Yoa 13
13
Yesũ Aithambya Amanyĩw'a Make Maũũ
1Mboka ya Vasaka ĩtanavika, Yesũ nĩweesĩ kana saa wake waĩ mũviku aume kũũ nthĩ athi kwa Asa. Mavinda onthe nĩwamendete ala maĩ make kũũ nthĩ, na amendie kũvika mũminũkĩlyo.
2Yesũ na amanyĩw'a make nĩmekalĩte nthĩ maiya lĩu wa wĩoo, nake Satani aĩ aminie kũlikya ngoonĩ ya Yutasi Ĩsikalioti, mwana wa Simioni kĩsũanĩo kya kũmũthoosya Yesũ. 3Yesũ nĩweesĩ kana Asa nũmũnengete ũtonyi w'onthe, na nĩweesĩ kana we aumie kwa Ngai na asyokete kwa Ngai. 4Kwoou nĩwookĩlile mesanĩ, aumya ngũa ĩla weekĩĩte ĩũlũ na eeyova taũlo kĩnyunyunĩ. 5Nĩvo ĩndĩ weekĩie kĩw'ũ kalaĩnĩ na ambĩĩa kũthambya amanyĩw'a make maũũ, na kũmavangũla na taũlo ĩsu weeyovete. 6Nĩwavikie vala ve Simioni Vetelo, na Vetelo amũkũlya atĩĩ, “Mwĩai, we nũũnthambya maũũ?”
7Yesũ amũsũngĩa amwĩa, “Yu ndũmanya ũndũ ngwĩka, ĩndĩ ĩtina ũkaũmanya.”
8Vetelo amwĩa atĩĩ, “Aiee! We ndwĩsa kũnthambya maũũ!”
Yesũ amũsũngĩa amwĩa, “Naema ũkũthambya, ndwĩendeea kwĩthĩwa mũmanyĩw'a wakwa.”
9Simioni Vetelo amwĩa atĩĩ, “Mwĩai, o na ndũkanthambye maũũ me oka; nthambanĩsye vamwe na moko na mũtwe!”
10Yesũ amũsũngĩa amwĩa, “Mũndũ ũla ũthambĩte mwĩĩ ndena vata wa kũthamba eka o maũũ;#13.10 eka o maũũ: Maandĩko amwe ma tene ma Ndeto ya Ngai mai na ndeto ii nĩ mũtheu kĩla vandũ. Inyw'ĩ o nenyu mwĩ atheu, o na kau ti inyw'onthe.” 11Yesũ nĩweesĩ ũla ũkũmũthoosya, na kĩu nĩkyo kyatũmie asya atĩĩ, “O na kau ti inyw'onthe atheu.”
12 #
Lk 22.27
Yesũ amina kũthambya amanyĩw'a make maũũ, nĩweekĩie ngũa yake ya ĩũlũ ĩngĩ na asyoka mesanĩ vala wailyĩ. Nĩvo ĩndĩ wamakũlilye atĩĩ, “Nĩmwaelewa nĩ ũndũ ũsu namwĩka? 13Inyw'ĩ mũmbĩtaa, ‘Mũmanyĩsya,’ na, ‘Mwĩai,’ na nĩmwĩkaa nesa nũndũ kwa w'o ninyie we. 14Ethĩwa nyie ĩndĩ nĩ Mwĩai na Mũmanyĩsya wenyu nĩnathambya maũũ menyu, inyw'ĩ o nenyu nĩmwaĩlĩte kũthambanasya maũũ ũmwe kwa ũla ũngĩ. 15Nũndũ nyie nĩnamwony'a ngelekany'o, nĩ kana o nenyu mwĩkanae ũndũ namwĩka. 16#Mat 10.24; Lk 6.40; Yoa 15.20 Nĩmũtavya w'o, vai mũthũkũmi wĩthĩawa e mũnene kwĩ mũnene wake, kana mũndũ ũtũmĩtwe akethĩwa e mũnene kwĩ ũla ũmũtũmĩte. 17Yu nũndũ nĩmwamanya ũu, mũkeethĩwa mwĩ aathime ethĩwa mũkeekaa ũu.
18 #
Sav 41.9
“Nyie ndiũweta ĩũlũ wenyu inyw'onthe; nĩnĩsĩ ala nĩnyuvĩte. Ĩndĩ no nginya Maandĩko Matheu meanĩe ala maĩtye, ‘Mũndũ ũkũĩsanĩa nakwa nũtw'ĩkĩte mũmaitha wakwa.’ 19Nĩmũtavya ũndũ ũsu oyu ũtanamba kwĩkĩka, nĩ kana weekĩka inyw'ĩ mwĩĩtĩkĩla kana, ‘Ninyie Ũla Ninyie.’ 20#Mat 10.40; Mk 9.37; Lk 9.48; 10.16 Nĩmũtavya w'o, ũla ũthokasya ũmwe wa ala ndũmĩte ethĩawa anthokya nyie, na ũla ũnthokasya ethĩawa athokya ũla ũndũmĩte.”
