1Mav 14
14
Nyũmba ya Kĩ-ũsumbĩ ya Ndeviti na Mũsyĩ wake
(2Sam 5.11-16)
1Ilamu mũsumbĩ wa Tile nĩwatũmie andũ mathi kũla kwĩ Ndeviti makuĩte iting'ĩ sya mĩtĩ ya mĩkũũ. Nĩmaendanĩtye vamwe na aki ma nyũmba na andũ ala maseũvasya syĩndũ na mbwaũ, nĩ kana makĩe Ndeviti nyũmba ya kĩ-ũsumbĩ. 2Kwoou Ndeviti nĩwamanyie kana Mwĩai Ngai nĩwatumĩte ethĩwa na ũlũmu ta mũsumbĩ wa andũ ma Ĩsilaeli, na kana nĩwatumĩte ũsumbĩ wake ũendeea nesa kwondũ wa andũ make.
3E Yelũsalemu, Ndeviti nĩwatwaie iveti ingĩ mbingĩ na eethĩwa na ana na eĩtu angĩ aingĩ. 4Ii nĩsyo syana ila wasyaĩwe e Yelũsalemu: Samua, Sovavu, Nathani, Solomoni, 5Iviali, Elisua, Eliveleti. 6Noka, Neveki, Yavia, 7Elisama, Eliata, na Eliveleti.
Ndeviti Aisinda Avilisiti
(2Sam 5.17-25)
8Yĩla Avilisiti meewie kana Ndeviti nũnatw'ĩkĩthiw'e mũsumbĩ wa nthĩ ya Ĩsilaeli yonthe, asikalĩ moo onthe nĩmaendie kũmũmantha mamũkwate. Ndeviti nĩwamanyie ũu, na athi akokite namo. 9Avilisiti nĩmookie malika Mwandanĩ wa Alevai na mambĩĩa kũtava mũtavo vo. 10Nĩvo ĩndĩ Ndeviti wakũlilye Ngai atĩĩ, “Nĩngũthi ngavithũkĩe Avilisiti? Nũũndonyethya kũmasinda?”
Mwĩai Ngai nĩwamũsũngĩie amwĩa atĩĩ, “Ĩĩ enda ũkamavithũkĩe! Nĩngũũtonyethya kũsinda!”
11Kwoou Ndeviti nĩwaendie Mbaali-velasimu okita na Avilisiti na amasinda. Nĩwaneenie asya atĩĩ, “Ngai nĩwandonyethya kũvĩtĩla katĩ wa amaitha makwa o tondũ kĩw'ũ kingĩ kĩvĩtaa.” Kwoou vandũ vau veetwa Mbaali-velasimu.#14.11 Mbaali-velasimu: Ũalyũlo wa ĩsyĩtwa yĩĩ nĩ Ngai ũla wĩsĩlaa katĩ. 12Avilisiti nĩmatiie ngai syoo sya mĩvw'anano vau, na Ndeviti eeyĩaa ivĩvw'e na syavĩvw'a.
13Avilisiti nĩmavithũkĩie ĩngĩ mwanda ũsu, na matava syĩndũ. 14Ndeviti nĩwakũlilye Ngai ũtao ĩngĩ, nake Ngai amũsũngĩa amwĩa atĩĩ, “Ndũkathi kũvithũkĩa Avilisiti kuma vau ũĩ, ĩndĩ melingĩle na ũimavithũkĩa kuma ngalĩko ĩla yĩ mĩtĩ ya mĩvolosati. 15Wamina kwĩw'a matuu ta ma andũ mesĩlĩte mĩtĩnĩ ĩsu ĩũlũ oou, mavithũkĩe mĩtũkĩ. Nũndũ nĩĩthĩwa nĩendete mbee waku ngasinde asikalĩ ma Avilisiti.” 16Ndeviti nĩweekie ũndũ Ngai wamwĩaĩĩte, na okita asinda asikalĩ ma Avilisiti kuma Ngiveoni nginya Ngeseli. 17Nguma ya Ndeviti nĩyanyaĩĩkie kĩla vandũ. Mwĩai Ngai nĩwatumie andũ ma mbaĩ ila ingĩ syonthe makĩa Ndeviti.
Currently Selected:
1Mav 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
