MEKO MA ATŨMWA 21
21
Kuma Mileto kũthi Tile
1Na kweethĩwa twamina kũtaanĩsya nao na twakũsya na ngalawa, twathi tũlũngalĩte twavika Kosi, na ũnĩ ũsu twavika Lote, na kuma vau twathi Vatala: 2na twoona ngalawa ĩnĩkũinga ĩvike Voenike twamĩlika, na twakũsya. 3Na twoona kĩthama kya Kuvolo, twakĩtia ngalĩ ya kw’oko kwa aka, twathi Silia, na twaumĩa Tile; nũndũ ngalawa ĩsu yaumĩw’e mĩio yayo vo. 4#Meko 11.12; 20.23.Na twoona ala amanyĩw’a, twekala vo mĩthenya mũonza: na asu mamũtavya Vaulo me nthĩni wa Veva Mũtheu, kana ndakakinye Yelusaleme. 5#Meko 20.36.Na kweethĩwa tweanĩsya mĩthenya yaitũ twookĩla twathi; namo onthe, vamwe na aka moo na syana syoo, matumaasya matũvikya ũtee wa ndũa: na twatulya ndu ũtee wa ũkanga, twavoya, na twatianĩa ũvoo; 6na twavota ngalawanĩ, nao maalũka kwoo.
Kũthi Kaisalea
7Na twamina mũendo ũsu wa ngalawa kuma Tile, twavika Vetolemai; na twakethya ana‐a‐asa, twekala nao mũthenya ũmwe. 8#Meko 8.40.Na ũnĩ ũsu twathi, na twavika Kaisalea: na twavota nyũmbanĩ ya Vilivu ũla mũtavan’ya wa ũvoo mũseo, ũla waĩ ũmwe wa ala mũonza, twekala kwake. 9#Meko 2.17.Na mũndũ ũsu aĩ na eĩtu ana atheu, ala mathanaa. 10#Meko 11.28.Na tũkĩkala vo mĩthenya ĩmwe, kwatheeie mwathani ũmwe kuma Yutia, wetawa Akavo. 11#Meko 20.23.Nake ooka vala tũĩ, oosa mũkwa wa Vaulo eeyova e we mwene maũũ na moko, na asya, Ũũ nĩw’o ũnũkwasya Veva Mũtheu, Ayuti ala me Yelusaleme makoova mũndũ ũla mwene wa mũkwa ũũ ta ũu, na makamũnengane mokonĩ ma Andũ‐ma‐mbaĩ‐ingĩ. 12#Mt 16.22.Na tweew’a maũndũ asu, ithyĩ o na andũ ma vandũ vau, twamwĩsũva ndakambate Yelusaleme. 13#Meko 20.24.Na nĩvo Vaulo wasũngĩie, Mwĩĩka ata, mũkĩĩa na ũndũla ngoo yakwa? Nũndũ nyie nĩnĩyũmbanĩtye, ti kwovwa kw’oka, o na kũaĩwa Yelusaleme kwondũ wa syĩtwa ya Mwĩaĩi Yesu. 14#Mt 26.39; Yoa 21.18.Na alea kũtwĩw’a, twamũeka, tũiasya, Kwenda kwa Mwĩaĩi nĩkwĩkwe.
Kũthi Yelusaleme
15Na ĩtina wa mĩthenya ĩsu twoomban’ya mĩio yaitũ, na twakũsya twambata Yelusaleme. 16Na amwe ma amanyĩw’a ma ndũa ya Kaisalea mathi vamwe naitũ, me na Masoni mũndũ wa Kuvolo, mũmanyĩw’a wa tene, nake nĩwe twĩĩkalaa kwake.