Yesũ Aiweta kana Nũkũthoow'a kwa Amaitha
(Mat 26.20-25; Mk 14.17-21; Lk 22.21-23)
21Yesũ amina kũneena maũndũ asu, nĩwakwatiwe nĩ kĩũũyũ kingĩ ngoonĩ na amea amanyĩw'a make atĩĩ, “Nĩmũtavya w'o, ũmwe wenyu nũkũnthoosya kwa amaitha makwa.”
22Amanyĩw'a nĩmasianisye mateũmanya nũũ ũla ũkũwetwa. 23Ũmwe wa amanyĩw'a asu, nake nĩ ũla Yesũ wendete mũno, ailyĩ nthĩ amwĩyaĩĩsye Yesũ, 24na kwoou Simioni Vetelo amũvenesya amwĩa atĩĩ, “Kwa mũkũlye eneena ĩũlũ waũ?”
25Mũmanyĩw'a ũsu, eyaĩĩsye kĩthũinĩ kya Yesũ nĩwamũkũlilye atĩĩ, “Mwĩai, nũũ ũsu?”
26Yesũ asũngĩa asya atĩĩ, “Nĩ ũla ngũvokethya kalungu ka mũkate na ngĩmũnenga.” Kwoou yĩla wavokethisye kalungu ka mũkate, akanengie Yutasi mwana wa Simioni Ĩsikalioti. 27Nĩvo ĩndĩ Yutasi amina kwosa kamũkate kau walikilwe nĩ Satani. Yesũ nĩwamwĩie atĩĩ, “Kĩla ũkwenda kwĩka, ĩka kwa mĩtũkĩ!” 28Vai ũmwe wa ala maĩ vau mesanĩ waamanya amwĩa ũu nĩkĩ. 29Amwe masũanĩaa kana nũndũ Yutasi nĩwe mwii wa kĩnandũ, Yesũ emwĩa nĩathi akathooe kĩla kĩkwendekana kwondũ wa mboka, kana nĩathi akanenge ngya kĩndũ.
30Yutasi amina kwosa kala kalungu ka mũkate nĩwaumaalile o vau kwa vau. Kwaĩ ũtukũ.
Mwĩao Mweũ
31Ĩtina wa Yutasi kumaala, Yesũ nĩwaisye atĩĩ, “Mwana wa Mũndũ nũkwatĩte ũkumyo, na Ngai nũkwatĩte ũkumyo kwĩsĩla kwa Mwana. 32Ethĩwa Ngai akwatĩte ũkumyo kwĩsĩla kwa Mwana,#13.32 Ethĩwa Ngai akwatĩte ũkumyo kwĩsĩla kwa Mwana: Maandĩko amwe ma tene ma Ndeto ya Ngai mai na ndeto ii Ngai akamũnenga Mwana wake ũkumyo kwĩsĩla kwake na mĩtũkĩ mũno. 33#Yoa 7.34 Syana syakwa, vatiele kavinda kanini kakwa kwĩthĩwa nenyu. Nĩvo ĩndĩ mwĩmantha, na o ũndũ natavisye atongoi ma Ayuti, now'o ngũmũtavya o nenyu yu, ‘Mũitonya kũthi vala nĩendete.’ 34#Yoa 15.12,17; Yoa 3.23; 2Yoa 5 Ĩndĩ nĩngũmũnenga mwĩao mweũ: Endanaai inyw'ĩ kwa inyw'ĩ. O tondũ namwendie inyw'ĩ, no nginya nenyu mwendanae o w'o. 35Nĩ kwa kwendana inyw'ĩ kwa inyw'ĩ andũ onthe makamanya kana mwĩ amanyĩw'a makwa.”
Yesũ Aiweta kana Vetelo Nũkwĩsa Kũmũkaĩa
(Mat 26.31-35; Mk 14.27-31; Lk 22.31-34)
36Simioni Vetelo amũkũlya atĩĩ, “Mwĩai, wĩthi va?”
Yesũ amũsũngĩa amwĩa, “Vala ngũthi we ndũtonya kũngatĩĩa oyu, ĩndĩ ũkangatĩĩa ĩtina.”
37Vetelo amũkũlya atĩĩ, “Mwĩai, nĩema ũkũatĩĩa oyu nĩkĩ? Nyie nĩnĩyũmbanĩtye kũkw'a kwondũ waku!”
38Yesũ amũkũlya atĩĩ, “Atĩ nĩwĩyũmbanĩtye kũkw'a kwondũ wakwa? Nĩkũtavya w'o, mbee wa nzamba ĩtanasya nũũkaĩa katatũ wasye ndũmbĩsĩ!”
Currently Selected:
Yoa 13: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011