1Ako 14

Ũmanyĩsyo ũngĩ ĩũlũ wa Mĩthĩnzĩo ya Veva Mũtheu

1Tatai mũno mwĩthĩwe na wendo, na mũyĩthĩwa na wendi wa kũkwata mĩthĩnzĩo ya Veva Mũtheu, na mũno mũthĩnzĩo wa kwathana. 2Mũndũ ũla ũneena na kĩthyomo kĩeni ndethĩawa aineena na andũ, ĩndĩ ethĩawa aineena na Ngai nũndũ vai mũndũ wĩthĩawa aimũelewa. Mũndũ ũsu kwa ũtonyi wa Veva Mũtheu, aneenaa maũndũ matesĩwe. 3Ĩndĩ nake mũndũ ũla wathanaa ethĩawa aineena na andũ amatethye, amathangaasye na amakiakisye. 4Mũndũ ũla ũneenaa na kĩthyomo kĩeni aunĩkaa o we mwene, ĩndĩ ũla wathanaa aunaa ĩkanisa yonthe.

5Nyie nenda kethĩwa inyw'onthe nĩmũneena na ithyomo ngeni, ĩndĩ nenda mũno mbee kethĩwa nĩmwĩthĩwa na mũthĩnzĩo wa kwathana. Mũndũ ũla wathanaa e vata mũno kwĩ mũndũ ũla ũneenaa na ithyomo ngeni, ate o ethĩwa ve mũndũ wa kũalyũla ithyomo isu nĩ kana ĩkanisa yĩtonye kũunĩka. 6Kwoou mbaitũ, ethĩwa nyie ngooka kwenyu na ngĩneena nenyu na ithyomo ngeni, ngamũuna na kyaũ ethĩwa ndiũmũetee ũvuany'o mũna kuma kwa Ngai, kana wathani, kana o ũmanyĩsyo?

7Kethĩwa mĩio ya mbathi ĩte thayũ ta mũtũlilũ kana ngitaa nene ndyumasya mawasya me kũeleeka, mũndũ atonya ata kũmanya wathi ũla ũkwinwa? 8Naw'o soo wa kaũ ũkavuvwa wasya ũtekũeleeka, nũũ wĩyũmbanĩsya kaũ? 9Ũu now'o kũilyĩ kwenyu: Ethĩwa inyw'ĩ nthĩnĩ wa kũneena na ithyomo ngeni, mwĩneena kĩndũ kĩtamanyĩka, mũndũ atonya ata kũmanya kĩla kĩũwetwa? Ndeto syenyu iendaa na kĩseve. 10Kũũ ĩũlũ wa nthĩ kwĩ ithyomo sya mĩthemba mingĩ mũno, ĩndĩ vai kĩmwe kĩthĩawa kĩte ũndũ kĩũweta. 11Ĩndĩ ethĩwa ndiũmanya kĩthyomo kĩla kĩũneenwa, mũndũ ũla ũkũneena ethĩawa e mũeni kwakwa, nakwa nĩthĩawa nĩ mũeni kwake. 12Nũndũ inyw'ĩ mwĩenda mũno kwĩthĩwa na mĩthĩnzĩo ya Veva, tatai mũno mwĩthĩwe na mĩthĩnzĩo ĩla ĩtonya kũuna ĩkanisa.

13Kwoou mũndũ ũla ũneenaa na kĩthyomo kĩeni, nĩavoye Ngai amũnenge mũthĩnzĩo wa kũalyũla kĩla waneena. 14Ethĩwa nĩvoya na kĩthyomo kĩeni, veva wakwa nĩw'o ũũvoya, ĩndĩ kĩlĩko kyakwa kĩyĩthĩawa na wĩa vo. 15Nĩĩka ata ĩndĩ? Nĩvoya na veva wakwa na ngĩvoya na kĩlĩko kyakwa o nakyo; nĩina na veva wakwa na ngina na kĩlĩko kyakwa o nakyo. 16Ethĩwa wĩmũkatha Ngai nthĩnĩ wa veva waku w'oka, mũndũ ũtemũmanyĩsye akasũngĩa ata asye, “Ameni” kwa mboya ĩsu ya kũtũnga mũvea atanamanya kĩla ũũneenaa? 17Mboya yaku ya kũtũnga mũvea nĩtonya kwĩthĩwa yĩ nzeo mũno, ĩndĩ mũndũ ũsu ũngĩ ndanaunĩka nĩyo.

18Nĩngũtũngĩa Ngai mũvea nĩkwĩthĩwa nyie nĩneenaa na ithyomo ngeni kũvĩtũka inyw'ĩ inyw'onthe. 19Ĩndĩ nthĩnĩ wa ũthaithi ĩkanisanĩ, nĩ kavaa kwakwa nganeena ndeto itano itonya kũeleeka nĩ kana nĩmanyĩsye andũ, kũte kũneena ndeto ngili ĩkũmi ngĩneena na kĩthyomo kĩeni.

