala matonya kũkwata mwĩĩ waku, nũndũ ĩvinda ya kwĩthĩwa wĩ mũndũ wa mũika na maũndũ maseo mayo nĩ mana.

Currently Selected:

Mũta 11: KAMBA

Highlight

Copy

Compare