1Mav 6

Nzyawa Sya Livai

1Ana ma Livai maĩ Ngelisoni, Koathi na Melali. 2Ana ma Koathi maĩ Amilamu, Isaali, Eviloni na Usieli.

3Amilamu aĩ na ana elĩ: Alũni na Mwose, na aĩ na mwĩĩtu weetawa Miliamu.

Ana ma Alũni maĩ Natavu, Aviu, Eleasali na Ĩthamali.

4Eleasali aĩ ĩthe wa Vineasi, nake Vineasi aĩ ĩthe wa Avisua. 5Avisua aĩ ĩthe wa Mbuki, nake Mbuki aĩ ĩthe wa Ũsisi. 6Ũsisi aĩ ĩthe wa Nzelaia, nake Nzelaia aĩ ĩthe wa Melaiothi. 7Melaiothi aĩ ĩthe wa Amalia, nake Amalia aĩ ĩthe wa Aituvu. 8Aituvu aĩ ĩthe wa Nzatoki, nake Nzatoki aĩ ĩthe wa Aimaasi. 9Aimaasi aĩ ĩthe wa Asalia, nake Asalia aĩ ĩthe wa Yoanani. 10Yoanani aĩ ĩthe wa Asalia (Asalia nĩwe wathũkũmaa wĩa wa kĩ-ũthembi Ĩkalũnĩ yĩla Solomoni waakie Yelũsalemu.) 11Asalia aĩ ĩthe wa Amalia, nake Amalia aĩ ĩthe wa Aituvu. 12Aituvu aĩ ĩthe wa Nzatoki, nake Nzatoki aĩ ĩthe wa Salumu. 13Salumu aĩ ĩthe wa Ilikia, nake Ilikia aĩ ĩthe wa Asalia. 14Asalia aĩ ĩthe wa Selaia, nake Selaia aĩ ĩthe wa Yeosataki. 15Yeosataki nĩwakwatiwe atwawa nthĩ ya ũeninĩ ĩvindanĩ yĩla Mwĩai Ngai watumie Nevukatinesa akwata andũ ma Yuta na Yelũsalemu amatwaa me ove.

Nzyawa Ingĩ sya Livai

16 # Kuma 6.15-19 Ana ma Livai maĩ Ngelisoni, Koathi na Melali. 17Aa nĩmo masyĩtwa ma ana ma Ngelisoni: Livini na Simei. 18Ana ma Koathi maĩ Amilamu, Isali, Eviloni na Usieli. 19Ana ma Melali maĩ Mali na Musi.

Ĩno nĩyo mĩsyĩ ya Alivai ĩandĩkĩtwe kwĩanana na aaĩthe moo: 20Nzyawa sya Ngelisoni syailyĩ ta ũũ: Livini aĩ mwana wake, Yeathi aĩ mwana wa Livini, nake Nzima aĩ mwana wa Yeathi. 21Yoa aĩ mwana wa Nzima nake Indo aĩ mwana wa Yoa. Nzela aĩ mwana wa Indo nake Yeathelai aĩ mwana wa Nzela.

22Nzyawa Sya Koathi syailyĩ ta ũũ: Aminatavu aĩ mwana wake, nake Kola aĩ mwana wa Aminatavu. Asili aĩ mwana wa Kola, 23nake Elikana aĩ mwana wa Asili. Eviasavu aĩ mwana wa Elikana, nake Asili aĩ mwana wa Eviasavu. 24Taathi aĩ mwana wa Asili, Ulieli aĩ mwana wa Taathi, Usia aĩ mwana wa Ulieli, nake Sauli aĩ mwana wa Usia.

25Nzyawa sya Elikana syailyĩ ta ũũ: Ana make maĩ Amasai na Aimothi. 26Mwana wa Aimothi eetawa Elikana, nake Nzovai aĩ mwana wa Elikana. Naathi aĩ mwana wa Nzovai, 27Eliavu aĩ mwana wa Naathi, nake Yeloamu aĩ mwana wa Eliavu. Elikana aĩ mwana wa Yeloamu, nake Samũeli aĩ mwana wa Elikana.

