MEKO MA ATŨMWA 16
16
Timotheo aikwatana na Vaulo Lisitela
1 #
Meko 17.14; 19.22; 2 Tim 1.5; Avi 2.19–22. Na ĩndĩ avika Ndelive na Lisitela: na sisya, vaĩ mũmanyĩw’a ũmwe vo, wetawa Timotheo, mwana wa mũndũ mũka Mũyuti wetĩkĩlĩte; ĩndĩ ĩthe aĩ Mũkiliki. 2#Meko 6.3.Ũsu awetawa nesa nĩ ana‐a‐asa ala matwĩe Lisitela na Ikonio. 3Nake Vaulo endie ũsu aendan’ye nake; na amwosa na amwaĩka nũndũ wa Ayuti ala maĩ ngalĩ isu: nĩkwĩthĩwa onthe nĩmeesĩ kana ĩthe aĩ Mũkiliki. 4#Meko 15.23–29.Nao makyanganga ndũanĩ, mamanenga ala motw’ĩo matw’ĩtwe nĩ atũmwa na atumĩa ala maĩ Yelusaleme mamasũvĩe. 5Na kwondũ wa ũu makanisa malũlũmĩlw’a mũĩkĩĩonĩ, na ũtalo woo waingĩvaa mĩthenya yonthe.
Kyalo kya Vaulo kũvĩtĩla Asia Nini
6 #
Meko 18.23. Na mavĩtĩla nthĩ ya Velikia na Kalatia, nĩkwĩthĩwa nĩmavatiwe nĩ Veva Mũtheu kũneena ĩla ndeto nthĩ ya Asia; 7na mavika mũvakanĩ wa Misia, matata kũthi Vithinia; na Veva wa Yesũ ndaamanenga ũthei; 8na mavĩta Misia, matheea Teloa. 9Na Vaulo aumĩlĩlwa nĩ woni ũtukũ: oona mũndũ wa Masetonia aũngeme, aimwĩsũva, na aimwĩa, Inga wũke Masetonia, ũtũtethye ithyĩ. 10Na oona ũla woni, oyu twamantha kũthi Masetonia, twamanya kana Ngai nũtwĩtie tũmatavye ũla ũvoo mũseo.
Vaulo akĩinganĩsya Masetonia: ndũanĩ ya Vilivi
11Na ĩndĩ twauma Teloa na ngalawa, twathi tũlũngalĩte twelekele Samothelake, na ũnĩ ũsu twavika Neavoli; 12na kuma vau twavika Vilivi, nayo nĩ ndũa ya Masetonia, ĩla nene ya nthĩ ĩsu, vala Alomi matwĩe: na twaĩ vo ndũanĩ ĩsu twĩkalĩte mĩthenya ĩmwe. 13Na mũthenya wa savato twaumaala mbingĩlonĩ nza ũtee wa ũsĩ, vala twatalĩlasya kana ve vandũ va ũvoyea; na twekala nthĩ, twaneena na aka ala mombanĩte. 14#Yoa 6.44.Na mũndũ mũka ũmwe wetawa Litia, mũthoosya wa langi ũla ũilyĩ ta mũtune, ũla wa mũsyĩ wa Thiatila, ũla wathaithaa Ngai, atwĩw’a: na Mwĩaĩi amũvingũa ngoo yake, nĩ kana amethukĩĩsye maũndũ ala maneeniwe nĩ Vaulo. 15Na avatiswa, vamwe na ala ma nyũmba yake, atwĩsũva, akyasya, Ethĩwa nĩmũmbonete nĩ kĩthito kwa Mwĩaĩi, ũkai nyũmbanĩ kwakwa, mwĩkale vo. Na atũthing’ĩĩsya.
16 #
Meko 19.24. Na kweethĩwa, tũendete vala vandũ va ũvoyea, mwĩĩtu ũmwe ũla waĩ na veva wa kũaũsya akomana naitũ, nake amoneaa mavwana make ũtandĩthyo mũnene nũndũ wa kũaũsya kwake. 17#Mko 1.24,34.Ũsu akĩtũatĩĩa twĩ na Vaulo, atũlya wasya, akyasya, Aũme aa nĩ ngombo sya Ngai Ũla Wĩ Ĩũlũ wa Onthe, nao nĩmeũmũtavya inyw’ĩ nzĩa ya ũtangĩĩo. 18#Meko 19.13; Mko 16.17.Na eekie ũu mĩthenya mingĩ. Ĩndĩ Vaulo akĩw’a woo mũno, eethyũũa na ootavya ũla veva, Nĩkwĩaĩa syĩtwanĩ ya Yesũ Klĩsto, uma nthĩni wake. Naw’o wamuma saa o ũsu.
