ALOMI 1
1
Ngethi
1 #
Meko 9.15; 13.2; Aka 1.15. Vaulo, ngombo ya Yesũ Klĩsto, wetiwe ethĩwe mũtũmwa, ũvathanĩtw’e kwondũ wa ũvoo mũseo wa Ngai, 2#Tito 1.2; Alo 16.25,26.ũla Ngai wambie kwatha tene na athani make nthĩnĩ wa maandĩko matheu, 3#Alo 9.5; 2 Sam 7.12; Mt 22.42; 2 Tim 2.8.ũvoo wa Mwana wake, ũla wasyaiwe wa ũsyao wa Ndaviti kwondũ wa mwĩĩ, 4#Meko 13.33.ũla watavaniw’e kwĩthĩwa nĩ Mwana wa Ngai na vinya, kwondũ wa veva wa ũtheu, nĩ kũthayũũkw’a kuma kwa akw’ũ; Yesũ Klĩsto Mwĩaĩi waitũ, 5#Meko 26.16–18; Alo 15.18; Aka 2.7,9.ũla kwondũ wake twosete mumo na ũtũmwa, nĩ kana andũ ma mbaĩ syonthe matw’ĩke ewi wĩtĩkĩlonĩ, kwondũ wa syĩtwa yake; 6o nenyu katĩ wasyo, nĩmwĩtĩtwe mwĩthĩwe ma Yesũ Klĩsto: 7#1 Ako 1.2; 2 Ako 1.1; Aev 1.1; Mot 6.25,26.valũa ũũ wakwa ũmavikĩe onthe ala me Lomi, endwa ma Ngai, ala meetiwe methĩwe atheu: Mumo nĩwĩthĩwe kwenyu na mũuo kuma kwa Ngai Asa waitũ na kwa Mwĩaĩi Yesũ Klĩsto.
Kwenda kwa Vaulo kwa kũthi Lomi
8 #
Alo 16.19; 1 Ath 1.8. Mbee, nĩmũtũngĩa Ngai mũvea nthĩnĩ wa Yesũ Klĩsto ũndũ wenyu inyw’onthe nũndũ mũĩkĩĩo wenyu nũtavanaw’a nthĩ yonthe. 9#Avi 1.8; Aev 1.16.Nũndũ Ngai nĩwe ngũsĩ yakwa, ũla nĩthaithaa vevanĩ wakwa ũvoonĩ mũseo wa Mwana wake, ũndũ nĩmũwetaa vate kũeka, mavinda onthe mboyanĩ syakwa 10#Meko 19.21; Alo 15.23,32.nĩngũvoya nũke kwenyu mĩthenya ĩno Ngai enda, aaĩlya kyalo kyakwa. 11#Meko 28.31.Nũndũ nĩ na mea ma kũmwona, kana nĩmũolele mũthĩnzĩo ũmwe wa veva, nĩ kana mũlũlũmĩlw’e; 12#2 Vet 1.1.naw’o, nĩ kana nyie vamwe nenyu tũkiakian’ye, kĩla ũmwe wa ithyĩ ũndũ wa mũĩkĩĩo wa ũla ũngĩ, wenyu na wakwa. 13#Yoa 15.16.Ndikwenda mũlee ũmanya, ana‐a‐asa makwa, kana mavinda maingĩ nendaa kũka kwenyu (nakwa nĩnziĩĩĩtwe kũvika o na yu), nĩ kana nĩtonye kwĩthĩwa na ũsyao kwenyu nenyu, o ũndũ nĩ naw’o kwa Andũ‐ma‐mbaĩ‐ila‐ingĩ. 14Nĩ na thiĩ na Akiliki na ala mate Akiliki, kwa ala me na ũmanyi na kwa ala atumanu. 15Kwondũ wa ũu nĩnĩyũmbanĩtye kũtavan’ya ũvoo mũseo kwa inyw’i ala mwĩ Lomi, o ũndũ ndonya.
Ũndũ ũvoo mũseo ũilyĩ
16 #
Sav 119.46; 1 Ako 1.18,24; Meko 13.46. Nũndũ ndiwĩw’ĩaa nthoni ũla ũvoo mũseo: nũndũ nĩ vinya wa Ngai ũla ũtangĩĩaa o ũla wĩtĩkĩlaa; mbee nĩ Mũyuti, na ĩtina Mũkiliki. 17#Alo 3.21,22; Ava 2.4.Nũndũ ũlũngalu wa Ngai nĩwumĩlĩtw’e vo, kuma kũĩkĩĩa kũendeea na kũĩkĩĩa: tondũ kũandĩkĩtwe, Ĩndĩ ũla mũlũngalu akekala thayũ kwondũ wa kũĩkĩĩa.