28Ana ma Samũeli maĩ Yoeli, mwana ũla mũkũũ, na Aviya mwana ũla mũnini.

29Nzyawa sya Melali syailyĩ ta ũũ: Maali aĩ mwana wake, nake Livini aĩ mwana wa Maali. Simei aĩ mwana wa Livini, nake Usa aĩ mwana wa Simei. 30Simea aĩ mwana wa Usa, Akia aĩ mwana wa Simea, nake Asaia aĩ mwana wa Akia.

Ndeviti Ainyuva Aini ma Ĩkalũnĩ

31Aa nĩ andũ ala Mũsumbĩ Ndeviti wanyuvie maũngamĩe maũndũ ma wini, vandũnĩ vala vathaithĩawa Yelũsalemu, Ĩsandũkũ ya Ũtianĩo yamina kũetwe vo. 32Mathũkũmaa kwa nzĩa ya kwina mbathi, me mbee wa Ĩeema ĩtheu ya kũkomanĩa na Mwĩai Ngai, nginya ĩvindanĩ yĩla Solomoni waakie Ĩkalũ Yelũsalemu. Matethasya wĩa woo maatĩĩe motw'ĩo ala manengetwe.

33Masyĩtwa ma andũ asu vamwe na ana moo nĩmo aa: Kuma mũsyĩnĩ wa Koathi; Emani ũla waĩ mwini mwana wa Yoeli, Yoeli mwana wa Samũeli, nake Samũeli mwana wa Elikana. 34Elikana mwana wa Yeloamu, Yeloamu mwana wa Elieli, nake Elieli mwana wa Toa. 35Toa mwana wa Nzuve, Nzuve mwana wa Elikana, Elikana mwana wa Maathi, nake Maathi mwana wa Amasai. 36Amasai mwana wa Elikana, Elikana mwana wa Yoeli, Yoeli mwana wa Asalia, nake Asalia mwana wa Nzevania. 37Nzevania mwana wa Taathi, Taathi mwana wa Asili, Asili mwana wa Eviasavu, nake Eviasavu mwana wa Kola. 38Kola mwana wa Isali, Isali mwana wa Koathi, Koathi mwana wa Livai nake Livai mwana wa Yakovo.

39Mũtetheesya wa Emani wa vakuvĩ eetawa Asavu. Asavu aĩ mwana wa Mbelekia, nake Mbelekia aĩ mwana wa Simea.

40Simea aĩ mwana wa Mikaeli, Mikaeli aĩ mwana wa Mbaaseia, nake Mbaaseia aĩ mwana wa Malikiya. 41Malikiya aĩ mwana wa Ethini, Ethini aĩ mwana wa Nzela, nake Nzela aĩ mwana wa Ataia. 42Ataia aĩ mwana wa Ethani, Ethani aĩ mwana wa Nzima, nake Nzima aĩ mwana wa Simei. 43Simei aĩ mwana wa Yaathi, Yaathi aĩ mwana wa Ngelisoni, nake Ngelisoni aĩ mwana wa Livai. 44Mũtetheesya wa Emani wa katatũ eetawa Ethani kuma mũsyĩnĩ wa Melali. Ethani aĩ mwana wa Kisi, Kisi aĩ mwana wa Aviti, nake Aviti aĩ mwana wa Maluku. 45Maluku aĩ mwana wa Asavia, Asavia aĩ mwana wa Amasia, nake Amasia aĩ mwana wa Ilikia. 46Ilikia aĩ mwana wa Amisi, Amisi aĩ mwana wa Mbani, nake Mbani aĩ mwana wa Semeli. 47Semeli aĩ mwana wa Mali, Mali aĩ mwana wa Musi, Musi aĩ mwana wa Melali, nake Melali aĩ mwana wa Livai.

