OGOT GWA SULEMANI 4
4
(Omonyuomi)
1Aye omwanchi one, naki ore omoseera!
Naama! Nigo ore omoseera!
Korwa ime y’egietubo kiao ekieni ki’amaiso ao nigo kenga eki’amaruma;
etukia yao nigo enga buna riicho rie chimbori,
nigo chigotirimboka ase ebitirimboko bia Gileadi.
2Amaino ao nigo anga ching’ondi chiaberi chianachirwe amarionya,
chiarure gosibigwa chiarabire se,
chionsi nigo chikobiara chisare,
na manwa ende teri gokwa.
3Ebikoba biao nigo binga eusi embariri,
omonwa oo nigo ore oyo bw’okogokia,
chinsea chiao chitubire ime ase egietubo kiao;
nigo chinga buna ebing’ese bie ritunda rikomomanga.
4Rigoti riao nigo ringa buna omorobiri o Daudi,
oyio oagachetwe koba rigachero ri’ebirwanero.
Agwo nao ching’aya elifu eyemo chisungire,
chionsi nigo chire echi’abarwani esegi bare chituoni.
5Chimbeere chiao nigo chinga buna chimanwa ibere
buna chisare chi’engabi
chikorisia agwo ase egati y’ebisicha ebiya.
6Ekero rigochia kogoroba na emerengari egochia gosira,
ningende ase egetunwa ase manemane ekoruerwa
na ase ekegoro ki’ogosambera ubani.
7Aye omwanchi one, nigo ore omoseera bori,
tori na kemoa kende!
8Aye omoriakari one, togende torue aa Lebanoni,
torue Lebanoni, togende komo.
Otirimboke korwa ase egechuria ki’egetunwa ki’Amana,
na ekia Seniri na Herimoni.
Orue ase amakuruma e chindo,
na ase ebitunwa chingo chimenyete.
9Aye moiseke ominto, omoriakari one,
kwang’usire enkoro yane na kwangokirie,
okorigereria kw’amaiso ao kwang’usire enkoro yane,
ee, esonoi eyemo yoka ye chisonoi chia igoti riao yang’usire.
10Aye moiseke ominto, omoriakari one,
obwanchani bwao naki bore obuya mono!
Naki bore obuya mono kobua edivai!
Ne rimisu ri’amaguta ao ogweaka nigo ribuete ebinsari bionsi!
11Aye omoriakari one, ebikoba biao nigo bikonyororokia obooke;
obooke na amabeere nigo bire inse y’oromeme rwao.
Rimisu rie chianga chiao nigo ringa eria Lebanoni.
12Moiseke ominto, omoriakari one, naye omogondo ogiteire,
naye ensoko y’amache egiteire,
na entuboka emumekire na ebekire ekemanyererio.
13Buna omogondo ore namakomomanga
aye nigo okwama amatunda amaya mono,
na ebisicha bikorokwa hena mbireo, na ebimeri bikorokwa narada,
14na ebimeri bigosegwa safarani;
boigo kalamusi, na omodalasini, na
emete yonsi ya ubani,
na manemane, na omogaka, amo nebinsari ebiya mono.
15Aye nigo onga buna ensoko y’amache are moyo ere mogondo,
naende nigo onga buna chindooche chikorwa Lebanoni.
(Omoriakari)
16Aye embeo ekorwa sugusu, imoka!
Na aye eyekorwa irianyi, inchuo!
Gusa igoro y’omogondo one,
tiga rimisu riaye rigiya rirurukigwe rirande.
Tiga omwanchi one ache ase omogondo oye,
arie amatunda are amaya mono.
Currently Selected:
OGOT GWA SULEMANI 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
