1Ako 16
16
Kumya Mũvothi kwondũ wa Aĩkĩĩi ala Angĩ
1 #
Alo 15.25-26
Yu ĩndĩ ekai tũsisye ũvoo wa kumya mũvothi kwondũ wa aĩkĩĩi ala angĩ. Nĩenda mwĩke o ũndũ natavisye makanisa ma Kalatia meke. 2Kĩla Wakyumwa, kĩla mũndũ nĩavathae kĩlungu kĩmwe kya mbesa syake, kwĩanana na ũndũ wĩany'a ũkwati na ayĩia nesa, nĩ kana vaikethĩwe na vata wa kumya nooka. 3Navika kũu, ngamanenga valũa andũ ala mwĩĩthĩwa mũnyuvĩte, na ngĩmatũma matwae mũvothi wenyu Yelũsalemu. 4Ethĩwa o nakwa ngeethĩwa naĩlĩte kũthi, ngaendany'a namo.
Mĩvango ya Vaũlo
5 #
Meko 19.21
Ngamũthokea ĩtina wa kwĩsĩla Mesendonia, nũndũ nĩnĩvangĩte kwĩsĩla kũu. 6Nĩvatonyeka ngekala nenyu vandũ va ĩvinda yĩana ũndũ mũna, kana o na ngekala ĩvinda ya mbevo yonthe, na ĩndĩ mũyĩthĩwa mũtonya kũndetheesya kyalonĩ kyakwa o kũla nĩĩthĩwa nĩendete. 7Ndikwenda kwonana nenyu yu o mbĩtũkĩte; nĩĩkwatya kwĩkalanga nenyu kwa ĩvinda ĩasanga Mwĩai ambĩtĩkĩlya.
8 #
Ali 23.15-21; Kũt 16.9-11 #Meko 19.8-10 Ĩndĩ nĩamba kwĩkala kũũ Eveso nginya mũthenya wa Vendekosito. 9Nĩ na mwanya mũnene wa ũthũkũmi mũseo nĩvingũĩwe, o na kau kwĩ na nthũ mbingĩ.
10 #
1Ako 4.17
Timotheo avika kũu, sisyai mũmũthokye nesa katĩ wenyu, nũndũ etethya wĩa wa Mwĩai o takwa. 11Vaikatate kwĩthĩwa mũndũ o na ũmwe ũmũvũthya. Mũtetheesyei atonye kũendeea na kyalo kyake kwa nzĩa ya mũuo, nĩ kana asyoke kũla nĩĩ, nũndũ nĩnĩmweteelete vamwe na ana-a-asa ala angĩ.
12Naw'o ũvoo wa mwana-a-asa Avolo, nyie nĩnamũthing'ĩĩisye mũno amũthokee e na ana-a-asa ala angĩ, ĩndĩ ndekwenda#16.12 ndekwenda: Kana ti kwenda kwa Ngai oke yu kũka yu. Akooka akwata mwanya.
Ndeto sya Vaũlo sya Mũthya
13Ĩkalaai mwĩsũvĩĩte, ũngamai na ũlũmu mũĩkĩĩonĩ, ĩthĩwai mwĩ ngũmbaũ na mwĩ na vinya. 14Ũndũ w'onthe ũla mũkwĩka wĩkei na wendo.
15 #
1Ako 1.16
Nĩmwĩsĩ kana Sitevana na mũsyĩ wake nĩmo maĩ ma mbee kũtw'ĩka Aklĩsto nthĩ ya Akaia, na nĩmeyumĩtye vyũ kũmathũkũma aĩkĩĩi. Nĩngũmwĩsũva mbaitũ, 16mwĩthĩwe mwĩ ewi kwa andũ ma mũthemba ũsu o na kwa ala angĩ matethasya wĩa ũsu, na kũthũkũma vamwe namo.
17Nĩngũtana nũndũ wa kũka kwa Sitevana, Volitũnatũsi na Akaikũsi; nĩkwĩthĩwa nĩmausũisye mwanya ũla ngwĩw'aa wĩvo yĩla mũteĩ vo, 18na nĩmambuũkisye ngoo o ũndũ mamũvuũkĩtye inyw'ĩ.
19 #
Meko 18.2
Makanisa ma kũũ nthĩ ya Asia nĩmamũkethya. Akwila na Vilisila o vamwe na aĩkĩĩi ala mombanĩaa nyũmba kwoo nĩmamũkethya mũno nthĩnĩ wa Mwĩai. 20Ana-a-asa onthe kũũ nĩmamũkethya.
Kethany'ai ene na ngethi ya wendo. 21Nĩnamũkethya nyie Vaũlo, ngĩandĩka na kw'oko kwakwa mwene.
22Ethĩwa ve mũndũ ũtamwendete Mwĩai, nĩaumanĩwe.
Malanatha, ũalyũlo wayo nĩ, ũka Mwĩai!
23Mumo wa Mwĩai waitũ Yesũ Klĩsto nĩwĩthĩwe nenyu.
24Wendo wakwa nĩwĩthĩwe nenyu inyw'onthe nthĩnĩ wa Klĩsto Yesũ. Ameni.
Currently Selected:
1Ako 16: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