Vaulo aitata kwĩw’ana na Aklĩsto ma Ayuti
17Na twavika Yelusaleme, ala ana‐a‐asa matwosa na mũyo. 18#Meko 15.13; Aka 1.19.Na mũthenya ũla waatĩĩe ũsu, Vaulo aenda naitũ kwa Yakovo; na atumĩa onthe nĩ vo maĩ. 19Na amakethya, amatavya maũndũ onthe, ũmwe na ũmwe, ala Ngai wĩkĩte kwondũ wa ũthũkũmi wake katĩ wa Andũ‐ma‐mbaĩ‐ingĩ. 20#Meko 15.1.Namo, meew’a mamũtaĩa Ngai; na mamwĩa, Nũkwona, mwana‐a‐asa, kana nĩ vo maĩ ngili mbingĩ ma Ayuti ala metĩkĩlĩte; namo onthe me na kĩwĩu ũndũ wa ĩla mĩao: 21#Meko 16.3; Alo 10.4.namo nĩmatavĩtw’e ũvoo waku, kana ũmanyĩĩtye Ayuti onthe ala matwĩe katĩ wa Andũ‐ma‐mbaĩ‐ingĩ matie Mose, ũimatavya maikaĩke syana syoo, na maikaatĩĩe syĩthĩo sya Ayuti. 22Ĩndĩ nĩ ata? Maitĩa kwĩw’a kana nĩwũkite. 23Ĩka ĩndĩ ũndũ ũla tũũkũtavya: Twĩ na aũme ana ala me na wĩvĩto ĩũlũ woo; 24#Meko 18.18.osana na asu, nokĩthesya mwene vamwe nao, nokyumya syĩndũ nũndũ wamo, nĩ kana matonye kwenza mĩtwe yoo: na ĩndĩ onthe makamanya kana ti ma w’o maũndũ ala matavĩtw’e ũndũ waku; ĩndĩ kana we mwene ũendaa nesa, na ũsũvĩaa ĩla mĩao. 25#Meko 15.20,29.Ĩndĩ ũndũ wa Andũ‐ma‐mbaĩ‐ingĩ ala metĩkĩlĩte, nĩtwaandĩkie na twamatavya, kana mevathane na syĩndũ ila syũaĩwe mĩvw’anano, na maikanyw’e nthakame, o na kĩndũ kitĩtwe, na kwĩvathana na ũlaalai. 26#Mot 6.1–20; 1 Ako 9.20.Na ĩndĩ Vaulo oosana na ala andũ, na mũthenya ũla waatĩĩe ũsu eethesya mwene vamwe namo, avota ĩkalũnĩ, aitavan’ya kana mĩthenya ya ũthesyo nĩ mĩanĩu, mũvaka nthembo yathembwa kwondũ wa kĩla ũmwe wamo.
Kĩthokoo Yelusaleme, na kũkwatwa kwa Vaulo
27Na ĩla mĩthenya mũonza ĩkilĩlye ũthela, Ayuti ala maumie Asia, moona Vaulo ĩkalũnĩ, maingĩanĩsya ĩkomano yonthe na mamũkwata, 28#Meko 6.13; Esek 44.7.makyũkĩlya mawasya, makyasya, Aũme ma Isilaeli, tũtethyei: Mũndũ nĩwe ũũ ũla ũmanyĩasya andũ onthe kũndũ kw’onthe, aineenea andũ naĩ, na ĩla mĩao, o na vandũ vaa; na mbee wa ũu nĩwaetie Akiliki nao ĩkalũnĩ, nake nũvukĩtye vandũ vaa vatheu. 29#Meko 20.4; 2 Tim 4.20.Nũndũ maĩ manamwona ndũanĩ e na Telovimo, mũndũ wa Eveso, namo nĩmatalĩlasya kana Vaulo nũmũetete ĩkalũnĩ. 30Na ndũa yonthe yaya kĩtuu, na andũ moombana masembete; na mamũkwata Vaulo, mamũkusũlan’ya na kũmumaalya ũtee wa ĩkalũ: na oyu mĩomo yavingwa. 31Na makĩmantha kũmũaa, ũvoo wamũvikĩa ũla mũnene wa nguthu ya asikalĩ ngili, kana Yelusaleme kw’onthe nĩkũlikile kĩtuu. 32Na oyu oosa asikaiĩ na anene ma asikalĩ ĩana ĩana, na amatheeea asembete: nao, moona ũla mũnene na asikalĩ, maeka kũmũlumangya Vaulo. 33#Meko 21.11; 20.23.Na ĩndĩ ũla mũnene athengeea, na amũkwata Vaulo, na eeaa nĩovwe na mĩnyololo ĩlĩ; na akũlya ũndũ wĩtawa na ũndũ wĩkĩte. 34Na amwe manĩĩsya ũndũ ũmwe, na angĩ katĩ wa nguthu manĩĩsya ũndũ ũngi: na alea ũmanya nesa nũndũ wa kĩtuu, eeaa aetwe ngomenĩ. 35Na avika mbasyanĩ, akuwa nĩ asikalĩ nũndũ wa ũng’endu wa ĩla nguthu ya andũ; 36#Meko 22.22; Lk 23.18.nũndũ ĩkomano ya andũ yamũvikĩlĩte, yĩkyasya na wasya mũnene, Mũvete ũsu.
37Na Vaulo akilĩlye ũlikwa ngomenĩ nthĩnĩ, amwĩa ũla mũnene wa asikalĩ, Nĩ na ũthei nyie kũkũtavya ũndũ? Nake amũkũlya, Nĩwĩsĩ Kĩkiliki? 38#Meko 5.36,37.Tuue ũla Mũmisili, ũla mbee wa mĩthenya ĩno wamang’endethisye andũ ngili inya ala metawa Oaani na wamatongoesya weũnĩ? 39#Meko 9.11.Ĩndĩ Vaulo amũsũngĩa, Nyie nĩ Mũyuti, mũndũ wa Taliso, ndũa ya Silisia, mũndũ wa ndũa ĩte mbũthũ: na nĩngũkwĩsũva ũnenge ũthei nĩneene na andũ aa. 40Na amũnenga ũthei, Vaulo, aũngeme mbasyanĩ, amavindĩthya andũ na kw’oko; na mavindya ki, aneena namo na Kĩevelania, aiasya,
Currently Selected:
MEKO MA ATŨMWA 21: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
