Alo 15

Kwendeesya Andũ ala Angĩ eka Ithyĩ ene

1Ithyĩ ala twĩ alũmu mũĩkĩĩonĩ nĩtwaĩlĩte kũmĩanĩsya na mawonzu ma ala me na mũĩkĩĩo mũvũthũ, na tũikeyendeesye ithyĩ ene. 2Kĩla ũmwe waitũ nĩendeesye mũtũi wake nũndũ wa ũseo wake, nĩ kana amwake nthĩnĩ wa mũĩkĩĩo. 3#Sav 69.9 Nũndũ Klĩsto ndaaĩyendeesya we mwene, ĩndĩ no ũndũ Maandĩko Matheu maĩtye, “Numano ila makũumangaa nasyo ningwatĩte.” 4Maũndũ onthe ala maandĩkiwe naku tene, maandĩkiwe matũmanyĩsye nĩ kana kwĩsĩla wũmĩĩsyonĩ na ũkiakisyonĩ ũla tũkwataa kuma Maandĩkonĩ Matheu, twĩthĩwe na wĩkwatyo. 5Ngai ũla ũnenganae wũmĩĩsyo na ũkiakisyo, namũnenge inyw'ĩ kwĩkala mwĩ na mwĩw'ano katĩ wenyu, mũatĩĩe ngelekany'o ya Klĩsto Yesũ, 6nĩ kana inyw'onthe vamwe, mwĩ na wasya ũmwe mũtonye kũmũkatha Ngai, ĩthe wa Mwĩai waitũ Yesũ Klĩsto.

Ũvoo Mũseo kwa Andũ-ma-mbaĩ-ingĩ

7Ĩtĩkĩlanai inyw'ĩ kwa inyw'ĩ kwondũ wa ndaĩa ya Ngai, o ũndũ Klĩsto wamwĩtĩkĩlile inyw'ĩ. 8Nũndũ ekai nĩmũtavye, Klĩsto atw'ĩkie mũthũkũmi wa Ayuti onany'e ũw'o wa Ngai, nĩ kana eanĩĩsye maũndũ ala Ngai wathie aaũmae moo, 9#2Sam 22.50; Sav 18.49 na o ta ũu atonyethye Andũ-ma-mbaĩ-ingĩ kũmũkatha Ngai nũndũ wa tei wake. O tondũ Maandĩko Matheu maĩtye:

“Kwoou ngakũtaĩa we katĩ wa Andũ-ma-mbaĩ-ingĩ,

ngaina mbathi sya kũkumya ĩsyĩtwa yaku.”

10 # Kũt 32.43 O ĩngĩ Maandĩko Matheu nĩmaĩtye:

“Tanai inyw'ĩ Andũ-ma-mbaĩ-ingĩ,

tanai vamwe na anyuve ma Ngai!”

11 # Sav 117.1 Na ĩngĩ:

“Mũtaĩei Mwĩai inyw'onthe Andũ-ma-mbaĩ-ingĩ,

andũ onthe nĩmamũkathe!”

12 # Ĩsa 11.10 O ĩngĩ Ĩsaia easya:

“Nĩvakaumĩla nzyawa ya Yese,

nake akasumbĩka Andũ-ma-mbaĩ-ingĩ,

namo makaia wĩkwatyo woo nthĩnĩ wake.”

13Ngai ũla ũnenganae wĩkwatyo, nĩamusũsye na ũtanu na mũuo nũndũ wa mũĩkĩĩo wenyu, nĩ kana mũendee kwĩthĩwa na wĩkwatyo mwingĩ kwa vinya wa Veva Mũtheu.

