Meko 12
12
Kũthĩnw'a Ĩngĩ kwa Ĩkanisa
1Ĩvindanĩ o yĩu, Mũsumbĩ Elote nĩwambĩĩie kũthĩny'a andũ ma ĩkanisa. 2Nĩwaumisye mwĩao Yakovo, mwana-a-inyia wa Yoana oawe na ũvyũ. 3Yĩla Elote woonie kana ũndũ ũsu nĩwendeesya Ayuti, nĩwasyokie akwata Vetelo o nake. Ũu weekĩkie ĩvindanĩ ya Mboka ya Mũkate ũte Mbota. 4#Kuma 12.1-27 Ĩtina wa kũmũkwata Vetelo, nĩwamũvingĩie yela na amwia asungwe nĩ ikundi inya sya asikalĩ ana kĩla kĩmwe. Kĩeleelo kya Elote kyaĩ kũmumaalya Vetelo ĩtina wa Mboka ya Vasaka, nĩ kana asilĩlwe nĩ andũ. 5Kwoou Vetelo ekala avingĩwe yela, ĩndĩ nayo ĩkanisa yaendeea na kũmũvoyea kwa Ngai na kĩthing'ĩĩsyo.
Vetelo Ayumw'a Yela nĩ Mũlaĩka
6Ũtukũ ũla waĩ mbee wa mũthenya ũla Elote wavangĩte kumaalya Vetelo kũla kwĩ andũ, Vetelo nĩwakomete katĩ wa asikalĩ elĩ maimũsunga ovanĩtw'e na nyololo ilĩ, na vaĩ asikalĩ angĩ maũngeme mũomonĩ maendee na kũsunga yela yĩu. 7Kwa kĩthũlũmũko, mũlaĩka wa Mwĩai nĩwaumĩlile vau na kasũmba kau ka yela keethĩwa na kyeni. Nĩvo ĩndĩ mũlaĩka ũsu wakũnangie Vetelo mbaunĩ amũamũkya aimwĩa atĩĩ, “Ũkĩla mĩtũkĩ!” Ila nyololo nĩsyaumie mokonĩ ma Vetelo syavalũka nthĩ. 8Nĩvo ĩndĩ mũlaĩka wamwĩie atĩĩ, “Ĩkĩa ngũa na iatũ syaku.” Nake eeka ũu. Mũlaĩka nĩwasyokie amwĩa atĩĩ, “Ĩvw'ĩke ngũa yaku ya ĩũlũ na ũingatĩĩa.” 9Vetelo nĩwaumaalile nza amũatĩĩa, ĩndĩ ndamanyaa kana kĩla kyeekwa nĩ mũlaĩka nĩ kya w'o; oonaa ta woona woni. 10Nĩmaendie mavĩta vala kĩkundi kya mbee kya asikalĩ maũngeme maisunga, na vala kya kelĩ kyaũngeme na mavika mũomonĩ wa kyũma, ũla wavĩtĩlawa mũndũ aithi ndũanĩ. Maivika vo oou, mũomo ũsu nĩweevingũie ne w'o, namo maumaala na maendela nzĩanĩ ĩmwe, na o kwa mĩtũkĩ ũla mũlaĩka aa Vetelo aeka kũmwona.
11Nĩvo ĩndĩ Vetelo wavindũkie na asya atĩĩ, “Yu nĩnamanya vyũ kana Mwĩai nũtũmie mũlaĩka wake na ambonokya kuma ũtonyinĩ wa Elote, na kuma maũndũnĩ onthe ala Ayuti meeteelete mekĩke.”
12Vetelo amina kũmanya ũu, nĩwaendie mũsyĩ kwa Meli inyia wa Yoana, ũla kwa ĩsyĩtwa yĩngĩ weetawa Maliko. Kũu nĩkwoombanĩe andũ aingĩ maivoya. 13Vetelo nĩwakũnangie mũomonĩ wa mũvĩa, na mwĩĩtu mũthũkũmi weetawa Lota athi kũsisya nũũ. 14Yĩla wamanyie wasya ũsu kana nĩ wa Vetelo nĩwatanie mũno, o na vandũ va kũvingũa mũomo asemba asyoka nyũmba na atavya andũ kana Vetelo aũngeme mũvĩanĩ. 15Namo mamwĩa atĩĩ, “Wĩna ndũũka we!” Ĩndĩ we athetheesya mũno kwasya nĩw'o. Namo masya, “Ũsu nĩ mũlaĩka wake.”
16Ĩndĩ Vetelo aendeea tũ na kũkũnanga mũomo. Yĩla mavingũie mũomo na meethĩa nĩwe, nĩmaseng'ie mũno. 17Vetelo nĩwamonisye na kw'oko nĩmavindye na ĩndĩ amaelesya ũndũ Mwĩai wamumya yela. Nĩwasyokie amea atĩĩ, “Tavyai Yakovo na aĩkĩĩi ala angĩ maũndũ asu.” Nĩvo ĩndĩ Vetelo waumie vau athi vandũ vangĩ.
