ZAKARIA 4
4
Okorora igoro y’ekebekerero gie chitaya
1Omomalaika oria okwanete nainche ritang’ani agacha naende, agantura buna omonto oraire agoturwa korwa ase chitoro. 2Ere akamboria, “Ninki oroche?”
Nkairaneria, nkamotebia, “Nigo ndoche ekebekerero gie chitaya keroiseirie etahabu yoka, na igoro yaye egetaabo ki’amaguta ngeterekereireo, ne chitaya isano na ibere nchireo, na emebirangwa etano na ebere ekorenta amaguta nigo esoete ase kera etaya ebekire igoro yaye. 3Mbarabare ase ekebekerero keria gie chitaya nereo emezeituni ebere, oyomo ensemo y’okorio na oyonde ensemo y’okobee.” 4Erio nkaboria omomalaika oria okwanete nainche, “Omonene one, ninki engencho y’ebinto ebi?”
5Erio akang’iraneria, akamboria, “Inee! Tomanyeti engencho y’ebinto ebi?”
Nkamoiraneria, “Yaya, omonene one, timanyeti.”
6Erio akairaneria, agantebia, “Eri nario ring’ana ri’Omonene riachierete Serubabeli, rikamotebia: Ayio tagokoreka ase chinguru, gose ase okobua kw’omonto, korende nase Omoika one. Nabo Omonene bw’Emeganda agoteba. 7Aye egetunwa ekenene, ninki oisaine ase obosio bwa Serubabeli? Noiranigwe inse obe buna ense omweya. Serubabeli nabeke rigena ri’ogokoorera, abanto kobaakire eriogi, bagoteba: Obuya, obuya bobe igoro yaye!”
8Naende ring’ana ri’Omonene rigacha asende, rigantebia, 9“Serubabeli obekire oboroso bw’enyomba eye namaboko aye, boigo nere orayekoore namaboko aye. Erio nario oramanye ng’a Omonene bw’Emeganda nere ontomete asemore. 10Ning’o orachaye rituko ri’amang’ana amake kagochaka, ekero amaiso aria atano na abere ararore ekebiro ase okoboko gwa Serubabeli, nagoke?
“Ayio atano na abere namaiso ’Omonene arigereretie chinsemo chionsi chi’ense.”
11Naende nkaboria omomalaika oria, “Emezeituni eye ebere, oyomo ore ensemo y’okorio na oyonde ensemo y’okobee y’ekebekerero keria gie chitaya, neya ki?” 12Nkamoboria okoboria gwa kabere, “Ninki engencho ye chinsagia echio ibere chi’emezeituni chire mbarabare ase emebirangwa eyio ebere eroiseirie etahabu, eyio amaguta agoetera?”
13Akairaneria, akamboria, “Inee! Tomanyeti engencho y’ebinto ebi?”
Nkamokania, “Yaya, omonene one, timanyeti.”
14Erio agantebia, “Aba nabwo abaakwa amaguta babere, abagotenena ase okomokorera Omonene bw’ense engima.”
Currently Selected:
ZAKARIA 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