20Mbaitũ, mũikethĩwe mwĩ syana mosũanĩonĩ menyu; maũndũnĩ ma naĩ ĩthĩwai tũũkenge, ĩndĩ maũndũnĩ ma kũsũanĩa ĩthĩwai mwĩ andũ aima. 21#Ĩsa 28.11-12 Maandĩkonĩ Matheu Mwĩai aĩtye, “Ngatũmĩa andũ meũneena ithyomo ngeni kũneena na andũ aa. Nganeena kwĩsĩla kanyw'anĩ wa andũ aeni ĩndĩ o vamwe na ũu, andũ aa makwa maikambĩthukĩĩsya.” 22Kwoou mũthĩnzĩo wa kũneena na ithyomo ngeni nĩ wonany'o kwa ala mate aĩkĩĩi na ti kwa aĩkĩĩi, naw'o mũthĩnzĩo wa kwathana nĩ wonany'o kwa aĩkĩĩi, ti kwa ala mate aĩkĩĩi.

23Ethĩwa ĩkanisa yonthe yĩkoombana, na andũ onthe mayambĩĩa kũneena na ithyomo ngeni, namo andũ mate ma ĩkanisa kana mate aĩkĩĩi mailika, nĩkũlya, maikasya kana mwĩ na ndũũka? 24Ĩndĩ ethĩwa andũ onthe nĩmekwathana, na mũndũ ũte mũĩkĩĩi kana mũndũ ũte wa ĩkanisa ailika nthĩnĩ, akamanya naĩ syake kwĩsĩla kwenyu inyw'onthe, na akasilĩlwa nĩ kyonthe kĩla wĩĩw'a. 25Syĩmbithĩ sya ngoo yake ikavuanw'a, nake akatulya ndu na kũthaitha Ngai ayasya atĩĩ, “Kwa w'o Ngai e vaa katĩ wenyu!”

Kwĩthĩwa na Mũvango Ũthaithinĩ

26Twĩasya ata ĩndĩ mbaitũ? Yĩla mwakomana mũthaithe, mũndũ ũmwe nũtonya kwĩthĩwa na wathi, ũngĩ na ũmanyĩsyo, ũngĩ na ũvuany'o kuma kwa Ngai, ũngĩ kũneena na kĩthyomo kĩeni, na ũngĩ akĩalyũla kĩla kĩũneenwa. Maũndũ onthe nĩmekwe kwondũ wa kũuna ĩkanisa. 27Ethĩwa ve andũ mekũneena na ithyomo ngeni, nĩvaneene o andũ elĩ kana mayingĩva atatũ, na maineena kwa kumanĩsya; o ta ũu nĩvethĩwe mũndũ ũngĩ wa kũalyũla kĩla kĩũneenwa. 28Ĩndĩ ethĩwa vai mũndũ ũtonya kũalyũla kĩla kĩũneenwa, ũla ũkũneena na kĩthyomo ĩkomanonĩ yĩu nĩavindye, na aineena na ngoo yake mwene na kũneena na Ngai. 29Namo andũ ala manengetwe kwathana, elĩ kana atatũ nĩmathane, na ala angĩ mayĩthĩwa methukĩĩsye kĩla kĩũneenwa. 30Ethĩwa mũndũ ũngĩ ũilyĩ nthĩ vau nĩwavuanĩw'a ũndũ, ũla ũkũneenaa nĩambe kũvindya. 31Inyw'onthe nĩmũtonya kwathana ũmwe kwa ũmwe, nĩ kana kĩla ũmwe emanyĩsye ũndũ na aithangaaw'a. 32Mũthĩnzĩo wa kwathana ũsumbĩkĩtwe nĩ ũla wĩ naw'o, 33nĩkwĩthĩwa Ngai ti Ngai wa kĩthokoany'o, ĩndĩ nĩ wa mũuo.

O tondũ kwĩthĩawa makanisanĩ onthe ma aĩkĩĩi, 34aka nĩmekalae mavindĩtye me makanisanĩ. Mayĩtĩkĩlĩtw'e kũneena; maĩlĩte kwĩkala menyivĩtye o tondũ Mĩao ya Ayuti yaĩtye. 35Ethĩwa ve ũndũ mekwenda kũmanya ĩũlũ waw'o, nĩmakũlye aamũũme me mũsyĩ. Nĩ ũndũ wĩ nthoni mũndũ mũka kũneena ĩkanisanĩ.

36Ko mũkwona ndeto ya Ngai ta yaumanie nenyu? Kana ko inyw'ĩ yavikĩie mwĩ inyw'oka? 37Mũndũ ũla ũkũsũanĩa kana nĩ mwathani, kana ũkũsũanĩa e na mũthĩnzĩo wa Veva, nĩwaĩlĩte kwĩtĩkĩla kana maũndũ aa ngũmũandĩkĩa nĩ mwĩao kuma kwa Mwĩai. 38Ethĩwa ve mũndũ ũtekwĩtĩkĩlana na ndeto ii ndakethukĩĩw'e.

39Kwoou mbaitũ, ĩthĩwai mũyenda mũno kwathana, na mũikavatane kũneena na ithyomo ngeni. 40Ĩndĩ maũndũ onthe nĩmekawe kwa nzĩa nzeo na me na mũvango.

Currently Selected:

1Ako 14: KAMBA

Highlight

Copy

Compare