18Yĩla kwakyee, asikalĩ ala masungaa Vetelo nĩmeethĩiwe na kĩvũsavũsano kĩnene mũno, maikũlany'a aangie ata. 19Yĩla Elote watũmanie Vetelo amanthwe na alea kwoneka, nĩwasilĩthisye asikalĩ ala mamũsungaa na aumya mwĩao moawe.
Ĩtina wa ũndũ ũsu, Elote nĩwaumie Yutia na athi Kaisalea akekalange kw'o.
Kĩkw'ũ kya Mũsumbĩ Elote
20Mũsumbĩ Elote nĩwathatĩtw'e nĩ andũ ma Tile na ma Sitoni, namo mathi makamwone me nguthu. Mbee nĩmatumie ndũũ na Vilasitasi, nake aĩ mũsũvĩi wa nyũmba ĩla mũsumbĩ wakomaa, na ĩndĩ mathi kwa Elote mamũkũlya methĩwe na mũuo, nĩkwĩthĩwa nthĩ yoo yeethĩawa na wĩkwatyo wa kũkwata lĩu kuma nthĩ ĩla mũsumbĩ ũsu wasumbĩkĩte. 21Mũthenya ũmwe ũla watw'ĩtwe, mũsumbĩ Elote nĩwookie ekĩĩte ngũa syake sya kĩ-ũsumbĩ, ekala kĩvĩlanĩ kyake kya kĩ-ũsumbĩ, na aneena ndeto syake kwa andũ asu. 22Andũ asu nĩmasĩĩlĩlile mayasya atĩĩ, “Wasya ũsu nĩ wa ngai, ti wa mũndũ!” 23O vau kwa vau, nũndũ wa kwĩthĩwa Mũsumbĩ Elote ndaanenga Ngai ndaĩa, mũlaĩka wa Mwĩai nĩwamũeteie ũwau, na iinyũ syauma mwĩĩnĩ wake syamũya akw'a.
24Ĩndĩ ndeto ya Ngai nĩyaendeeie na kũnyaĩĩka kũndũ kwingĩ, na andũ aingĩ meetĩkĩla.
25Valanava na Saũlo mamina ũthũkũmi woo, nĩmaumie Yelũsalemu#12.25 nĩmaumie Yelũsalemu: Maandĩko amwe ma tene ma Ndeto ya Ngai maĩtye nĩmasyokie Yelũsalemu na maendany'a na Yoana, ũla kwa ĩsyĩtwa yĩngĩ weetawa Maliko.
Currently Selected:
Meko 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
Meko 12
12
Kũthĩnw'a Ĩngĩ kwa Ĩkanisa
1Ĩvindanĩ o yĩu, Mũsumbĩ Elote nĩwambĩĩie kũthĩny'a andũ ma ĩkanisa. 2Nĩwaumisye mwĩao Yakovo, mwana-a-inyia wa Yoana oawe na ũvyũ. 3Yĩla Elote woonie kana ũndũ ũsu nĩwendeesya Ayuti, nĩwasyokie akwata Vetelo o nake. Ũu weekĩkie ĩvindanĩ ya Mboka ya Mũkate ũte Mbota. 4#Kuma 12.1-27 Ĩtina wa kũmũkwata Vetelo, nĩwamũvingĩie yela na amwia asungwe nĩ ikundi inya sya asikalĩ ana kĩla kĩmwe. Kĩeleelo kya Elote kyaĩ kũmumaalya Vetelo ĩtina wa Mboka ya Vasaka, nĩ kana asilĩlwe nĩ andũ. 5Kwoou Vetelo ekala avingĩwe yela, ĩndĩ nayo ĩkanisa yaendeea na kũmũvoyea kwa Ngai na kĩthing'ĩĩsyo.
Vetelo Ayumw'a Yela nĩ Mũlaĩka
6Ũtukũ ũla waĩ mbee wa mũthenya ũla Elote wavangĩte kumaalya Vetelo kũla kwĩ andũ, Vetelo nĩwakomete katĩ wa asikalĩ elĩ maimũsunga ovanĩtw'e na nyololo ilĩ, na vaĩ asikalĩ angĩ maũngeme mũomonĩ maendee na kũsunga yela yĩu. 7Kwa kĩthũlũmũko, mũlaĩka wa Mwĩai nĩwaumĩlile vau na kasũmba kau ka yela keethĩwa na kyeni. Nĩvo ĩndĩ mũlaĩka ũsu wakũnangie Vetelo mbaunĩ amũamũkya aimwĩa atĩĩ, “Ũkĩla mĩtũkĩ!” Ila nyololo nĩsyaumie mokonĩ ma Vetelo syavalũka nthĩ. 8Nĩvo ĩndĩ mũlaĩka wamwĩie atĩĩ, “Ĩkĩa ngũa na iatũ syaku.” Nake eeka ũu. Mũlaĩka nĩwasyokie amwĩa atĩĩ, “Ĩvw'ĩke ngũa yaku ya ĩũlũ na ũingatĩĩa.” 9Vetelo nĩwaumaalile nza amũatĩĩa, ĩndĩ ndamanyaa kana kĩla kyeekwa nĩ mũlaĩka nĩ kya w'o; oonaa ta woona woni. 10Nĩmaendie mavĩta vala kĩkundi kya mbee kya asikalĩ maũngeme maisunga, na vala kya kelĩ kyaũngeme na mavika mũomonĩ wa kyũma, ũla wavĩtĩlawa mũndũ aithi ndũanĩ. Maivika vo oou, mũomo ũsu nĩweevingũie ne w'o, namo maumaala na maendela nzĩanĩ ĩmwe, na o kwa mĩtũkĩ ũla mũlaĩka aa Vetelo aeka kũmwona.