Wathavu wa Andũ‐ma‐mbaĩ‐ingĩ
18 #
Yoa 16.9; 2 Ath 2.12. Nũndũ ũthatu wa Ngai nĩwumĩlĩtw’e kuma ĩtunĩ ĩũlũ wa kĩla ũndũ ũte wa kũmũkĩa Ngai, na kĩla ũndũ ũte ũlũngalu wa andũ, ala masiĩĩaa ũla w’o ũndũnĩ ũte ũlũngalu; 19#Meko 14.15–17; 17.24–28.nĩkwĩthĩwa maũndũ ma Ngai ala mamanyĩkaa nĩ monan’ye nthĩnĩ woo; nũndũ Ngai nĩwamonisye. 20#Sav 19.1; Yovu 12.7–9.Nũndũ syĩndũ syake ila itonekaa kuma nthĩ yoombwa nikwoneka nesa, ikĩmanyĩka ũndũ wa ila syoombiwe, nasyo nĩ vinya wake wa tene na tene na Ũ Ngai wake; nĩ kana methĩwe mate na wĩmilo: 21#Aev 4.18; Ũvu 14.7.nĩkwĩthĩwa, yĩla mamwĩsi Ngai, matyaamũtaĩa ta nĩwe Ngai, o na matyaamũtũngĩa mũvea; ĩndĩ matw’ika ma mana mosũanĩonĩ moo, na ngoo syoo ndumanu syeekĩwa kĩvindu. 22#Yel 10.14; 1 Ako 1.20.Kwĩyĩta amanyi, nĩmatw’ĩkĩte ndia, 23#Sav 106.20; Kũt 4.15–19.na makũan’ya ũtheu mũtisu wa Ngai ũla ũtanangĩkaa na mũvw’anano wa mũndũ ũla wanangĩkaa, na wa syĩndũ ila iũlũkaa, na wa nyamũ ila syĩ na maũũ ana, na tũsamũ tũla tũtambũkaa.
24 #
Meko 14.16. Kwondũ wa ũu Ngai amalekya mĩmeonĩ mĩthũku ya ngoo syoo kũatĩĩa ũvuku, nĩ kana mĩĩ yoo mamyanangĩe ndaĩa ene kwa ene: 25#Alo 9.5.nũndũ nĩmakũanĩtye ũla w’o wa Ngai na ũvũngũ, na kũthaitha na kũthũkũma kyũmbe vandũ va Mũmbi, ũla ũkathawa tene na tene. Ameni.
26Kwondũ wa ũu Ngai amalekya mĩmeonĩ mĩthũku ĩla yĩ nthoni: nĩkwĩthĩwa o na aka moo makũanisye mũtuo wa mũsyawa na mũtuo ũngĩ ũtosana na ũsu: 27#Ali 18.22; 20.13; 1 Ako 6.9.na aũme moo no ta ũu, maitia ũndũ ũla kwĩkawa kwa aka, makana mĩmeonĩ yoo ene kwa ene, aũme kwa aũme maĩĩka maũndũ mataĩle, na makyona nthĩnĩ woo ĩtuvi ya kũvĩtya kwoo yĩla yĩmaĩle.
28Na o tondũ maleile kwĩthĩwa na Ngai ũmanyinĩ woo, Ngai amalekya methĩwe na kĩlĩko kĩtaĩle nongi, meke maũndũ asu mataĩle; 29makyusũwa nĩ ũla ũte ũlũngalu w’onthe, na ũthũku, na ĩtomo, na wai; makyusũwa nĩ kĩwĩu, na ũaani, na ĩteta, na ũkenganĩ, na ũng’endu; aneeni ma kĩwe; 30ailĩanĩli, ameni ma Ngai, avũthya, etaĩi, ekathĩĩi, ambĩlĩlya ma maũndũ mathe, matamew’aa ala mamasyaie, 31mate na ũmanyi, anangi ma ũtianĩo, mate na wendo waĩle, mate na tei: 32nao, o na mesĩ ũtw’ĩo wa Ngai, kana ala mekaa maũndũ ta asu nĩmaĩlwe nĩ kĩkw’ũ, nĩmekaa maũndũ asu, na ti ũu w’oka, ĩndĩ nĩmew’anaa na ala mamekaa.
Currently Selected:
ALOMI 1: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