48Alivai ala angĩ nĩmanengiwe mawĩa ala angĩ onthe matethaw'a Ĩeemanĩ Ĩtheu, yĩla nĩyo nyũmba ya Ngai.

Nzyawa sya Alũni

49Alũni na nzyawa syake nĩmo maumasya nthembo kĩthembeonĩ kya nthembo sya kũvĩvw'a, na kĩthembeonĩ kĩla kyavĩvĩaw'a ũvani. Nĩmo matethasya mawĩa onthe ala meethĩawa vala Vandũnĩ Vatheu Mũno, na nĩmo maumasya nthembo ya kũvetea andũ ma Ĩsilaeli naĩ. Meekaa ũu kwĩanana na ũndũ Mwose mũthũkũmi wa Ngai weeaĩte. 50Nzyawa sya Alũni syailyĩ ta ũũ: Alũni aĩ ĩthe wa Eleasali, Eleasali aĩ ĩthe wa Vineasi, nake Vineasi aĩ ĩthe wa Avisua. 51Avisua aĩ ĩthe wa Mbuki, Mbuki aĩ ĩthe wa Ũsisi, nake Ũsisi aĩ ĩthe wa Nzelaia, 52Nzelaia aĩ ĩthe wa Melaiothi, Melaiothi aĩ ĩthe wa Amalia, nake Amalia aĩ ĩthe wa Aituvu. 53Aituvu aĩ ĩthe wa Nzatoki, nake Nzatoki aĩ ĩthe wa Aimaasi.

Ndũa sya Alivai

54Ii nĩsyo isio sya nthĩ ila syanengiwe nzyawa sya Alũni. Mĩsyĩ ya Koathi, ala nĩmo moosie kula ya mbee, 55manengiwe ndũa ya Eviloni, ĩla yĩ Kĩsionĩ kya nthĩ ya Yuta. Manengiwe ndũa ĩsu o vamwe na isio sya kũĩthya ila syamĩthyũlũlũkĩte. 56Ĩndĩ Kalevu mwana wa Yevune nĩwanengiwe mĩũnda na motũi ma ndũa ĩsu.

57Kwoou nzyawa sya Alũni nĩsyanengiwe ndũa ii sya wĩvitho: Eviloni na Livina na isesi syasyo sya kũĩthya, Yatili na Esitemoa na isesi syayo sya kũĩthya, 58Ileni na Ndevili na isesi syasyo sya kũĩthya, 59Asani na Mbethi-semesi na isesi syasyo sya kũĩthya. 60Kuma kĩsionĩ kya nthĩ ya mbaĩ ya Mbengyameni, nĩmanengiwe ndũa ii o vamwe na isesi syasyo: Ngeva, Alemethi na Anathothi. Ndũa syoo syonthe ila manengiwe kwĩanana na mĩsyĩ yoo syaĩ ĩkũmi na itatũ. 61Nzyawa ila ingĩ sya Koathi nĩsyanengiwe ndũa ĩkũmi, kuma kĩsionĩ kya nthĩ ya mbaĩ ya Manase kĩla kyaĩ ũthũĩlonĩ wa syũa.

62Nzyawa sya Ngelisoni kwĩanana na mĩsyĩ yoo, nĩmanengiwe ndũa ĩkũmi na itatũ, kuma isionĩ sya nthĩ sya mbaĩ ya Isakali, ya Aseli, ya Navutalĩ, na ya Manase ĩla yatwĩe Mbasani, ngalĩko ya wumĩlonĩ wa syũa. 63Nzyawa sya Melali kwĩanana na mĩsyĩ yoo, nĩmanengiwe ndũa ĩkũmi na ilĩ kuma isionĩ sya nthĩ sya mbaĩ ya Lũveni, Ngandi na Nzevuluni. 64Kwoou andũ ma Ĩsilaeli nĩmanengie Alivai ndũa isu matũae vo na o ta ũu mamanenga isesi sya kũĩthya ila syaithyũlũlũkĩte. 65O ta ũu andũ ma Ĩsilaeli nĩmanengie Alivai ndũa isu iwetetwe kwa masyĩtwa, kuma isionĩ sya nthĩ sya mbaĩ ya Yuta, ya Simioni na ya Mbengyameni; meekie ũu kwa kũkũna kula.

