1Mav 4

Nzyawa sya Yuta

1Ana ma Yuta maĩ Velesi, Esiloni, Kalimi, Uulu na Sovali. 2Leaia mwana wa Sovali nĩwe waĩ ĩthe wa Yaathi. Yaathi aĩ ĩthe wa Aumai na Laati. Ĩsu nĩyo mĩsyĩ ya Anzolathi.

3Aa nĩmo ana#4.3 ana: Maandĩko ma Kievelania maĩtye ana ma ĩthe wa ma Etamu: Yesileeli, Isima na Itivasi. Mwĩĩtu-a-inyia woo eetawa Aselelivoni. 4Venueli aĩ ĩthe wa Ngetoli; Eseli aĩ ĩthe wa Uusa. Isu syaĩ nzyawa sya Uulu mwana ũla mũkũũ wa Evilathi, ũla waĩ mwambĩlĩĩlya wa ndũa ya Mbetheleemu.

5Asuli ĩthe wa Tekoa aĩ na iveti ilĩ: Eela na Naala. 6Naala asyaĩie Asuli ana aa: Ausamu, Eevieli, Temeni na Aasitali. Asu nĩmo ana ma Naala. 7Ana ala Eela wasyaĩie Asuli maĩ Nzelethi, Isali na Ethinani.

8Akosi aĩ ĩthe wa Anuvu na Nzoveva, na nowe waĩ ũmae wa mĩsyĩ ya nzyawa sya Aalieli mwana wa Alumu.

9Ve mũndũ weetawa Yavesu wanengetwe ndaĩa mbee wa ana-a-ĩthe make. Inyia wake amwĩtie Yavesu#4.9 Yavesu: Ĩsyĩtwa yĩĩ Kĩthyomonĩ kya Kĩevelania yĩtamũkĩkaa ta ndeto ĩla ũalyũlo wayo nĩ thĩna. nũndũ amũsyaie na thĩna. 10Yavesu nĩwavoyie Ngai wa Ĩsilaeli ayasya atĩĩ, “Ame Ngai, ngathime na ũinenga nthĩ nene. Ĩthĩwa vamwe nakwa, na ũinzũvĩa kuma mothũkunĩ onthe ala matonya kũndetee thĩna.” Ngai nĩwanengie Yavesu kĩla wamũvoyie.

Nzyawa Ingĩ

11Keluvu mwana-a-inyia wa Suua nĩwe waĩ ĩthe wa Meili, nake Meili aĩ ĩthe wa Esitoni. 12Esitoni aĩ ĩthe wa Mbethi-lava, Vasea na Teina. Teina nĩwe waĩ mwambĩlĩĩlya wa ndũa ya Naase. Nzyawa sya aũme asu syatwĩe Leka.

13Ana ma Kenasi maĩ Othinieli na Selaia. Ana ma Othinieli maĩ Athathi na Meonothai.#4.13 Meonothai: Ĩsyĩtwa yĩĩ ti ĩandĩke Maandĩkonĩ Matheu ma kĩthyomo kya Kĩevelania 14Meonothai aĩ ĩthe wa Ovala. Selaia aĩ ĩthe wa Yoavu mwambĩlĩĩlya wa Mwanda wa Aseũvya ma Syĩndũ. Mwanda ũsu weetawa ũu nũndũ andũ onthe ala matwĩe vau maĩ na ũmanyi wa kũseũvya syĩndũ nesa.

15Ana ma Kalevu mwana wa Yevune maĩ Ilu, Ela na Naami. Kenasi aĩ mwana wa Ela.

16Ana ma Yealeleli maĩ Nzivu, Siva, Tilia na Asaleli.

17Ana ma Esala maĩ, Yetheli, Meleti, Evieli na Yaloni. Meleti nĩwatwaie Mbithia mwĩĩtu wa mũsumbĩ wa Misili. Mbithia asyaĩie Meleti syana ii: Miliamu, Samai na Isiva, mwambĩlĩĩlya wa ndũa ya Esitemoa. 18Meleti aĩ na kĩveti kĩngĩ Mũyuti. Kĩveti kĩu nĩkyo kyamũsyaĩie Yeleti, ũla nĩwe waĩ mwambĩlĩĩlya wa ndũa ya Ngetoli; Eeveli mwambĩlĩĩlya wa ndũa ya Soko, na Yekuthieli mwambĩlĩĩlya wa ndũa ya Nzanoa.

19Otia nĩwatwaie mwĩĩtu-a-inyia wa Naamu. Ana make nĩmo matw'ĩkie aaũmae ma andũ ma mũsyĩ wa Ngalimi, ala matwĩe ndũanĩ ya Keila, na andũ ma mũsyĩ wa Maakathi, ala matwĩe ndũanĩ ya Esitemoa.

20Ana ma Simonu maĩ Aminoni, Lina, Mbeni-anani na Tiloni.

