ZABURI 78
78
Nyasae na abanto baye
(Ogotera gw’Asafu)
1Inwe abanto baane, igwa amang’ana nkoborokereria,
tegerera moigwe amang’ana ’omonwa one.
2Inche ninkwane ase omoreng’anio,
nigo ndakwane ase emebayeno ya kare,
3amang’ana ayio twaigwete na koyamanya,
ayio chisokoro chiaito chiatotebetie.
4Amang’ana ayio titokoyabisa ase abana babo;
goika totebie ebiaare bigochi‐gocha ogokora kw’obonene bw’Omonene,
na amakumia aye ay’okobua akorire.
5Ere nigo abegete oborori bwaye ase abanto b’ororeria rwa Yakobo,
na akaa Abaisraeli amachiko,
ayio achigete chisokoro chiaito chiorokererie abana babo.
6Nigo aganetie ng’a abanto b’ebiaare bigochi‐gocha bayamanye,
ee, nonya nabana b’ebiaare konya bataraiborwa,
naende abwo bayatebie abana babo.
7Erio nario barabe bagosemeria Nyasae,
na tibabaisa kweba emeremo yaye,
korende babe bakobwata amachiko aye.
8Barabwo tibabaisa koba buna chisokoro chiabo,
chiria chitaigwerete, naende chiasaretie;
tichiarenge ne chinkoro chindonge,
gose tichiarenge chinyegenwa ase Nyasae ase emioyo yabo.
9Abanto b’Efraimu, abwo babogoretie amata,
bakaonchoka bagatama ase rituko ri’esegi.
10Barabwo tibarendete okobwatana kw’ogotianania kwa Nyasae,
naende nigo bangete kobwatia amachiko aye.
11Bakeba amang’ana Omonene konya akorire,
na ebikone biria konya aorokirie asebare.
12Ase amasio e chisokoro chiabo Nyasae nigo akorete amakumia
agwo ase ense ya Misiri, ase orogongo rwa Soani.
13Omonene nigo aatananete amache ’enyancha,
akaambokeria chisokoro chiabo aroro,
agakora amache ayio agatenena buna orwaki.
14Ase chingaki chia mobaso nigo arenge kobaraa ne riire,
na ase chingaki chia botuko abaraa ne riire ri’omorero.
15Ere agatandora ebitare agwo ase erooro,
agasokeria abanto amache amange mono buna aye chindooche chinene.
16Agatubokia chindooche korwa ase ebitare ime,
na amache agatirimboka buna aye chindooche chinene.
17Nonya naboigo abanto abwo nigo bamentete gokora ebibe ase Omonene,
agwo ase erooro nigo basaretie ase Omonene Ore Igoro Mono.
18Barabwo nigo bateemete Nyasae ase chinkoro chiabo ime,
bakagania baegwe endagera basanerete.
19Bagakwana amang’ana arenge mamincha ya Nyasae, bagateba,
“Inee! Nyasae nanyare gototerekera endagera eisaine aa ase erooro?
20Ee, amaene ere naagete egetare na amache agacharara korwao,
ne chindooche chi’amache amange chikarwao,
korende, Inee, nanyare boigo koa intwe abanto baye endagera?
Nanyare gotoa na enyama torie?”
21Ase ayio, ekero Omonene aigwete ayio, agaichorwa nekeririanda,
akarwania abanto b’ororeria rwa Yakobo nomorero,
ekiagera nigo abete nendamwamu enene mono ase Abaisraeli.
22Ayio nigo akoregete, ekiagera tibamwegenete Nyasae,
naende tibegenete ng’a ere nanyare kobatooria.
23Korende nonya nabo, ere nigo achigete igoro,
akaigora ebisieri bi’aroro;
24akabatweria endagera ekorokwa mana, bakaba bakoyeria;
ee, akabaa endagera korwa igoro.
25Ase ayio, mwanyabanto bakaria endagera y’abamalaika;
Omonene akabatomera endagera enyinge mono.
26Akarenta omwaga o moocha okagusa igoro,
na ase okobua kwaye akagusia omwaga korwa irianyi.
27Erio akabarentera chinyama chinyinge buna orotu,
ne chinyoni chikoiruruka chinyinge buna omokenye ore ase enyancha;
28agatiga chinyoni echio chikagwa gati‐gati y’egetwori kiabo,
chigaetanana chiema chiabo.
29Erio abanto abwo bakaria chinyama bakaigota,
ekiagera Nyasae nigo abaete eke basanerete.
30Korende ekero chinyama chiarenge ase emenwa yabo
bagendererete gochitakuna,
naende konya bataraisanekia obogworu bwabo.
31Omonene akaba nendamwamu enene asebare,
agaita abanto abwo barenge ne chinguru goetania abande,
agakoora kegima abamura b’Abaisraeli.
32Nonya naboigo, abanto abwo nigo bagendererete gokora ebibe,
nonya ere okorete amakumia, tibamwegenete.
33Ase ayio agakoora amatuko abo, akayasiria,
na emiaka yabo ekaera ase okoondokia.
34Ekero aitete abanto abatigari nigo bamorigetie;
nigo baonchogete, bakamorigia ase ekeene.
35Nigo bainyorete ng’a Nyasae nere egetare kiabo;
naende ng’a Nyasae Oyore Igoro Mono, nere Omobooria obo.