Vaũlo Aiweta Kĩtumi kya Kũandĩka Ateũvithany'a

14Mbaitũ, nyie mwene nĩnĩsĩ nesa kana inyw'ĩ mwĩ andũ aseo ki, mwĩ na ũmanyi w'onthe na nĩmũtonya kũmanyĩany'a inyw'ĩ ene. 15Ĩndĩ nĩmũandĩkĩĩte kũndũ kũmwe valũanĩ ũũ ndeũvithany'a kĩndũ nĩmũlilikany'e ĩngĩ. Nĩlea kũvithany'a nũndũ wa mumo ũla nanengiwe nĩ Ngai, 16wa kwĩthĩwa mũthũkũmi wa Yesũ Klĩsto Andũnĩ-ma-mbaĩ-ingĩ. Nĩna wĩa wa kĩ-ũthembi wa kũtavany'a Ũvoo Mũseo wa Ngai, nĩ kana Andũ-ma-mbaĩ-ingĩ matonye kũtw'ĩka nthembo yĩtĩkĩlĩka kwa Ngai na ĩtheetw'e nĩ Veva Mũtheu. 17Kwoou nthĩnĩ wa Klĩsto Yesũ, nyie nĩndonya kwĩkathĩĩa ũthũkũminĩ wakwa, ũla nĩ kwondũ wa Ngai. 18Nditata kũneena ũndũ ũngĩ eka o ũla Klĩsto wĩkĩte, akandũmĩa nĩtongoesye Andũ-ma-mbaĩ-ingĩ methĩwe ewi kwa Ngai kwĩsĩla maũndũnĩ ala nĩneenete na nĩkĩte; 19kwĩsĩla vinyanĩ wa syama na maũndũ ma kũseng'ya, na kwĩsĩla vinyanĩ wa Veva Mũtheu. Kwoou kuma Yelũsalemu kwĩsĩla kũu kw'onthe kũthi kũvika nthĩ yĩtawa Ĩluliko, nĩndavanĩtye vyũ Ũvoo Mũseo ĩũlũ wa Klĩsto. 20Wendi wakwa kĩla ĩvinda nĩ kũtavany'a Ũvoo Mũseo vandũ vonthe vala Klĩsto ũtaamba kũmanyĩka, nĩ kana ndikethĩwe ndyaka mũsinginĩ wa mũndũ ũngĩ. 21#Ĩsa 52.15 O tondũ Maandĩko Matheu maĩtye:

“Andũ mataatavw'a ũvoo wake nĩmakamwona,

na andũ mataaĩw'a nĩmakamanya.”

Mũvango wa Vaũlo wa Kũthi Loma

22 # Alo 1.13 Nĩ kwa kĩtumi kĩu nĩsiĩĩtwe mavinda maingĩ kũka kwenyu. 23Ĩndĩ yu nũndũ nĩnĩminĩte wĩa wakwa isionĩ ii, na kwongela nĩkalĩte myaka mingĩ nĩ na mea ma kũka kũmwona, 24nĩngwĩkwatya kwĩsĩla ngĩmwona nĩendete Sivania, na mũindetheesya nĩthi kũu namina kwĩkalany'a nenyu ĩvinda yĩana ũndũ mũna. 25#1Ako 16.1-4 Ĩndĩ oyu nĩendete Yelũsalemu kũthũkũma aĩkĩĩi kũu. 26Nĩkwĩthĩwa makanisa ma Masendonia na ma Akaia, nĩmavangie kumya mũvothi wa kũtethya ngya katĩ wa aĩkĩĩi ala me Yelũsalemu. 27#1Ako 9.11 Mo ene nĩmo mavangie kwĩka ũu, ĩndĩ kwa w'o nĩmaĩlĩte kũtethya ngya isu. Nũndũ kwa w'o Ayuti nĩmaanie moathimo moo ma kĩ-veva na Andũ-ma-mbaĩ-ingĩ, na kwoou namo Andũ-ma-mbaĩ-ingĩ nĩmaĩlĩte kũtethya Ayuti na syĩndũ ila makwatĩte kuma kwa Ngai. 28Kwoou namina wĩa ũsu, na natia makwata mbesa syonthe ila syũmbanĩtw'e kwondũ woo, ngauma kũu nĩsĩle kwenyu nĩendete Sivania. 29Nĩnĩsĩ kana yĩla nĩũka kwenyu ngamũetee ũathimo mwingĩ kuma kwa Klĩsto.

30Nĩngũmwĩsũva ĩndĩ mbaitũ, kwondũ wa Mwĩai waitũ Yesũ Klĩsto, na kwondũ wa wendo ũla Veva ũnenganae, mwĩnengane kũvoya vamwe nakwa, na mũimboyea kwa Ngai. 31Voyai Ngai anzũvĩe kuma kwa andũ ala mataĩkĩĩaa Yesũ Klĩsto nthĩnĩ wa Yutia, na o ta ũu ũthũkũmi wakwa Yelũsalemu wĩtĩkĩlĩke kwa aĩkĩĩi ala me kũu, 32nĩ kana ethĩwa nĩ kwenda kwa Ngai nĩũka kwenyu nĩ na ũtanu, na kũthũmũa nĩ vamwe nenyu. 33Ngai ũla ũnenganae mũuo nĩethĩwe nenyu inyw'onthe. Ameni!

Currently Selected:

Alo 15: KAMBA

Highlight

Copy

Compare