ZABURI 72
72
Ogosabera omoruoti bw’abanto ba Nyasae
(Ogotera gwa Sulemani)
1Nyasae, kae omoruoti okobua gw’okogamba buna aye okogamba,
na omwana bw’omoruoti agambe ase oboronge buna aye.
2Erio amanye konachera abanto bao ebina bi’oboronge
na gokora ekeene ase abataka.
3Ebitunwa na ebigoro mbirentere abanto omorembe goetera ase oboronge.
4Tiga omoruoti abe okorwanerera abataka,
na atoorie abana b’abaremeire,
korende asenyente abanto bagokorera abande bobe.
5Abanto mbakoiroke,
koreng’ana buna erioba na omotienyi bigendererete kobao,
ebiaare ase ebiaare.
6Ere tiga aike korwa igoro buna
embura egotwa ase obonyansi oborere,
na buna omonyirira ogotwa igoro ase riroba.
7Tiga omonyaboronge asesenigwe ase amatuko aye,
na omorembe ogenderere kobao goika ekero omotienyi otabeo.
8Tiga omoruoti abe okogamba korwa ase enyancha eyemo goika eyende,
na korwa ase orooche rw’Eufarati goika ase ensinyo y’ense.
9Abanto bamenyete ase erooro mbatung’ame ase obosio bwaye bamosike,
na ababisa baye bamene orotu.
10Abaruoti ba Tarisisi na ab’ebisinka mbabe bakomorentera ebiegwa;
naboigo nabaruoti ba Sheba na Seba mbamorentere ebango.
11Abaruoti bonsi mbatung’ame ase obosio bwaye bamosike,
na abanto b’ebisaku bionsi mbamokorere.
12Ere nigo agotooria oyoremeire gakorangeria,
naboigo nomotaka na oyotabwati onde okomokonya.
13Nigo are omwororo ase omoremerwa na ase omotaka,
boigo nigo agotooria emioyo y’abaremeire.
14Nigo akobooria emioyo yabo korwa ase abachandi babo
na korwa ase obotindi.
Amanyinga abo nigo are nengencho enene asare.
15Tiga omoruoti agenderere koba moyo.
Chitahabu chi’ense ya Seba chirentwe asare,
tiga abanto babe bakomosabera botambe,
boigo tiga abe okona‐gosesenigwa kera rituko.
16Tiga endagera yame enyinge ase ense,
nonya nase ebitunwa igoro.
Chindagera echio tiga china‐konyegerigwa buna emete ya Lebanoni.
Abanto b’emechie tiga babuche babe buna obonyansi bw’ense.
17Erieta riaye tiga rigenderere kobao botambe,
rikume koreng’ana buna erioba rigendererete kobao.
Abanto mbabe bagosesenigwa ime yaye;
abanto b’ebisaku bionsi tiga bamoroke oyosesenirie.
18Omonene Nyasae, Nyasae bw’Abaisraeli, tiga atogigwe,
nere bweka ogokora amakumia.
19Tiga erieta riaye ri’obonene ritogigwe goika kare na kare;
obonene bwaye tiga boichore ase ense yonsi.
Amina, Amina!
20Oyo noro omoerio bw’ogosaba gwa Daudi, mosinto o Yese.
Currently Selected:
ZABURI 72: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
