MEKO MA ATŨMWA 17
17
Ndũanĩ ya Thesalonika
1 #
1 Ath 2.2. Na mavĩtĩla Amimbivoli na Avolonia, mavika Thesalonika, vala vaĩ ĩsinakoke ya Ayuti: 2na Vaulo, o ũndũ wakothaa kwĩka, avota kwamo, na vandũ va mĩthenya ĩtatũ ya savato asũanĩa nao ũvoo kuma maandĩkonĩ, 3#Lk 24.26,27,45,46.aiumĩlya na kwonan’ya kana kwaĩ na vata wa Klĩsto kũthĩna, na kũthayũũka kuma kwa akw’ũ; na ĩngĩ kana Yesũ ũsu, ũla ngũmũtavya inyw’ĩ, nĩwe Klĩsto. 4Na amwe moo meetĩkĩla, na maatĩanĩa na Vaulo na Sila; na ma ala makĩaa Ngai ma Akiliki nguthu nene, na aka aingĩ me nguma. 5Ĩndĩ Ayuti, mausũwa nĩ kĩwĩu, meeyosea andũ amwe athũku ma nguthu sya imaamai, na moomban’ya nguthu, meekĩa ndũa kĩthokoan’yo; na mathi nyũmbanĩ ya Yasoni maimantha kũmaumaalya na ũmanengane mokonĩ ma andũ. 6#Meko 16.20.Na malea ũmona, mamũkusya Yasoni o na ana‐a‐asa amwe amwe mbee wa anene ma ndũa, maiasya, Aa makulumanĩtye nthĩ nĩmokĩte vaa navo; 7#Lk 23.2; Yoa 19.12; Alo 16.21.na Yasoni amosa: na aa onthe mekaa maũndũ mavĩtanĩte na motw’ĩo ma Kaisali, maiasya kana kwĩ mũsumbĩ ũngĩ wĩtawa Yesũ. 8Na maũũyĩthya ĩkomano na anene ma ndũa, meew’a maũndũ asu. 9Na Yasoni na ala angĩ maumw’a ngwatĩlĩlyo, na mamalekya mathi.
Ndũanĩ ya Velia
10Na oyu ala ana‐a‐asa mamea Vaulo na Sila mathi Velia na ũtukũ: nao mavika kw’o malika ĩsinakokenĩ ya Ayuti. 11#Yoa 5.39.Na andũ asu maĩ na ngoo nzeo mbee wa ala ma Thesalonika nĩkwĩthĩwa nĩmeetĩkĩlile ĩla ndeto na ũthalĩku w’onthe wa ngoo, maimantha maandĩkonĩ mĩthenya yonthe, kana maũndũ asu nĩw’o mailyĩ. 12Kwondũ wa ũu aingĩ moo meetĩkĩla; vamwe na aka ma Akiliki me nguma, na aũme aingĩ. 13#1 Ath 2.14.Ĩndĩ Ayuti ma Thesalonika mesa ũmanya kana ndeto ya Ngai nĩtavanĩtw’e nĩ Vaulo kũu Velia nakw’o, mathi kw’o mamathokoan’ya na kũmaũũyĩthya makomano. 14#Meko 16.1.Na ĩndĩ oyu ana‐a‐asa mamwĩa Vaulo athi avike ũtee wa ũkanga: na Sila na Timotheo matiwa vo. 15#Meko 16.1.Ĩndĩ ala maendie na Vaulo mamũvikya Athene: na meeaĩwa nĩwe makamatavye Sila na Timotheo mamũatĩĩe na mĩtũkĩ, mathi.
Ndũanĩ ya Athene
16Na Vaulo akĩmeteela Athene, veva wake wathilĩka nthĩnĩ wake, aiona ndũa yusũĩte mĩvw’anano. 17Na kwa ũu asũanĩa na Ayuti na ala makĩaa Ngai ĩsinakokenĩ, na ala makomanaa nake kĩng’ang’anĩ, kĩla mũthenya. 18#1 Ako 4.12.Na andũ oĩ amwe ma Evikuleo na Sitoiko mamũwĩla. Na amwe masya, Mũthelya ũũ wa tũmaũndũ enda kwasya ata? Angĩ masya, Eoneka ta mũndũ mwonan’ya wa ngai ngeni: nũndũ nĩwatavanasya Yesũ na ũthayũũkyo. 19Na mamũkwata, mamũtwaa Aleovako, maiasya, Momanyĩsyo aa ala ũmanyĩasya we, nĩtũtonya kũmanya ũndũ mailyĩ? 20Nĩkwĩthĩwa we ũetete maũndĩ meũ matesĩkĩwe matũnĩ maitũ: ĩndĩ nĩtũkwenda kũmanya ũndũ mailyĩ maũndũ aa. 21(Na Aathene na aeni ala mekalaa ũeni kw’o maiaĩ na ũthei wa ũndũ ũngĩ, ate o kũneenan’ya kana kwĩthukĩĩsya ũvoo wa ũndũ weũ.)
