Yoa 14
14
Yesũ Nĩwe Nzĩa ya Kũthi kwa Asa
1Yesũ nĩweeie amanyĩw'a make atĩĩ, “Mũikaeke ngoo syenyu syĩthĩwe na kĩũũyũ; ĩkĩĩai Ngai,#14.1 ĩkĩĩai: Maandĩko angĩ ma Ndeto ya Ngai maĩtye nĩmũĩkĩĩaa na o ta ũu mũindĩkĩĩa nyie. 2Kwĩ kũndũ kwingĩ kwa kwĩkala nyũmbanĩ ya Asa, na nĩngũthi ngaseũvye vandũ kwondũ wenyu. Nyie ndyĩthĩwa namũtavya ũndũ ũsu kethĩwa ũu ti w'o kũilyĩ. 3Namina kũthi na kũmũseũvĩsya vandũ, ngasyoka na ngĩmũtwaa kwakwa, nĩ kana vala nyie nĩĩ nenyu o ta ũu mwĩthĩawe vo. 4Nĩmwĩsĩ nzĩa ya kũthi kũla nĩendete.”
5Tomasi amũkũlya atĩĩ, “Mwĩai, tũtesĩ kũla ũendete tũtonya ata kũmanya nzĩa ya kũthi kw'o?”
6Yesũ amũsũngĩa amwĩa atĩĩ, “Nyie ninyie nzĩa, na ninyie w'o na ninyie thayũ; vai mũndũ ũendaa kwa Asa atesĩlĩte vala nĩĩ. 7Ethĩwa nĩmũmbĩsĩ, mũkamũmanya Asa wakwa o nake, na yu tũĩ nĩmũmwĩsĩ o na nĩmũmwonete.”
8Vilivũ amwĩa, “Mwĩai, twony'e Asa na ithyĩ nĩtũkwĩanĩwa.”
9Yesũ amũkũlya atĩĩ, “Nĩkalĩte nenyu ĩvinda yĩasavĩte ũu Vilivũ, na ũyĩthĩwa ndũmbĩsĩ? Mũndũ ũla ũmbonete nũmwonete Asa. Ũtonya ata ĩndĩ kwasya, ‘Twony'e Asa?’ 10We Vilivũ no ũkũĩkĩĩa kana nyie nĩ nthĩnĩ wa Asa, na Asa nake e nthĩnĩ wakwa? Ndeto ila ngũmũtavya ndiũneena na ũkũmũ wakwa mwene, ĩndĩ Asa ũla ũtwĩe nthĩnĩ wakwa nĩwe wĩ wĩanĩ wake. 11Nĩmwaĩlĩte kũndĩkĩĩa namwĩa kana nyie nĩ nthĩnĩ wa Asa, na Asa nake e nthĩnĩ wakwa; ethĩwa ti ũu, ĩkĩĩai nũndũ wa maũndũ ala nĩkaa. 12Nĩmũtavya w'o, mũndũ ũla ũndĩkĩĩaa o nake akeeka maũndũ ala nĩthĩĩtwe ngĩka, o na akeeka maũndũ manenange kwĩ asu, nũndũ yu nyie nĩngũsyoka kwa Asa wakwa. 13Nakwa ngeeka ũndũ o na wĩva ũla mwĩvoya ĩsyĩtwanĩ yakwa, nĩ kana Asa akwate ũkumyo kwĩsĩla kwa Mwana. 14Ethĩwa mũkavoya ũndũ o na wĩva ĩsyĩtwanĩ yakwa, ũndũ ũsu ngawĩka.