Vaulo na Sila mayĩkw’a kolokolonĩ na kũthaw’a
19Ĩndĩ mavwana make moona kana wĩkwatyo wa ũtandĩthyo woo nĩwaaa, mamakwata Vaulo na Sila, na mamakusya mathi nao kĩng’ang’anĩ mbee wa asili, 20#Meko 17.6; 1 Asu 18.17.na mamaete mbee wa asili, masya, Andũ aa, kwa kwĩthĩwa nĩ Ayuti, nĩmeũthokoan’ya mũno ndũa yaitũ, 21na kwonan’ya syĩthĩo ila itosana na mĩao yaitũ kũsyosa kana kwiatĩĩa, nĩkwĩthĩwa twĩ Alomi. 22#2 Ako 11.25; Avi 1.30; 1 Ath 2.2.Na ĩkomano yamokĩlĩla vamwe: na asili mamatembũangĩa ngũa syoo makĩsyumya, na matw’a makũnwe na ndata. 23Nao mamakũna makũna maingĩ, mamekya kolokolonĩ na mamwĩaĩa mũnene wa kolokolo amasũvĩe mũno: 24nake, anengwa mwĩao ta ũsu, amekya kasũmbanĩ ka kolokolo kala ke nthĩnĩ mũno, na amovea maũũ moo mĩtĩnĩ. 25Ĩndĩ ta ũtukũ katĩ Vaulo na Sila meethĩwa maimũvoya Ngai na ũmwinĩa mbathi sya ũmũkatha, na ovwa ala angĩ nĩmamethukĩĩsye; 26na oyu, o ĩmwe, kwaya kĩtetemo kĩnene kya nthĩ, ũndũ myambĩlĩlyo ya kolokolo yathingithangiw’e: na oyu mĩomo yonthe yavingũka; na syĩndũ ila syoovete asu onthe syathalĩka. 27Na mũnene wa kolokolo aamũka kuma toonĩ, na oona mĩomo ya kolokolo ĩ mĩvingũku, akũa ũvyũ wake akilĩlye kwĩyũaa, aitalĩlya kana ovwa onthe nĩmakĩie. 28Ĩndĩ Vaulo aneena na wasya mũnene aiasya, Ndũkeyĩke ũndũ ũthũku: nũndũ ithyonthe twĩ o vaa. 29Na ĩndĩ eetya mataa, na athaanyũka avota nthĩnĩ, na aitetemwa nĩ w’ĩa, avalũka nthĩ mbee wa Vaulo na Sila, 30#Meko 2.37.na amaumaalya nza, asya, Mavwana, nĩĩka ata kana ndangĩĩwe? 31Nao mamwĩa, Mwĩtĩkĩle Mwĩaĩi Yesũ, na nũũtangĩĩwa we, na nyũmba yaku. 32Na mamũtavya ndeto ya Mwĩaĩi vamwe na onthe ala maĩ nyũmba kwake. 33Na amosa o saa ũsu wa ũtukũ, na amathambya makũnwa moo; na avatiswa oyu, we na andũ make onthe. 34Na amambatya amatwaa nyũmbanĩ kwake nthĩnĩ, na aia lĩu mbee wamo, na atana mũno, we na onthe ma nyũmba yake, nũndũ wa kwĩtĩkĩla Ngai.
35Ĩndĩ kwakya, asili matũma anene ma asikalĩ, maiasya, Thasyai ala andũ mathi. 36Na mũnene wa kolokolo amũtavya Vaulo ndeto syoo, aiasya, Ala asili matũmana mũthaw’e: yu ĩndĩ umaalai, na mũithi na ũvoo. 37#Meko 22.25.Ĩndĩ Vaulo amea, Nĩmanatũkũnĩe mbee wa andũ, na tũineesilĩlwa, na ithyĩ twĩ Alomi, na manatwĩkisye kolokolonĩ; na yu nĩmeũtwĩkya nza na kĩmbithĩ? Aiee, ti w’o; ĩndĩ nĩmoke e mo ene matumye. 38Na anene ma asikalĩ mamatavya asili ndeto isu: namo meew’a kana nĩ Alomi, makĩa; 39#Mt 8.34.na mooka mamesũva; na mamaumaalya nza, mamavoya maume ndũanĩ yoo. 40Na mauma kolokolonĩ, malika nyũmbani ya Litia: na moona ana‐a‐asa, mamakiakisya na ĩndĩ mathi.
Currently Selected:
MEKO MA ATŨMWA 16: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
