ABARUMI 8

Obogima ase Omoika

1Na bono kogambigwa tikori ase abwo bare ime ase Kristo Yeso. 2Naki ogochika kw’Omoika bw’obogima boria bore ime ase Kristo Yeso gwansiboire korwa ase ogochika kw’ebibe na amakweri. 3Naki aya amachiko atare konyara gokora, ekiagera nigo arenge amareu ase engencho y’ebibe bi’emebere ya mwanyabanto, Nyasae agakora ase ogotoma Omwana oye omonyene ase omogwekano bw’engencho yaito y’ebibe, na ase engencho y’ebibe, akagambia ebibe ase omobere oye o mwanyabanto, 4erinde ekerigirie ime ase amachiko geikeranigwe ime yaito, aba totari gotunyana chingencho chiaito chi’ebibe, korende chingencho chi’Omoika. 5Baria bagotunyana chingencho chiabo chi’ebibe nigo barengereretie chingencho chi’ebibe, korende baria bagotunyana chingencho chi’Omoika nigo barengereretie chingencho chi’Omoika. 6Naki okorengereria kw’engencho y’ebibe namakweri, korende okorengereria kw’engencho y’Omoika nobogima na omorembe. 7Naki okorengereria koria kw’engencho y’ebibe nobobisa igoro ase Nyasae, ekiagera tikori gwancha koigwera amachiko a Nyasae, gose tikori koyaigwera nonya ng’ake. 8Abagotunyana chingencho chi’ebibe tibakonyara kogwenera Nyasae.

9Onye Omoika o Nyasae omenyete ime yaino, rirorio timori gotunyana chingencho chi’ebibe, korende chingencho chi’Omoika. Onde bwensi otari n’Omoika o Kristo, oyio tari omonto oye. 10Na Kristo karabe ime yaino, nonya emebere yaino ekwete ase engencho y’ebibe, emeika yaino moyo ere ase engencho y’oboronge obo mwanyorete. 11Korende onye Omoika oye ere oyobogetie Yeso korwa ase abakure omenyete ime yaino, ere oyobogetie Kristo Yeso korwa ase abakure nabokie na emebere yaino eranyorekane namakweri, ase engencho y’Omoika oyomenyete ime yaino.

12Naboigo baminto, igo tore abasira, korende tari ase chingencho chiaito chi’ebibe, ase ogotunyana chingencho chi’ebibe, 13naki komoratunyane chingencho chi’ebibe, nigo morakwe, korende komoraite ogokora kw’omobere ase chinguru chi’Omoika, namobe moyo.

Abana ba Nyasae

14Naki bonsi abakoraagwa n’Omoika o Nyasae, abwo nabwo abana ba Nyasae. 15Naki timwanyorete omoika oyo obakorire koba abasomba na korenta obwoba, korende nigo mwanyorete Omoika oyo obakorire koba abana ba Nyasae. Igo torera, “Abba!” Engencho yaye “Tata!” 16Omoika omonyene obeire kirori amo nemeika yaito, ng’a intwe nabana ba Nyasae. 17Onye tore abana, naboigo tore abanyamwando, abanyamwando ba Nyasae, abaraire omwando amo na Kristo, gatorachandwe amo nere, erinde tonyore obonene amo nere.

Obonene bogochi‐gocha

18Nabarire emechando y’ekero kia bono, ng’a teri gento onye ekoreng’anigwa nobonene boria bogocha koorokigwa asetore. 19Nabo ebitongwa bionsi nigo biganyete nokogania okonene mono ase rituko riria abana ba Nyasae bagocha koorokigwa. 20Naki ebitongwa bionsi nigo biabegetwe inse y’engencho ya bosa, tari ase ogwancha kwabo, korende ase ogwancha kwaye ere oyobibegete ase ogosemeria, 21ekiagera ebitongwa ebinyene nabisiborwe korwa ase obosibwa bwabo bw’ogosareka, bisoe ime ase ogosiborwa kw’obonene bw’abana ba Nyasae. 22Naki twamanyire ng’a ebitongwa bionsi nigo bire nogwechanda, naende nigo bire nobororo nonya ngoika bono, 23gose tari igo rioka, korende nonya nintwe abanyene abatore nogotongorwa kw’Omoika, nigo togwechanda ase emioyo yaito, gatoganyete gokorwa koba abana ba Nyasae, engencho yaye okoboorigwa kw’emebere yaito. 24Naki nigo twatooretigwe ase ogosemeria. Korende egento keria gesemeirie gokiarorekanire, rirorio gosemeria tikori. Naki ning’o orasemerie eki aroche? 25Korende gatorasemerie egento totarakerora, nigo togokeganya ase oboremereria.

26Naboigo n’Omoika noro nigo ogotokonya ase oboreu bwaito. Naki titomanyeti gosaba buna etogwenerete, korende Omoika omonyene nigo ogotosabera ase ogwechanda ogotanyare gokwanwa. 27Na ere oyokoriga‐rigia chinkoro chi’abanto, namanyete okorengereria kw’Omoika, ekiagera Omoika oyo nigo ogosabera abachenu buna Nyasae anchete.

28Na twamanyire ng’a Nyasae nigo agokora amang’ana onsi amo na baria bamwanchete, erio abanyorere amaya, baria barangerigwe ase omoroberio oye. 29Naki baria amanyete korwa kare akabachora korwa kare, bareng’anigwe nomogwekano bw’Omwana oye, erinde ere abe omotangi bw’abamwabo abange. 30Na baria achorete korwa kare, abwo akabarangeria boigo; na baria arangeretie, abwo akabaa oboronge boigo; na baria aete oboronge akabaa obonene boigo.

Obwanchani bwa Nyasae

31Ninki rende toratebe ase ayio? Onye Nyasae ore ensemo yaito, ning’o oranyare gotobua? 32Ere otarorerete Omwana oye amabera, korende akamorua ase engencho yaito intwe twensi, naki aramoche gotoa ebinto bionsi amo nere? 33Ning’o oranyare gosoera abachore ba Nyasae? Nyasae nere okobaa oboronge. 34Ning’o oranyare kobanachera ekina? Kristo Yeso nere okwete, ee, na kobua ase aya obokigwe korwa ase abakure; ere nigo are ensemo y’okoboko gw’okorio kwa Nyasae, naende nere ogotosabera. 35Ning’o oratwatanane korwa ase obwanchani bwa Kristo? Inee! Nogochandwa, gose nobororo, gose nokorosigwa, gose nenchara, gose ngesobono, gose nobobe, gose nomoro? 36Buna erikire,

“Ase engencho yao nigo togoitwa omobaso boira;

twabarirwe koba buna ching’ondi chigocha konyenwa.”

37Korende ase amang’ana aya onsi twabeire ababui, na goetania ababui, goetera asare oyotwanchete. 38Ninde nobomaene bw’okomanya, ng’a nonya namakweri, nonya nobogima, nonya nabamalaika, nonya nabare ne chinguru, nonya nebinto ebireo, nonya nebi gochi‐gocha, nonya nokobua, 39nonya nayare igoro, nonya nayare inse, nonya negetongwa kende gionsi, tibikonyara gotwatanana korwa ase obwanchani bwa Nyasae obore ime ase Kristo Yeso Omonene oito.

Currently Selected:

ABARUMI 8: EKEGUSIIBBLE

Highlight

Copy