MEKO MA ATŨMWA 14
14
Vaulo na Valanava Ikonio
1Na kweethĩwa malika vamwe ĩsĩnakokenĩ ya Ayuti ndũanĩ ya Ikonio, na maneenie ũndũ nguthu nene ya Ayuti na ya Akiliki yeetĩkĩla. 2#Meko 13.45.Ĩndĩ Ayuti ala matetĩkĩlĩte mathokoan’ya ngoo sya Andũ‐ma‐mbaĩ‐ingĩ, na mamendethya ũthũku ĩũlũ wa ana‐a‐asa. 3#Meko 19.11; Mko 16.20; Aevl 2.4.Na kwa ũu mekala vo matukũ maingĩ makĩneena na ũkũmbaũ nthĩnĩ wa Mwĩaĩi, ũla wakũsĩĩe ĩla ndeto ya mumo wake, aimanenga syama na momakyo mekwe na moko moo. 4Ĩndĩ ĩkomano ya andũ ma ndũa yavathũkana; amwe maĩ ngalĩ ya Ayuti, na amwe maĩ ngalĩ ya atũmwa. 5#Meko 14.19; 2 Tim 3.11.Ĩndĩ Andũ‐ma‐mbaĩ‐ingi na Ayuti na anene moo menda kũmavithũkĩa, mameke nai na ũmakima na mavia, 6#Mt 10.23.mamanya, na makia mathi ndũanĩ sya nthĩ ya Laikonia, Lisitela na Ndelive, na ivaloni ila syĩ ndee: 7#Meko 11.19,20.na matavan’ya ũla ũvoo mũseo kw’o.
Ndũanĩ ya Lisitela
8 #
Meko 3.2; 9.33; Yoa 9.1. Na Lisitela kwaĩ mũndũ ũmwe waĩ mwau maũũ, kyonze kuma asyawa, ũtaakinya nongi. 9#Meko 3.4; Mt 9.28.Ũsu amwĩthukĩĩsya Vaulo aineena: na Vaulo amũketeea, na akyona kana e na mũĩkĩĩo wa kũvow’a, 10amũtavya na wasya mũnene, Ũngama vyũ na maũũ maku. Nake ookĩla aithaka na eekinyie. 11#Meko 28.6.Na ĩkomano yoona ũndũ Vaulo weka, mookĩlya mawasya moo, maiasya na kĩthyomo kya Laikonia, Ila ngai nĩsyatũtheeea ivw’anene na andũ. 12Na Valanava mamwĩta Yuvita; na Vaulo mamwĩta Mekyuli, nĩkwĩthĩwa aĩ mũneeni mũno. 13Na mũthembi wa Yuvita, nayo ĩkalũ yayo yaĩ ngalĩ ya mbee ya ndũa, aete ng’ombe na mĩsonzo ya malaa mbingĩlonĩ, akyenda kũthemba vamwe na makomano. 14Ĩndĩ atũmwa, Valanava na Vaulo, meew’a ũvoo ũsu, matembũanga ngũa syoo, na matũlĩla mathi ĩkomanonĩ, mokĩlĩtye mawasya, 15#Kuma 20.11; Sav 146.6; Isa 37.16; Yel 32.17; Yak 5.17.maiasya, Aũme, nĩkĩ mũkwĩka maũndũ aa? Ithyĩ naitũ twĩ andũ tũilyĩ tenyu, na nĩtũmũetee ũvoo mũseo, nĩ kana mwĩthyũũe na kũekana na maũndũ aa ma mana, mũmwelekele Ngai ũla wĩ thayũ, ũla wombie ĩtu na nthĩ na ũkanga, na syĩndũ syonthe ila syĩ nthĩnĩ wasyo: 16#Meko 17.30.ũla waekie mbaĩ syonthe mavinda ala mavĩtie ithi na nzĩa syasyo ene. 17#Sav 147.8; Yel 5.24.Ĩndĩ vamwe na ũu ndaaĩtia vate ũkũsĩ, nĩkwĩthĩwa eekie nesa aimũnenga mbua kuma ĩtunĩ, na mavinda ma ũketha, aimusũĩsya lĩu na ũtanu ngoonĩ syenyu. 18Na vamwe na ndeto ii vatiele vanini maemwe kũsiĩĩa ĩkomano kũmathembea.
Kũsyoka Andiokia
19 #
2 Ako 11.25; 2 Tim 3.11. Ĩndĩ kwooka Ayuti kw’o kuma Andiokia na Ikonio: na mamaingĩĩsya makomano, mamũkimanga Vaulo na mavia, na mamũkusya mamumya ndũanĩ, maitalĩlya kana nĩ mũkw’ũ. 20Ĩndĩ amanyĩw’a maũngeme mamũthyũlũlũkĩte, ookĩla, na avota ndũanĩ: na ũnĩ ũsu aumaala vamwe na Valanava mathi Ndelive. 21#Mt 28.19.Na matavan’ya ũvoo mũseo ndũanĩ ĩsu, na matw’ikĩthya andũ aingĩ amanyĩw’a, maalũka Lisitela, na Ikonio, na Andiokia, 22#Meko 11.23; 1 Ath 3.3; Mt 7.14.makĩlũlũmĩlya ngoo sya amanyĩw’a, makĩmataa mekalae ũla mũĩkĩĩonĩ, na maimon’ya kana tũitĩa kũvĩtĩla mathĩnanĩ maingĩ tũilika ũsumbĩnĩ wa Ngai. 23#Meko 13.3.Na mamaiĩa atumĩa kĩla ĩkanisa, na mavoya Ngai mateũya, mamanengane kwa Mwĩaĩi ũla metĩkĩlĩte. 24Na mavĩtĩla Visitia, na mooka Vambilia. 25Na maneena ĩla ndeto Velika, matheea Atalia; 26#Meko 13.1,2.na kuma vo mathi na ngalawa Andiokia, vala manenganĩwe mumonĩ wa Ngai kwondũ wa wĩa ũla meanĩsye. 27#1 Ako 16.9; Meko 11.18.Nao mavika, na moomban’ya ĩkanisa vamwe, mayĩtavya maũndũ onthe ala Ngai wĩkĩte namo, na ũndũ ũmavingũĩe Andũ‐ma‐mbaĩ‐ingĩ mũomo wa mũĩkĩĩo. 28Nao mekala na amanyĩw’a ĩvinda ĩasa.
Currently Selected:
MEKO MA ATŨMWA 14: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