Ana ma Isi maĩ Nzoethi na Mbeni-nzoethi.

Nzyawa Sya Siela

21Siela aĩ ũmwe wa ana ma Yuta. Ana make maĩ Eeli mwambĩlĩĩlya wa ndũa ya Leka, Laata mwambĩlĩĩlya wa ndũa ya Malesa; mũsyĩ wa andũ ala matumaa syĩndũ maitũmĩa ndii nzeo ndũmu ala matwĩe ndũanĩ ya Mbethi-asivea; 22Yokimu na andũ ala matwĩe ndũanĩ ya Koseva; Yoasi na Salavu ala masumbĩkĩte nthĩ ya Moavi na Yasuvi-leemu (Ũvoo ũũ nĩ wa tene mũno.) 23Andũ asu matethasya wĩa wa kũmba syĩndũ na yũmba, na matwĩe ndũanĩ ya Netaimu na ya Ngetela maithũkũma mũsumbĩ.

Nzyawa sya Simioni

24Ana ma Simioni maĩ Nemueli, Yamini, Yalivu, Nzela, na Sauli. 25Sauli aĩ ĩthe wa Salumu, Salumu aĩ ĩthe wa Mivisamu, nake Mivisamu aĩ ĩthe wa Misima. 26Misima aĩ ĩthe wa Amueli, Amueli aĩ ĩthe wa Nzakuli, nake Nzakuli aĩ ĩthe wa Simei. 27Simei aĩ na ana ĩkũmi na thanthatũ, na eĩtu thanthatũ. Ana-a-inyia ma Simei mayaĩ na syana mbingĩ. Kwoou mbaĩ yoo ndyaaĩthĩwa yĩ nene ta ĩla ya Yuta.

28 # Yos 19.2-8 Nzyawa sya Simioni syatwĩe ndũanĩ ii: Mbeeli-sieva, Molata, Asali-suali, 29Mbila, Osemu, Tolati, 30Mbethueli, Olima, Nzikilaki, 31Mbethi-malikavothi, Asali-susimu, Mbethi-mbili na Saalaimu. Nzyawa isu syatũie ndũanĩ isu nginya ĩvindanĩ yĩla Ndeviti watw'ĩkie mũsumbĩ. 32O ta ũu nĩmatwĩe motũinĩ angĩ atano: Etamu, Aini, Limoni, Tokeni na Asani, 33o vamwe na motũi ala mathyũlũlũkĩte ndũa isu kũthi kũvika Mbaalathi. Kũu nĩkw'o nzyawa sya Simioni syatwĩe. Nĩmaandĩkaa vandũ ĩũlũ wa mosyaanĩo moo.

34Atongoi ma mĩsyĩ yoo maĩ, Mesovavu, Yamileki, Yosa mwana wa Amasia, 35Yoeli, Yeũ mwana wa Yosivia, ũla waĩ mwana wa Selaya, mwana wa Asieli, 36Elioenai, Yaakova, Yesoaia, Asaia, Atieli, Yesimieli, Mbenaia, 37na Nzisa mwana wa Sivi, ũla waĩ mwana wa Aloni, mwana wa Yetaia. Yetaia aĩ mwana wa Simili, mwana wa Semaia. 38Andũ asu mawetetwe masyĩtwa nĩmo maĩ atongoi mĩsyĩnĩ yoo, na nzyawa syoo nĩsyongelekile mũno. 39Nĩmanyaĩĩkie nginya vakuvĩ na ndũa ya Ngetoli, na ngalĩko ya wumĩlonĩ wa syũa ya mwanda, maimantha kũndũ kwĩ isesi nzeo sya kũĩthya mbũi na malondu. 40Nĩmeethĩie nthĩ nou yĩ isesi nzeo; nthĩ nene, ĩkilĩtye na yĩ mũuo. Andũ ala matwĩe kũu tene maĩ nzyawa sya Amu.

41Ĩvindanĩ ya Esekia mũsumbĩ wa Yuta, atongoi asu ma mĩsyĩ ya Simioni nĩmaendie Ngelali na maananga maeema ma nzyawa sya Amu, na sya Ameuni ala matwĩe vo na mamamina vyũ kũvika o na ũmũnthĩ. Nzyawa sya Simioni nĩsyatũie vau nũndũ vaĩ na isesi nzeo sya kũĩthya mbũi na malondu moo. 42Andũ maana atano ma nzyawa sya Simioni, nĩmaendie Kĩĩmanĩ kya Seili matongoew'e nĩ Velatia, Nealia, Levaia na Usieli ana ma Isi. 43Nĩmooaie mamina Aamaleki ala matialĩte ĩtina wa kũkĩa. Nĩmatũie vau kũvika o na ũmũnthĩ.

Currently Selected:

1Mav 4: KAMBA

Highlight

Copy

Compare