ZABURI 71
71
Ogosaba kw’omonto omogotu
1Omonene, naye natameire,
tontiga nsookigwe.
2Nkonye na onsibore goetera ase oboronge bwao;
ntegerere, ontoorie!
3Aye kabe egetare kiane ki’obotamero ase nkogenda botambe,
aye gwanchire gontooria.
Naki aye negetare kiane, na egekengero kiane egekong’u.
4Aye Nyasae one, ntoorie korwa ase okoboko kw’omokori amabe,
indusie korwa ase okobua kw’oyo otari omoronge, na oyore omotindi.
5Aye Omonene Nyasae, naye ogosemeria kwane,
nabeire nkwegenete korwa obwana bwane.
6Kwabeire gontenenerete korwa ekero ntaraiborwa,
naye kwandusetie korwa ase enda ya baba.
Naye ndabe nkona‐gotogia botambe.
7Inche nabeire buna egento ki’ogoichanerwa ase abanto abange,
korende aye naye obotamero bwane obokong’u.
8Omonwa one noichorigwe nogotogigwa kwao,
na omobaso boira ninkobake.
9Tobaisa gonchwara ekero ndabe nagotire,
tontiga ekero chinguru chirabe chiang’ereire.
10Ababisa baane nigo bakongamba,
basangererekanire gokora omoroberio bw’ogonsiria,
11bateba, “Nyasae omotigire,
inchuo tomotunye, erinde tomobwate,
onde tari oranyare komotooria.”
12Aye Nyasae, tombeera aare,
Nyasae one, inchuo bwango onkonye!
13Ababisa abwo bakorigia obogima bwane, tiga basookigwe na gosirigwa kegima;
abwo bakorigia gonkora bobe,
tiga bachaywe na gochecherigwa mono.
14Korende inche nimbe nogosemeria botambe,
na nimbe nkona‐kogotogia mono goetania.
15Nimbe nkoraria ogokora kwao kw’oboronge nomonwa one.
Omobaso boira nimbe nkonagwatora ogotooreka kwao;
okwo kore okonene ntanyare gokorenga.
16Aye Omonene Nyasae, nimbe nkoraria ogokora kwao okonene,
nimbe nkona‐gotogia oboronge bwao,
ee, ningotogie aye bweka.
17Aye Nyasae, kwabeire gokonyorokereria korwa obwana bwane,
goika rero iga ningenderere konakoraria ogokora kwao kw’ogokumia.
18Aye Nyasae, tobaisa gonchwara ekero ndabe nagotire, namerire chimbuche chiarabire se,
goika imbe narareirie abanto b’ebiaare bigochi‐gocha chinguru chiao, na okobua kwao.
19Aye Nyasae, oboronge bwao boigete aaria igoro mono.
Aye nigo gwakorete amang’ana amanene mono.
Ee, Nyasae, ning’o ore buna aye?
20Ekero gwatotigete, nigo twaroche emechando emenge,
korende nonyare gotokora abayia naende;
torusie, ototiirie korwa ase chiirima chire ase ense.
21Aye omente obonene bwane,
na ondemie naende.
22Aye Nyasae one, nimbe nkobugia obokano ase okogotogia,
ekiagera aye nigo ore omwegenwa.
Nimbe nkogoterera ase okobugia obokano bw’ebirigisa,
aye Omochenu bw’Abaisraeli.
23Ning’ake eriogi rinene ri’omogoko nomonwa one,
ekero ndabe ngotera amatera akogotogia.
Nintere nomoyo one boigo, ekiagera aye gwantooririe.
24Omobaso boira oromeme rwane ndobe rokona‐gokwana igoro y’oboronge bwao,
erinde abwo barigetie gonkora bobe basookigwe na gochaywa.
Currently Selected:
ZABURI 71: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