Kwathanwa kwa Veva Mũtheu
15“Ethĩwa nĩmũmbendete, mũkeekaa ũndũ mĩao yakwa ĩkwasya. 16Nĩvo ĩndĩ nakwa nĩmũvoya Asa, nake aimũnenga Mũtetheesya ũngĩ ekalae nenyu mavinda onthe. 17Ũsu nĩ Veva ũla wĩmwonasya kĩla kya w'o. Nthĩ ndĩmwĩtĩkĩla nũndũ yo ndĩmwonaa o na ndĩmwĩsĩ. Ĩndĩ inyw'ĩ nĩmũmwĩsĩ nũndũ ekalaa nenyu na e nthĩnĩ wenyu.
18“Ndikũthi vyũ nĩmũtie ta syana ndiwa; ngooka ĩngĩ vala mũĩ. 19Vatiele kavinda kanini vyũ na nthĩ ndĩkambona ĩngĩ, ĩndĩ inyw'ĩ mũkambona. Nĩkwĩthĩwa nyie nĩ thayũ, inyw'ĩ o nenyu mũkeethĩwa thayũ. 20Mũthenyanĩ ũsu nĩmũkamanya kana nyie nĩ nthĩnĩ wa Asa wakwa, nenyu mwĩ nthĩnĩ wakwa, nakwa nĩ nthĩnĩ wenyu.
21“Mũndũ ũla wĩtĩkĩlaa mĩao yakwa na wĩkaa ũndũ ĩkwasya, ũsu nĩwe ũmbendete. Nake Asa wakwa nũmwendete ũla ũmbendete, nakwa ngamwenda mũndũ ũsu na ngeevuany'a kwake.”
22Nĩvo ĩndĩ Yutasi, eka Yutasi Ĩsikalioti, wamũkũlilye Yesũ atĩĩ, “Mwĩai, kũtonyeka ata wĩvuany'e kwitũ na ũilea kwĩvuany'a kwa nthĩ?”
23Yesũ amũsũngĩa amwĩa atĩĩ, “Mũndũ ũla ũmbendete akakwataa momanyĩsyo makwa. Asa wakwa akamwenda mũndũ ũsu, naitũ tũkooka kwake tũtũae nake. 24Mũndũ ũla ũtambendete ndakwataa momanyĩsyo makwa, namo momanyĩsyo ala mwĩw'ĩte ti makwa, ĩndĩ maumĩte kwa Asa ũla ũndũmĩte.
25“Namũtavya maũndũ aa ĩvindanĩ yĩĩ nĩ vamwe nenyu. 26Ĩndĩ ũla Mũtetheesya, nake nĩ Veva Mũtheu, ũla Asa wĩtũma ĩsyĩtwanĩ yakwa, akamũmanyĩsya kĩla ũndũ, na kũmũlilikany'a maũndũ onthe ala nĩmũmanyĩĩtye.
27“Nĩngũmũtiĩa mũuo; nĩngũmũnenga mũuo wakwa. Ndiũmũnenga w'o ũndũ nthĩ ĩnenganae. Mũikaeke ngoo syenyu syĩthĩwe na kĩũũyũ kana w'ĩa. 28Nĩmweew'a nasya, ‘Nĩngũthi na ngooka vala mũĩ.’ Kethĩwa kwa w'o inyw'ĩ nĩmũmbendete, mwĩthĩwa mweew'a mũyo nũndũ nĩthi kwa Asa, nĩkwĩthĩwa we nĩ mũnene kwĩ nyie. 29Namũtavya ũndũ ũsu oyu ũtambĩte kwĩkĩka, nĩ kana weekĩka o nenyu mwĩthĩwe mũtonya kũĩkĩĩa. 30Ndiendeea kũneena nenyu mbeange wa vau, nũndũ mũnene wa nthĩ ĩno nĩwũkĩte. Nde na ũkũmũ ĩũlũ wakwa, 31ĩndĩ no nginya nthĩ ĩmanye kana nĩnĩmwendete Asa; kĩu nĩkyo kĩtumaa nĩka kĩla ũndũ kwĩanana na ũndũ ũndavĩtye.
“Ũkĩlai, tũendei tume vaa.
Currently Selected:
Yoa 14: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011