ZAKARIA 1
1
Omonene okorangeria abanto baye bairane asare
1Ase omotienyi o gatano na gatato, omwaka o kabere bw’okogamba kwa Dario ring’ana ri’Omonene rigacha ase omobani Zakaria, mosinto o Berekia o Ido, rikamotebia, 2“Omonene nigo agechetigwe mono ne chisokoro chiaino. 3Ase ayio tebia abanto: Aya naro Omonene bw’Emeganda agoteba: Ing’iranere inche Omonene bw’Emeganda, nainche nimbairanere. Nabo Omonene bw’Emeganda agoteba. 4Timobaisa koba buna chisokoro chiaino, abwo ababani ba kare barerete asebare, bakabatebia: Aya naro Omonene bw’Emeganda agoteba: Onchoka, motige chinchera chiaino chimbe, na ogokora kwaino okobe. Korende chisokoro chiaino tichiategererete chinyigwere. Nabo Omonene agoteba. 5Bono chisokoro chiaino ng’ai chire? Na ababani baino, ng’ai bare? Inee! Mbagendererete koba moyo botambe? 6Amang’ana aane na emeroberio yane echikire, ayio naruete goetera ase abasomba baane ababani nigo yasoete ase chinkoro chie chisokoro chiaino. Barabwo nigo beitetie bagateba: Buna Omonene bw’Emeganda arengereretie gotokorera ase engencho ye chinchera chiaito na ogokora gwaito, naboigo atokoreire.”
Okorora kw’omobani igoro ye chibarasi
7Ase rituko ri’emerongo ebere na kane, omotienyi o ikomi nomo, noro okorokwa Sebati, omwaka o kabere bw’okogamba kwa Dario, ring’ana ri’Omonene rigacha asende inche omobani Zakaria, mosinto o Berekia o Ido. 8Nkarora ase okorora kwa botuko omonto oriinete ebarasi embariri. Omonto oyio nigo ateneine ase egati y’emete ekorokwa emehadasi yarenge ase rigoko. Na nyuma yaye nchiarengeo chibarasi chinde chimbariri, na echire chibarati, ne chindabu. 9Erio nkaboria Omonene one, ninki engencho ye chibarasi echi?
Omomalaika oria okwanete nainche, agantebia. “Ninkworokie engencho ye chibarasi echi.” 10Ase ayio omonto oria oteneine ase egati y’emehadasi eria akang’iraneria, agantebia, “Chibarasi echio nachio Omonene atomire chietanane ase ense yonsi.”
11Chibarasi chigatebia omomalaika bw’Omonene, oria oteneine ase egati y’emehadasi eria, “Twaetananire ase ense yonsi, twarorire ng’a ense yonsi nigo etoererete ekirete‐kiri.”
12Erio omomalaika oria bw’Omonene akaboria, “Aye Omonene bw’Emeganda, ngoika ririri orabe otari kororera Yerusalemu, na emechie y’Abayuda amabera, eyio kwabeire kogechirie mono nero ase engaki y’emiaka emerongo etano na ebere (70)?”
13Omonene akairaneria amang’ana amaya na ay’okoremia ase omomalaika ori a okwanete nainche. 14Ase ayio omomalaika oria agantebia, “Raria, otebe ng’a aya naro Omonene bw’Emeganda agoteba: Nigo inde ne risemi rinene ase engencho ya Yerusalemu na Sayoni. 15Nigo ngechirie mono nabanto b’ebisaku ebio batoererete, bakirete‐kiri, ekiagera ekero nagechetigwe ake nabarabwo, nigo bamentete korenta emechando. 16Ase ayio, aya naro Omonene bw’Emeganda agoteba: Inche nairanire Yerusalemu na koyororera amabera. Enyomba neagachwe imeo, na engori y’okorengera eramborwe igoro ya Yerusalemu. Nabo Omonene bw’Emeganda atebire.
17“Raria naende, otebe ng’a aya naro Omonene bw’Emeganda agoteba: Emechie yane neichorigwe nogosesenigwa okonge, na inche Omonene nindemie Sayoni naende, na ninchore Yerusalemu obe oyone naende.”
Okorora igoro ye chingunchara
18Naende nkarigereria, nkarora chingunchara inye. 19Erio nkaboria omomalaika oria konya okwanire nainche, “Ninki engencho ye chingunchara echi?”
Ere akairaneria, agantebia, “Chingunchara echi nachio chiasiarerete Abayuda, na Abaisraeli, na abanto ba Yerusalemu.”
20Erio Omonene akanyorokia abaturi b’ebioma bane. 21Naende nkaboria, “Abanto aba, ninki bacha gokora aa?”
Ere akairaneria, agantebia, “Chingunchara chiria chiasiarerete Abayuda gochia aaria na aaria, goika monto onde tanyarete koimokia omotwe oye igoro. Bono abanto aba bachire gochiondokia na kobutora chingunchara chi’abanto b’ebisaku, baria baimokereretie chingunchara chiabo igoro y’ense y’Abayuda, chigasiarera abamenyeteo.”
Currently Selected:
ZAKARIA 1: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