11Nĩvo ĩndĩ Vetelo wavindũkie na asya atĩĩ, “Yu nĩnamanya vyũ kana Mwĩai nũtũmie mũlaĩka wake na ambonokya kuma ũtonyinĩ wa Elote, na kuma maũndũnĩ onthe ala Ayuti meeteelete mekĩke.”
12Vetelo amina kũmanya ũu, nĩwaendie mũsyĩ kwa Meli inyia wa Yoana, ũla kwa ĩsyĩtwa yĩngĩ weetawa Maliko. Kũu nĩkwoombanĩe andũ aingĩ maivoya. 13Vetelo nĩwakũnangie mũomonĩ wa mũvĩa, na mwĩĩtu mũthũkũmi weetawa Lota athi kũsisya nũũ. 14Yĩla wamanyie wasya ũsu kana nĩ wa Vetelo nĩwatanie mũno, o na vandũ va kũvingũa mũomo asemba asyoka nyũmba na atavya andũ kana Vetelo aũngeme mũvĩanĩ. 15Namo mamwĩa atĩĩ, “Wĩna ndũũka we!” Ĩndĩ we athetheesya mũno kwasya nĩw'o. Namo masya, “Ũsu nĩ mũlaĩka wake.”
16Ĩndĩ Vetelo aendeea tũ na kũkũnanga mũomo. Yĩla mavingũie mũomo na meethĩa nĩwe, nĩmaseng'ie mũno. 17Vetelo nĩwamonisye na kw'oko nĩmavindye na ĩndĩ amaelesya ũndũ Mwĩai wamumya yela. Nĩwasyokie amea atĩĩ, “Tavyai Yakovo na aĩkĩĩi ala angĩ maũndũ asu.” Nĩvo ĩndĩ Vetelo waumie vau athi vandũ vangĩ.
18Yĩla kwakyee, asikalĩ ala masungaa Vetelo nĩmeethĩiwe na kĩvũsavũsano kĩnene mũno, maikũlany'a aangie ata. 19Yĩla Elote watũmanie Vetelo amanthwe na alea kwoneka, nĩwasilĩthisye asikalĩ ala mamũsungaa na aumya mwĩao moawe.
Ĩtina wa ũndũ ũsu, Elote nĩwaumie Yutia na athi Kaisalea akekalange kw'o.
Kĩkw'ũ kya Mũsumbĩ Elote
20Mũsumbĩ Elote nĩwathatĩtw'e nĩ andũ ma Tile na ma Sitoni, namo mathi makamwone me nguthu. Mbee nĩmatumie ndũũ na Vilasitasi, nake aĩ mũsũvĩi wa nyũmba ĩla mũsumbĩ wakomaa, na ĩndĩ mathi kwa Elote mamũkũlya methĩwe na mũuo, nĩkwĩthĩwa nthĩ yoo yeethĩawa na wĩkwatyo wa kũkwata lĩu kuma nthĩ ĩla mũsumbĩ ũsu wasumbĩkĩte. 21Mũthenya ũmwe ũla watw'ĩtwe, mũsumbĩ Elote nĩwookie ekĩĩte ngũa syake sya kĩ-ũsumbĩ, ekala kĩvĩlanĩ kyake kya kĩ-ũsumbĩ, na aneena ndeto syake kwa andũ asu. 22Andũ asu nĩmasĩĩlĩlile mayasya atĩĩ, “Wasya ũsu nĩ wa ngai, ti wa mũndũ!” 23O vau kwa vau, nũndũ wa kwĩthĩwa Mũsumbĩ Elote ndaanenga Ngai ndaĩa, mũlaĩka wa Mwĩai nĩwamũeteie ũwau, na iinyũ syauma mwĩĩnĩ wake syamũya akw'a.
24Ĩndĩ ndeto ya Ngai nĩyaendeeie na kũnyaĩĩka kũndũ kwingĩ, na andũ aingĩ meetĩkĩla.
25Valanava na Saũlo mamina ũthũkũmi woo, nĩmaumie Yelũsalemu#12.25 nĩmaumie Yelũsalemu: Maandĩko amwe ma tene ma Ndeto ya Ngai maĩtye nĩmasyokie Yelũsalemu na maendany'a na Yoana, ũla kwa ĩsyĩtwa yĩngĩ weetawa Maliko.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011