Ũtavan’yo wa Vaulo Aleovako
22Na vaulo aũngama Aleovako katĩ, na asya,
Inyw’ĩ aũme ma Athene, maũndũnĩ onthe nĩona kana mwĩ na maũndũ ma ũthaithi mwingĩ. 23Nũndũ ngĩvĩtĩla nzĩanĩ, na ngĩsisya mũno syĩndũ sya ũthaithi wenyu, nonie kĩthembeo nakyo kĩkĩĩtwe ũandĩko ũũ, KWA NGAI ŨLA ŨTESĨKĨWE. Ũla inyw’ĩ ĩndĩ mũthaithaa kwa ũlea ũmanya, nĩwe ngũmwon’ya inyw’ĩ. 24#1 Asu 8.27; Isa 42.5; Mt 11.25; Meko 7.48.Ngai ũla wombie nthĩ na syĩndũ syonthe ila syĩ vo, we, Mwĩaĩi wa itũ na nthĩ, ndekalaa nyũmbanĩ syakĩtwe na moko; 25#Sav 50.12.o na ndathũkũmawa nĩ moko ma andũ, ta wĩ na vata wa kĩndũ, nĩkwithĩwa nĩwe ũnengae onthe thayũ, na mĩthũmũ, na syĩndũ syonthe; 26#Kũt 32.8.na oombie mbaĩ syonthe sya andũ kuma mũndũnĩ ũmwe, matũae ĩũlũ wa nthĩ yonthe, atw’ĩte mavinda moo ala wambie ũtw’a, na mĩvaka ya mawĩkalo moo; 27#Isa 55.6; Sav 145.18; Yel 23.23.nĩ kana mamũmanthe Ngai, o na ethĩwa nĩmatonya ũmũmantha maimũvavata mamwone, o na kau nde kũasa na kĩla ũmwe waitũ: 28nũndũ twĩ thayũ, na nĩtũũthi, na twĩ na mwĩkalĩle witũ nthĩnĩ wake; o tondũ atili amwe menyu ma mbathi maisye,
Nũndũ ithyi naitũ twĩ ũsyao wake. 29#Mwa 1.27; Isa 40.18; Meko 19.26; 1 Ako 12.2.Ĩndĩ kwa kwĩthĩwa twĩ ũsyao wa Ngai, tũiaĩlwe nĩ ũtalĩlya kana Ũ‐Ngai ũvw’anene na thaavu, kana vetha, kana ĩvia, ila syasũvĩtwe na ũtũĩka na ũĩ wa mũndũ. 30#Meko 14.16; 17.23; Lk 24.27.Ĩndĩ mavinda ma ũlea ũmanya, Ngai etw’a ta ũteona; ĩndĩ yu emeaĩa andũ onthe kũndũ kw’onthe maalyũle ngoo: 31#Sav 9.8; 96.13; Meko 10.42; Alo 10.14.nĩkwĩthĩwa nĩwiĩte mũthenya ũla ũkasilĩla nthĩ yonthe na ũlũngalu, kwa mũndũ ũla wanyuvie; nake amanengete andũ onthe kũmanya, kwondũ wa kũmũthayũũkya kũmumya kwa akw’ũ.
32Namo meew’a ũvoo wa ũthayũũkyo wa akw’ũ, amwe moovũĩa ngũĩ; ĩndĩ angĩ masya, Tũkakwĩthukĩĩsya ĩngĩ ũvoonĩ ũũ. 33Na kũilyĩ ũu Vaulo auma vo amatia. 34Ĩndĩ amwe malũman’ya nake, na meetĩkĩla: na amwe ma asu nĩ Ndionisio ũla Mũaleovako, na mũndũ mũka wetawa Ndamali, na angĩ vamwe nao.
Currently Selected:
MEKO MA ATŨMWA 17: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
