OGOT GWA SULEMANI 5
5
(Omonyuomi)
1Aye moiseke ominto, omoriakari one, nasoire ase omogondo one,
ngosangereria inde manemane amo nebinsari biane bigotioka buya;
nkoria inde eriana amo nobooke bwane,
nkonywa inde edivai yane amo namabeere aane.
(Abakungu ba Yerusalemu)
Inwe abasani, ragera na monywe!
Inwe abanchani, kanywe mono!
Ogotera Gwa Kane
(Omoriakari)
2Inche nigo narenge indaire, korende enkoro yane nigo yategesetie.
Igwa! Omwanchi one oyio ogontura.
(Omonyuomi)
Moiseke ominto, omwanchi one,
riruma riane na omoikeranu one, inyigorere!
Inyigorere, ekiagera omotwe one otoorire riime,
na etukia yane yanyiire nembura ya botuko.
(Omoriakari)
3Narusirie eanga, inee, inyebeke naende?
Nesibirie amagoro, inee, inyabeke eubi naende?
4Erio omwanchi one akabeka okoboko kwaye ase ekebao,
erio nkaba nomosasoko omonene ime ase enkoro yane.
5Nkaimoka gochia koigorera omwanchi one,
amaboko aane akanyororokia manemane,
na ebiara biane bigatonyia manemane
ase obobwato bw’egesiekero.
6Ngachia koigorera omwanchi one,
korende nkanyora ng’a ochiire.
Omoyo one okairianyeka ekero akwanete.
Nkaba nkomorigia, korende tinamonyorete.
Nkamorangeria, korende taitabete.
7Ekero abarendi barenge goetanana omochie koyorata, bakanyora inche,
bakang’aka chingoma;
bakang’ura egetambaa gi’okwambara,
abarendi baria barendete chindwaki.
8Inwe abakungu ba Yerusalemu, nigo nkobasorora
ng’a mokonyora omwanchi one,
momotebie ng’a amaiga ’obwanchani anyarire.
(Abakungu ba Yerusalemu)
9Aye ore omoseera kobua abakungu bonsi,
inee, omwanchi oyio oo, naki abuete abanchi bande?
Ee, omwanchi oyio oo, naki abuete abanchi bande,
goika gwatosoroire iga?
(Omoriakari)
10Omwanchi one nigo are omorabu se okomeka‐meka, naende omobariri;
nigo are nogwatananekana korwa ase abanto chilifu ikomi.
11Omotwe oye nigo ore omuya onga etahabu echenire,
etukia yaye nigo ere omosamugoku bw’obwari;
nigo ere emwamu ti buna amarionya ’ekegonkoru.
12Amaiso aye nigo agwekaine amaruma are ase chindooche,
ee, nigo anga amaruma asibigwe namabeere,
naende nigo anga amagena akomeka‐meka achokire buya.
13Chinsea chiaye nigo chinga buna ebigondo bi’ebimeri bi’ebinsari,
bigotioka rimisu rigiya.
Ebikoba biaye nigo binga buna ebisicha ebiya,
nigo bigotonyia manemane.
14Amaboko aye nigo anga buna etahabu ebombire buya,
echabeire amagena akomeka‐meka.
Omobere oye nigo onga buna amaino e chinchogu aroisirie buya,
na gochaberwa namagena e rigori rinene akorokwa safiro.
15Amagoro aye nigo anga chisiiro chi’amagena amarabu se akomeka‐meka,
abekire ase chinterekerero chie chitaabu chingiya.
Okororekana kwaye nigo konga buna okwa Lebanoni,
ekieni kiaye nigo kere ekiya buna eki’emecharake,
16Chinkwana chiaye nigo chire chinyansu mono,
chingencho chiaye chionsi nigo chire echi’ogosanerwa mono.
Inwe abakungu ba Yerusalemu,
naboigo omwanchi one are, oyio ore omosani one.
Currently Selected:
OGOT GWA SULEMANI 5: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
