Yos 3
3
Andũ ma Ĩsilaeli Mayĩinga Ũsĩ wa Yolotani
1Ũnĩ ũsu kwakya tene Yosua na andũ onthe ma Ĩsilaeli nĩmaamũkie na mambĩĩa kyalo kuma Sitimu. Nĩmaendie mavika Ũsĩnĩ wa Yolotani na mamba maeema moo ũtee wa ũsĩ ũsu matanamba kũwũinga. 2Ĩtina wa mĩthenya ĩtatũ, ala atongoi ma mbaĩ sya Ĩsilaeli nĩmavĩtĩle maeemanĩ 3na matavya andũ mamea atĩĩ, “Yĩla mũkwona athembi makuĩte yĩla Ĩsandũkũ ya Ũtianĩo ya Mwĩai Ngai, Ngai wenyu, mwĩuma vala mũĩ na mũimaatĩĩa. 4Athembi asu nĩmeũmwony'a nzĩa nũndũ mũyaaũka kũũ ĩngĩ. Ĩndĩ mũikathengee Ĩsandũkũ yĩu ya Ũtianĩo. Katĩ wenyu na Ĩsandũkũ yĩu nĩvethĩwe mwanya wa ta kĩlomita kĩmwe.”
5Yosua nĩweeie andũ ma Ĩsilaeli atĩĩ, “Ĩthesyei, nĩkwĩthĩwa ũnĩ Mwĩai Ngai akeeka maũndũ ma kũseng'ya katĩ wenyu.” 6Nĩwasyokie eea athembi nĩmose Ĩsandũkũ ya Ũtianĩo na maithi matongoesye andũ. Athembi asu nĩmeekie ũndũ wameie.
7Mwĩai Ngai nĩwaneenie na Yosua amwĩa atĩĩ, “Ũndũ ũla ngwĩka ũmũnthĩ nũũtuma andũ onthe ma Ĩsilaeli mambĩĩa ũkũnenga ndaĩa ta mũndũ wĩ nguma. O ta ũu nĩmeũmanya kana nĩ vamwe naku o tondũ neethĩawa vamwe na Mwose. 8Ĩaĩe athembi ala makuĩte Ĩsandũkũ ya Ũtianĩo ũmee mavika Ũsĩnĩ wa Yolotani nĩmalike kĩw'ũnĩ na maendanga vanini mayĩũngama.”
9Yosua nĩweeie andũ ma Ĩsilaeli atĩĩ, “Ũkai vaa na mũyĩthukĩĩsya ũndũ Mwĩai Ngai, Ngai wenyu, ũkwasya. 10Nĩmũũmanya kana Ngai ũla wĩ thayũ e katĩ wenyu na kana vate ndĩi nũkũlũngya andũ aa maume mbee wenyu: Akanaani, Aititi, Aivi, Avelisi, Angilikasi, Aamoli na Ayevusi, 11yĩla Ĩsandũkũ ya Ũtianĩo ya Mwĩai wa nthĩ yonthe yĩkũingw'a Ũsĩ wa Yolotani mbee wenyu. 12Yu ĩndĩ nyuvai aũme ĩkũmi na elĩ, ũmwe kuma kĩla mbaĩnĩ ya andũ ma Ĩsilaeli. 13Yĩla athembi ala makuĩte Ĩsandũkũ ya Ũtianĩo ya Mwĩai Ngai, Mwĩai wa nthĩ yonthe, meũkinya kĩw'ũnĩ kya Ũsĩ wa Yolotani, kĩw'ũ kya ũsĩ ũsu nĩkĩkũeka kũvĩta na kĩla kĩtheete kuma ngalĩko ya ĩũlũ kĩyĩũngama vandũ vamwe kĩseũvye kĩvumbu.”
14Kwoou yĩla andũ ma Ĩsilaeli maomboangie maeema moo nĩ kana mainge Ũsĩ wa Yolotani, athembi ala makuĩte Ĩsandũkũ ya Ũtianĩo nĩmaendie mbee woo. 15Yaĩ ĩvinda ya ngetha na Ũsĩ wa Yolotani nĩweethĩawa ũvingĩte kĩw'ũ kĩkakĩla. Ĩndĩ ũu wĩ o vo yĩla athembi ala makuĩte Ĩsandũkũ ya Ũtianĩo mavikie ũsĩnĩ ũsu na makinya kĩw'ũ oou, 16kĩw'ũ kuma ngalĩko ya ĩũlũ nĩkyaekie kũvĩta. Nĩkyoombie mbumbu vandũ vamwe, kĩ vaasa, vakuvĩ na ndũa yĩtawa Atamu ĩla yĩ kĩsionĩ kĩtawa Nzelathani, nakyo kĩw'ũ kĩla kyatheete kĩendete Ũkanganĩ Mũkw'ũ ũla wĩ kĩsionĩ kĩtawa Alava kyathi vyũ. Kwoou andũ ma Ĩsilaeli nĩmaingie Ũsĩ wa Yolotani mesĩlĩte nthĩ nyũmũ, 17namo athembi ala makuĩte yĩla Ĩsandũkũ ya Ũtianĩo nĩmaungyĩ ĩũlũ wa nthĩ nyũmũ Ũsĩnĩ wa Yolotani katĩ nginya andũ ma Ĩsilaeli onthe mainga.
Currently Selected:
Yos 3: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011