36Korende nigo bakwanete amang’ana amansu ase okomong’aina,
bagakwana oborimo nemenwa yabo.
37Tibamobwatetie bokong’u ne chinkoro chiabo,
gose tibarenge abegenwa ase okobwatana kwaye kw’ogotianania.
38Korende Omonene nigo arenge namabera,
akaba okwabera ebibe biabo tabasiria;
ase chingaki chinyinge nigo arenge gotanga endamwamu yaye,
gose tarenge gotiga ekeririanda kiaye gioke mono.
39Nigo ainyorete ng’a barabwo mwanyabanto bagosira,
nigo banga buna embeo egoeta na tekoirana.
40Ase chingaki chinyinge nigo babete bagosaria ase Omonene agwo ase erooro;
bakaba bakomoichania aroro agwo.
41Nigo babete bakomoteema naende naende,
bakaba bakomogechia ere oyore Omochenu bw’Abaisraeli.
42Tibabete bakoinyora chinguru chi’okoboko kwaye,
gose tibabete bakoinyora rituko riria ababooretie korwa ase ababisa babo,
43na buna akorete ebikone ebinge ase ense ya Misiri,
na amakumia agwo ase orogongo rwa Soani.
44Aroro aaria Omonene nigo aonchorete amache e chindooche akaba amanyinga,
abanto tibanyara koyanywa.
45Nigo arentete chingi chinyinge chikabachanda,
na akabarentera ebioto bigasaria ense yabo.
46Akarenta chingeeti chigasaria ebimeri biabo,
naende akarenta chingige chikaria endagera y’emegondo yabo bechanderete.
47Omonene nigo arentete amagena ’embura agasaria emesabibu yabo,
agasaria nemeko yabo.
48Akarenta amagena ’embura agaita chiombe chiabo,
ne chinkoba chigaita ching’ondi ne chimbori chiabo.
49Omonene akabatomera endamwamu yaye enene, na ekeririanda kiaye,
na okogechigwa kwaye na emechando yonsi,
ekeombe ekio ki’abamalaika b’ogosiria.
50Ere akaroiseria endamwamu yaye enchera;
akabeka emioyo yabo ase amakweri,
akabarentera oborwaire bokabaita.
51Agaita abana abatangi bonsi aaria Misiri,
abwo barenge abatangi be chinguru chiabo ase chiema chia Hamu.
52Erio akang’anyia abanto baye buna ching’ondi chikong’anyigwa,
akabaraa ase erooro buna riicho rikoraagwa.
53Akabaraa na kobarenda buya, na tibabete nobwoba,
korende enyancha ekamera ababisa babo.
54Omonene akabarenta ase ense yaye enchenu,
ase egetunwa keria enyorerete nokoboko kwaye gw’okorio.
55Agaseria abanto b’ebisaku korwa bosio bwabo.
Nigo abaatananerete ense eyio ekaba emiando yabo,
akabeka Abaisraeli bakamenya ase chiema chiabo.
56Erio bagateema Nyasae Ore Igoro Mono, bakamogechia,
tibabwatete amachiko aye.
57Nigo baonchogete tibaba abegenwa, buna chisokoro chiabo chitabete abegenwa,
bakaba abasaria buna obota bosaregete.
58Bakagechia Omonene ase engencho
y’aase abo aimokererete igoro bagosasimera,
na ekiagera basasimete emegwekano, Omonene akaba ne risemi.
59Ekero Nyasae aroche ayio, akaba nekeririanda,
agatiga Abaisraeli kegima.
60Omonene akaanga eema yaye yarenge Silo,
eema eria akorete obomenyo bwaye ase egati y’abanto.
61Nigo atigete eke kiarenge chinguru chiaye#78:61 Esanduku y’Okobwatana kegasakorwa,
ekio kiarenge obonene bwaye agakerua ase amaboko ’ababisa.
62Ere nigo abete nendamwamu ase abanto abwo barenge omwando oye,
akabarua bagaitwa nemioro.
63Omorero ogaita abamura babo,
na abaiseke babo bakaborwa abakobanyuoma.
64Abakuani babo nigo baitetwe nemioro,
na ababoraka babo tibanyarete kobareera.
65Erio Omonene akaboka buna nigo araire chitoro,
na akaba buna omonto etuoni onyure edivai ogoaka eriogi;
66agaaka abachandi baye bagatama gochia ase barwete,
akababeka ase obosooku goika kare na kare.
67Omonene akaanga abanto b’ororeria rwa Yusufu,
gose tachorete abanto b’egesaku gi’Efraimu,
68korende agachora abanto b’egesaku kia Yuda,
na egetunwa gia Sayoni ekio anchete.
69Aroro akaagacha obomenyo bwaye obochenu bobeere igoro mono,
nabobe obokong’u buna ense ekong’irie kogenderera botambe.
70Agachora Daudi omosomba oye,
akamorusia korwa ase arenge korisia ching’ondi.
71Ee, akamorusia korwa ase arenge gotunyana ching’ondi chiare ne chimanwa chikogonka,
akamokora akaba omorisia bw’ororeria rwa Yakobo, abanto baye,
nabwo Abaisraeli omwando oye.
72Daudi akaba omorisia bw’abanto abwo ore nenkoro endonge,
akaba okobaraa nokoboko kw’obong’aini.
Currently Selected:
ZABURI 78: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
