Yos 4
4
Andũ ma Ĩsilaeli Mayĩnzĩla Mavia Ĩkũmi na Elĩ ma Ũlilikany'o
1Yĩla andũ onthe ma Ĩsilaeli maingie Ũsĩ wa Yolotani, Mwĩai Ngai nĩweeie Yosua atĩĩ, 2“Nyuva aũme ĩkũmi na elĩ, ũmwe kuma kĩla mbaĩnĩ ya andũ ma Ĩsilaeli. 3Tavya aũme asu mose mavia ĩkũmi na elĩ Ũsĩnĩ wa Yolotani katĩ, vala athembi meĩũngamĩte na maimakua makamaie vala mũũthi kũkomela ũmũnthĩ.”
4Kwoou Yosua nĩweetie aũme asu ĩkũmi na elĩ wanyuvĩte 5na amea atĩĩ, “Endai mbee wa athembi ala makuĩte Ĩsandũkũ ya Ũtianĩo ya Mwĩai Ngai, Ngai wenyu, mũkalike Ũsĩnĩ wa Yolotani katĩ. Kĩla ũmwe wenyu nĩose ĩvia akue na kĩtuo, ĩvia yĩmwe kwa kĩla mbaĩ ya andũ ma Ĩsilaeli. 6Mavia asu makalilikanasya andũ ũndũ Mwĩai Ngai wĩkĩte. Ĩvindanĩ yĩla yũkĩte, syana syenyu syamũkũlya, ‘Mavia aa me na wonany'o mwaũ kwenyu?’ 7Mũkaisũngĩa mũsyĩe, ‘Kĩw'ũ kya Ũsĩ wa Yolotani nĩkyaekie kũvĩta yĩla Ĩsandũkũ ya Ũtianĩo ya Mwĩai Ngai yaingaw'a ũsĩ ũsu.’ Ĩvinda yonthe mavia aa makalilikanasya andũ ma Ĩsilaeli ũndũ ũla weekĩkie vaa.”
8Aũme asu ĩkũmi na elĩ nĩmeekie ũndũ Yosua wameaĩe. Kwĩanana na ũndũ Mwĩai Ngai weeaĩie Yosua, nĩmoosie mavia ĩkũmi na elĩ kuma Ũsĩnĩ wa Yolotani katĩ, yĩmwe kwa kĩla mbaĩ ya andũ ma Ĩsilaeli. Nĩmakuie mavia asu mamatwaa vala mambie maeema na mamaia vo. 9O ta ũu Yosua nĩwaũngamisye mavia ĩkũmi na elĩ Ũsĩnĩ wa Yolotani katĩ vala ala athembi makuĩte Ĩsandũkũ ya Ũtianĩo maũngyĩ. Mavia asu me o vo o na kũvika ũmũnthĩ. 10Athembi asu makuĩte Ĩsandũkũ ya Ũtianĩo nĩmaendeeie kũũngama Ũsĩnĩ wa Yolotani nginya andũ meeka maũndũ onthe ala Mwĩai Ngai weeaĩie Yosua atavye andũ meke. Maũndũ asu nomo Mwose weeaĩĩte Yosua.
Andũ nĩmaingie Ũsĩ wa Yolotani mekalaatĩte. 11Andũ onthe ma Ĩsilaeli mamina kũinga ũsĩ, athembi ala makuĩte Ĩsandũkũ ya Ũtianĩo ya Mwĩai Ngai o namo nĩmaingie mavĩtũka andũ na matongosya. 12Aũme ma mbaĩ ya Lũveni, ma mbaĩ ya Ngandi, na nyusu ya aũme ma mbaĩ ya Manase nĩmaingie Ũsĩ wa Yolotani me mbee wa andũ ala angĩ, meyũmbanĩtye kũkita o tondũ Mwose wameaĩĩte. 13Aũme ta ngili mĩongo ĩna nĩmaingie mathi kũvika weũnĩ ũla wĩ vakuvĩ na ndũa ya Yeliko matongoew'e nĩ Mwĩai Ngai. 14Maũndũ ala Mwĩai Ngai weekie mũthenyanĩ ũsu nĩmatumie Yosua ethĩwa e mũndũ wĩ nguma kũla kwĩ andũ ma Ĩsilaeli. Nĩmamũnengae ndaĩa nene ĩvindanĩ yonthe ya thayũ wake, o tondũ mamũnengae Mwose.
15Nĩvo ĩndĩ Mwĩai weeie Yosua atĩĩ, 16“Ĩaĩe athembi ala makuĩte Ĩsandũkũ ya Ũtianĩo maume Ũsĩnĩ wa Yolotani.” 17Kwoou Yosua nĩweeaĩie athembi asu amea nĩmaume ũsĩnĩ. 18Mavika ũtee wa ũsĩ, kĩw'ũ kya ũsĩ ũsu nĩkyambĩĩie kũvĩta ĩngĩ kyusũĩte na kĩkakĩla ndee syaw'o.
19Andũ ma Ĩsilaeli maingie Ũsĩ wa Yolotani mũthenyanĩ wa ĩkũmi wa mwei wa mbee. Nĩmambie maeema moo vandũ vetawa Ngilikali ngalĩko ya wumĩlonĩ wa syũa ya Yeliko. 20Yosua nĩwenzĩlile vau Ngilikali ala mavia ĩkũmi na elĩ makuĩtwe kuma Ũsĩnĩ wa Yolotani vau. 21Nĩwatavisye andũ ma Ĩsilaeli amea atĩĩ, “Ĩvinda yũkĩte syana syenyu syamũkũlya, ‘Mavia aa me na wonany'o mwaũ?’ 22Mũkasyĩa atĩĩ, ‘Andũ ma Ĩsilaeli maingie Ũsĩ wa Yolotani mesĩlĩte nthĩ nyũmũ.’ 23Mwĩitavya mũsyĩe Mwĩai Ngai, Ngai wenyu nĩwang'alĩthisye Ũsĩ wa Yolotani nginya mwainga, o tondũ wang'alĩthisye Ũkanga Mũtune na twainga, 24nĩ kana andũ onthe ĩũlũ wa nthĩ mamanye kana Mwĩai Ngai e ũtonyi mũnene, nenyu mwĩthĩawe na kĩkĩo kya Mwĩai Ngai, Ngai wenyu tene na tene.”
Currently Selected:
Yos 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011