MEKO MA ATŨMWA 20
20
Vaulo e Masetonia, Ũkiliki, na Teloa
1Na kĩtuu kyu kyakilya, Vaulo amatũmana ala amanyĩw’a na amataa, eeaanĩa nao, na ĩndĩ athi Masetonia. 2Nake avĩtĩla ngalĩ isu, na ũmanenga ũtao mwingĩ, athĩ Ũkiliki. 3Na ekalĩte kw’o myei ĩtatũ, Ayuti mamũsamĩa mamũae akilĩlye ũthi na ngalawa avike Silia, nake atw’a kũalũka avĩtĩle Masetonia. 4#Meko 17.10; 19.29; Alo 16.21.Na andũ aa nĩmo maendanisye nake kũvika Asia, Sovatele mũndũ wa Velia, mwana wa Vilo; na ma Athesalonika, Alisitaliko na Sekundo; na Kaio mũndũ wa Ndelive, na Timotheo; na ma Asia, Tikiko na Telovimo. 5#Meko 16.8.Ĩndĩ andũ asu maĩ manathi mbee, nao matweteela Teloa. 6Naitũ twaumie Vilivi na ngalawa, ĩtina wa mĩthenya ya kĩmũtũ kĩte ĩlawa, na mĩthenya ĩtano yathela twamavikĩa ala maĩ Teloa; na twekala kw’o mĩthenya mũonza.
Eutikusi
7 #
Meko 2.42. Na mũthenya wa mbee wa kyumwa, twombanĩte vamwe kũtila kĩmũtũ, Vaulo aneena nao, akyenda ũthi ũnĩ ũsu: na aasavya ũtavan’yo wake kũvika ũtukũ katĩ. 8Na kwaĩ mataa maingĩ nyũmbanĩ ya ĩũlũ ĩla twoombanĩte. 9Na mũndũ ũmwe, mwanake wetawa Eutikusi, ailyĩ mbũthinĩ, akwatwa nĩ too mũno; na Vaulo aiendeea mũno na kũtavan’ya kwake, na nĩkwĩthĩwa ausũĩtwe nĩ too wake avalũka kuma nyũmba ya katatũ kũvika nthĩ, na ooswa e mũkw’ũ. 10#1 Asu 17.21.Na Vaulo atheea, na amũmamĩa, na amũvĩvĩtĩĩsya, asya, Mũikekĩe kĩtuu; nũndũ thayũ wake wĩ o nthĩnĩ wake. 11Na ambata ĩũlũ, na atila kĩla kĩmũtũ, na aya, na aneena nao ĩvinda ĩasa, o na kũvika kũikya, na ĩndĩ athi. 12Na mamũete ũla mwanake e thayũ, na makiakiw’a ũndũ ũtee ũnini.
Kyalo kya Mileto
13Ĩndĩ ithyĩ, twambie ũthi mbee na ngalawa, twakũsya tũende Asoso, navo twenda ũmũlikya Vaulo: nũndũ nĩw’o watwie, akyenda e we mwene ũthi na nyaĩĩ. 14Na twavika Asoso, akomana naitũ, na twamũlikya ngalawanĩ, na twathi Mitilene. 15Na twakũsya kw’o, na mũthenya wa kelĩ twavika vakuvĩ na Kiosi; na mũthenya wa katatũ twavika Samo; na mũthenya wa kana twavika Mileto. 16#Meko 18.21.Nũndũ Vaulo atw’ĩte kũvĩta Eveso, nĩ kana ndakekale Asia; nũndũ nĩwekalaatĩte, ethĩwa ũu nũtonyeka, we ethĩwe Yelusaleme mũthenya wa Vendekosito.
