Alo 14

Mũikasilĩle Aĩkĩĩi ala Angĩ

1 # Akol 2.16 Mwĩtĩkĩlei mũndũ ũla wĩ na mũĩkĩĩo mũvũthũ, ĩndĩ mũikakananĩe nake ĩũlũ wa mosũanĩo make. 2Mũĩkĩĩo wa andũ amwe nũmetĩkĩlĩtye kũya malĩu onthe, ĩndĩ andũ angĩ ala mena mũĩkĩĩo mũvũthũ mayĩĩsaa nyama o na ĩndĩĩ. 3Andũ ala maĩsaa malĩu onthe maikavũthye andũ ala mataĩsaa malĩu amwe, namo andũ ala mataĩsaa malĩu amwe maikasilĩle andũ ala maĩsaa malĩu onthe, nũndũ Ngai nĩwĩtĩkĩlĩte andũ asu. 4We nue ũũ ũsilĩle athũkũmi ma mũndũ ũngĩ? No mũnene woo ũtonya kũmanya kana meĩka nesa kana nĩmekũvalũka; ĩndĩ nĩmekwĩka nesa nũndũ Mwĩai e na ũtonyi wa kũtuma meka nesa.

5Andũ amwe mosaa mũthenya ũmwe kwĩthĩwa wĩ wa mwanya kũte mĩthenya ĩla ĩngĩ, namo andũ angĩ mayosa mĩthenya yonthe kwĩthĩwa o ũndũ ũmwe. Kĩla mũndũ nĩaĩkĩĩe kana mosũanĩo make nĩ ma w'o. 6Ala mosaa mũthenya ũmwe kwĩthĩwa wĩ wa mwanya, mekaa ũu kwondũ wa kũmũtaĩa Mwĩai. Ala namo maĩsaa nyama, maĩsaa kwondũ wa kũmũtaĩa Mwĩai nĩkwĩthĩwa nĩmamũtũngĩaa Ngai mũvea nũndũ wa lĩu. Ala mataĩsaa nyama namo maleaa kũya kwondũ wa kũmũtaĩa Mwĩai, na nĩmamũtũngĩaa Ngai mũvea. 7Vai ũmwe waitũ wĩkalaa thayũ kwondũ wake mwene, na vai ũmwe waitũ ũkusaa kwondũ wake mwene. 8Ethĩwa nĩtũkwĩkala thayũ, twĩĩkala kwondũ wa Mwĩai, na ethĩwa nĩtũũkw'a, twĩkw'a kwondũ wa Mwĩai. Kwoou ethĩwa nĩtũkwĩkala thayũ kana nĩtũũkw'a, twĩ ma Mwĩai. 9Kwa kĩtumi kĩu, Klĩsto nĩwakwie na athayũũka nĩ kana ethĩwe Mwĩai wa ala me thayũ na ala akw'ũ. 10#2Ako 5.10 Inyw'ĩ ĩndĩ ala mũtaĩsaa malĩu amwe, nĩkĩ mũsilĩlaa andũ ala angĩ? Nenyu ala mũĩsaa malĩu onthe, nĩkĩ mũvũthasya aĩkĩĩi ala angĩ? Ithyonthe nĩtũkaũngama mbee wa Ngai atũsilĩle. 11#Ĩsa 45.23 Nĩkwĩthĩwa Maandĩkonĩ Matheu Mwĩai nũneenete akasya:

“O ũndũ nyie nĩ thayũ,

kĩla mũndũ nũkandulĩlya ndu,

na kĩla mũndũ nũkaneena asye nyie ninyie Ngai.”

12Kwoou kĩla ũmwe waitũ nũkeyĩelesya mbee wa Ngai kĩla we wĩkĩte.

Ndũkatume Mũklĩsto ũla ũngĩ Avalũka

13Kwoou ĩndĩ tũekei kũsilĩlana ithyĩ ene. Vandũ va ũu, no nginya mũsũanĩe kũlea kwĩka ũndũ ũtuma mũndũ ũngĩ asya mũĩkĩĩo kana avalũka. 14Nyie ta mũatĩĩi wa Mwĩai Yesũ, nĩnĩsĩ nesa kana vai kĩndũ kĩvuku kyo mbene. Ĩndĩ ethĩwa mũndũ akoosa kĩndũ kwĩthĩwa nĩ kĩvuku, kwa mũndũ ũsu nĩ kĩvuku. 15Ethĩwa mũndũ ũla ũngĩ nũkwĩw'a woo nũndũ wa kĩla ũũya, mũendele waku ndũtongoew'e nĩ wendo. Ndũketĩkĩle lĩu ũla we ũĩsaa wanange mũndũ ũngĩ ũla Klĩsto wakwie kwondũ wake! 16Kwoou mũiketĩkĩle kĩla mwonaa kĩ kĩseo kĩtwe kĩthũku. 17Nũndũ ũsumbĩ wa Ngai ti ũvoo wa kũya na kũnyw'a, ĩndĩ nĩ ũvoo wa ũlũngalu, mũuo na ũtanu ũla ũetawe nĩ Veva Mũtheu. 18Mũndũ ũla ũmũthũkũmaa Klĩsto kwa nzĩa ĩsu, nũmwendeeasya Ngai na nĩwĩtĩkĩlĩtwe nĩ andũ.

19Kwoou ĩndĩ no nginya tũatĩĩe maũndũ ala maetae mũuo, na ma kwakana ithyĩ kwa ithyĩ. 20Mũikanange wĩa wa Ngai nũndũ wa lĩu. Malĩu onthe kwa w'o nĩmaĩlĩte kwa kũĩwa, ĩndĩ nĩ ũthũku mũndũ kũya kĩndũ kĩtuma mũndũ ũngĩ asya mũĩkĩĩo. 21Nĩ ũseo mũndũ kũlea kũya nyama kana kũnyw'a ndivai, kana kwĩka ũndũ o na wĩva ũtuma mũndũ ũngĩ asya mũĩkĩĩo. 22Kĩla ũĩkĩĩaa ĩũlũ wa maũndũ aa, kĩkalye katĩ waku na Ngai. Nĩ mũathime mũndũ ũla ũtetũlaa mũtĩ nũndũ wa ũndũ wonaa wĩ mwaĩlu. 23Ĩndĩ mũndũ ũla wĩ na nzika na kĩndũ, akĩya nĩ mũsilĩle, nũndũ kũya kwake kũyumanĩte na mũĩkĩĩo. Na kĩndũ kyonthe kĩla kĩtaumanĩte na mũĩkĩĩo nĩ naĩ.

Currently Selected:

Alo 14: KAMBA

Highlight

Copy

Compare