66Amwe ma mĩsyĩ ya Koathi nĩmanengiwe ndũa syoo, kuma kĩsionĩ kya nthĩ ya mbaĩ ya Evalaimu. 67Nĩmanengiwe ndũa ya Sekemu, ĩla yĩ nthĩ yĩ iĩma ya Evalaimu, yĩthĩwe ndũa ya wĩvitho. O ta ũu nĩmanengiwe ndũa ii: Ngeseli, 68Yokimeamu, Mbethi-oloni, 69Aiyaloni na Ngathi-limoni. Ndũa isu syonthe syaĩ vamwe na isesi sya kũĩthya.

70Andũ ma Ĩsilaeli nĩmanengie amwe ma mĩsyĩ ya Koathi ĩla yatialĩte, ndũa ya Aneli na ya Mbileamu syĩ vamwe na isesi syasyo sya kũĩthya. Ndũa isu syaĩ kĩsionĩ kya nthĩ kya Nyusu ya mbaĩ ya Manase.

71Andũ ma mũsyĩ wa Ngelisomu nĩmanengiwe ndũa ya Ngolani ĩla yĩ Mbasani, na ndũa ya Asitalothi, ila syĩ kĩsionĩ kya nthĩ ya nyusu ya mbaĩ ya Manase, ĩla yĩ ngalĩko ya wumĩlonĩ wa syũa. Manengiwe ndũa isu syĩ vamwe na isesi syasyo sya kũĩthya.

72Kuma kĩsionĩ kya nthĩ ya mbaĩ ya Isakali, nĩmanengiwe ndũa ii syĩ vamwe na isesi syasyo sya kũĩthya: Ketesi, Ndavelathi, 73Lamothi na Anemu.

74Kuma kĩsionĩ kya nthĩ ya mbaĩ ya Aseli, nĩmanengiwe ndũa ii syĩ vamwe na isesi syasyo sya kũĩthya: Masali, Avitoni 75Ukoki na Leovu.

76Kuma kĩsionĩ kya nthĩ ya mbaĩ ya Navutalĩ, nĩmanengiwe ndũa ii syĩ vamwe na isesi syasyo sya kũĩthya: Ketesi ĩla yĩ Kalilii, Amumoni na Kiliathaimu.

77Andũ ala angĩ ma mũsyĩ wa Melali nĩmanengiwe ndũa ya Limoni na Tavoli, ila syĩ kĩsionĩ kya nthĩ kya mbaĩ ya Nzevuluni. Manengiwe ndũa isu syĩ vamwe na isesi syasyo sya kũĩthya.

78Kuma kĩsionĩ kya nthĩ kya mbaĩ ya Lũveni, ngalĩko ya wumĩlonĩ wa syũa ya Ũsĩ wa Yolotani mbee wa Yeliko, nĩmanengiwe ndũa ii syĩ vamwe na isesi syasyo sya kũĩthya: Mbeseli, ĩla yĩ weũnĩ, Yasa, 79Ketemothi na Mevaathi.

80Kuma kĩsionĩ kya nthĩ kya mbaĩ ya Ngati, nĩmanengiwe ndũa ii syĩ vamwe na isesi syasyo sya kũĩthya: Lamothi ĩla yĩ Ngileati, Maanaimu, 81Esivoni na Yaseli.

Currently Selected:

1Mav 6: KAMBA

Highlight

Copy

Compare