Ndeto sya mũtaanĩsyo sya Vaulo kwa atumĩa ma Eveso
17Na atũma andũ kuma Mileto maende Eveso kũmeta atumĩa ma ĩkanisa moke kwake. 18#Meko 18.19; 19.10.Nao mooka, amea,
Inyw’ĩ ene nĩmwĩsĩ, kuma mũthenya ũla nambie ũkinya nthĩ ĩno ya Asia, ũndũ nekalĩte nenyu ĩvinda yĩu yonthe, 19#Meko 20.3.ngĩmũthũkũma Mwĩaĩi na wĩnyivyo w’onthe wa ngoo, na methoi, na monyamao ala mangwatie kwa kũsyimwa nĩ Ayuti; 20ũndũ ndaatundua kũmũtavya inyw’ĩ ndeto o na yĩva ĩmwaĩle, na ngĩmũmanyĩĩsya andũnĩ, nyũmba na nyũmba, 21ngĩkũsĩĩa kwa Ayuti na Akiliki nao, ualyũlo wa ngoo ũmwelekele Ngai, na mũĩkĩĩo ũmwelekele Mwĩaĩi waitũ Yesũ Klĩsto. 22#Meko 19.21.Na yu, sisyai, nĩngũthi Yelusaleme nĩ mwove vevanĩ, ndesĩ maũndũ ala mengwatĩa kw’o: 23#Meko 9.16; 21.4,11.ate o Veva Mũtheu kũngũsĩĩa ndũanĩ syonthe, aiasya kana syĩndũ sya kwovwa nasyo na monyamao nimbeteele. 24#Meko 21.13.Ĩndĩ ndiũtala thayũ wakwa ta kĩndũ kwakwa, nĩ kana nĩtonye kwĩanĩsya mũendo wakwa, na ũthũkũmi ũla noosie kwa Mwĩaĩi Yesũ, kũkũsĩĩa ũla ũvoo mũseo wa mumo wa Ngai. 25Na yu, sisyai, nĩnĩsĩ kana inyw’onthe, ala nangangĩte katĩ wenyu ngĩtavan’ya ũsumbĩ wa Ngai, mũikambona ĩngĩ ũthyũ wakwa. 26#Meko 18.6.Kwondũ wa ũu nĩmũkũsĩĩa ũmũnthĩ, kana ndikakũlw’a nyie nthakame ya mũndũ o na wĩva. 27Nũndũ ndyaatundua kũmũtavya inyw’ĩ ũtw’ĩo w’onthe wa Ngai. 28#Sav 74.2; 1 Tim 4.16; 1 Vet 5.2.Ĩsũvĩei inyw’ĩ ene, na mũisũvĩa ĩĩthya yonthe yĩla Veva Mũtheu ũmũtw’ĩte inyw’ĩ mwĩthĩwe asyaĩĩsya nĩ kana mũĩthye ĩkanisa ya Mwĩaĩi yĩla ũthooete na nthakame yake mwene. 29#Mt 7.15; 10.16; Yoa 10.12.Nĩnĩsĩ kana ĩtina wa kũthi kwakwa nzũi mbai ikalika katĩ wenyu, iteũyĩw’ĩa yĩla ĩĩthya tei; 30#1 Yoa 2.19; Aka 4.17.na andũ aingĩ makookĩla kuma katĩ wenyu, makĩneena ndeto sya ngũlũ, maimakusya amanyĩw’a mamaatĩĩe mo. 31#Mko 13.35,37; 1 Ath 2.11.Kwondũ wa ũũ syaĩĩsyai, mũkĩlilikana kana ĩvinda ya myaka ĩtatũ ndyaaeka kũmũtaa kĩla mũndũ na kwĩtĩkya methoi mũthenya na ũtukũ. 32#Kũt 33.3.Na yu nĩmũnengane kwa Ngai, na kwa ndeto ya mumo wake, ĩla ĩtonya kũmwaka, na kũmũnenga inyw’ĩ ũtiĩwa katĩ wa onthe ala mavathĩwe Ngai. 33#Mt 10.8; 1 Ako 9.12; 1 Sam 12.3.Ndyaawĩw’ĩa ĩtomo vetha wa mũndũ o na wĩva, kana thaavu, kana ngũa. 34#Meko 18.3; 1 Ako 4.12; 1 Ath 2.9.Inyw’ĩ ene nĩmwĩsĩ kana moko aa makwa matethisye wĩa kwondũ wa mavata makwa mwene na ma ala maĩ nakwa. 35Maũndũnĩ onthe namũnengie ngelekan’yo, kana nĩmwaĩlwe nĩ ũtethya o ũu, kũmatethya ala onzu, na kũlilikana ndeto sya Mwĩaĩi Yesũ, ũndũ we mwene waisye, Kwĩ mũyo kũnengane kwĩ kwosa.
36 #
Meko 21.5. Na aneena ũu, atulya ndu na avoya vamwe namo onthe. 37#Meko 21.6; Alo 16.16; 1 Vet 5.14.Na onthe maĩa mũno, na mamũvalũkĩla Vaulo ngingonĩ na mamũmumunya, 38#Meko 20.25.makĩmaka mũno nũndũ wa ndeto ĩla waneenie, kana maikamwona ũthyũ wake ĩngĩ. Na mamumaasya mamũvikya ngalawanĩ.
Currently Selected:
MEKO MA ATŨMWA 20: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
