ZABURI 69
69
Omonyene oboronge okorera anyore ogotooreka
(Ogotera gwa Daudi)
1Nyasae, intoorie,
ekiagera amache aichoire, aikire ase omoyo one.
2Nigo ngendererete korimera ase etintira ime,
aase tari ase ndanyare gotacha namagoro.
Narimeire ase amache ase endiba entambe,
na emerindo yantubire.
3Narosire ekiagera nkona‐korera,
emioyo yane yomire pa.
Amaiso aane abeire orotutu,
nganyete Nyasae one.
4Abanto nigo bangechete bosa engencho ende etaiyo;
nigo bare abange kobua etukia ere ase omotwe one.
Ababisa baane nigo bagokwana oborimo igoro yane,
baganetie gosiria obogima bwane,
nigo bare ne chinguru chinyinge.
Nigo naakanete ebi ntaibete.
5Aye Nyasae, nomanyete oboriri bwane,
naki amamocho aane tabisekaneti korwa asore.
6Aye Nyasae bw’Emeganda,
totiga abanto abwo bagosemeretie, bare ime yane, barore obosooku.
Aye Nyasae bw’Abaisraeli,
totiga abanto abwo bagokorigia, bare ime yane, bachaywe.
7Inche nigo nachayirwe ase engencho yao,
obosooku bwatubire obosio bwane.
8Inche nabeire omogeni ase abanto baminto,
na omoeti ase abaminto twaiboretwe korwa ase enda eyemo.
9Risemi ri’enyomba yao riandire,
emerumi y’abwo bakoramete nigo yangwerete.
10Ekero nabete nkorera ase omoyo one na kweng’ata,
ngachaywa na gokwanwa bobe.
11Ekero neboyetie chigunia ase okweumia
bakaba bakondabaara.
12Inche ngokwanwa bobe nabwo bagoikaransa ang’e negeita kogamba,
abakonywa na gotinda bakoroisia amatera ay’ogonchecheria.
13Aye Omonene, naye ngosaba ase engaki yancheire.
Aye Nyasae, inyigwere,
ekiagera nigo ore nobwanchani botari koera,
naende nigo ore omwegenwa ase ogotooria.
14Ntoorie, tindimera ase etintira ime!
Ntoorie korwa ase ababisa baane,
na korwa ase amache ’endiba entambe.
15Totiga emerindo entube,
gose chindiba chimere,
gose engoro emumekerie.
16Omonene, ing’iranerie,
ekiagera obwanchani bwao bogendererete botambe nigo bore obuya,
ing’iranere, ekiagera amabera ao namange mono.
17Tobisa obosio bwao korwa asende inche omosomba oo;
inyigwe bwango, ekiagera inche nigo inde ase emechando emenene.
18Inchuo ang’e asende, omboorie,
nsibore korwa ase ababisa baane!
19Aye nomanyete amabe nakoreirwe,
na buna nasookigwe na gochaywa;
nigo omanyete ababisa baane bonsi.
20Amabe ayio nakoreirwe asionoire enkoro yane,
bono nerusirie moyo.
Nigo nasemeretie ng’a ndorerwe amabeebe, korende tinayaroreretwe;
nigo nasemeretie inyore abaremia, korende tinabanyora.
21Ekero narenge nenchara, abanto bakang’a amache ’endorwe ribaga ri’endagera,
na ekero narenge nerang’o, bakang’a chinkama nkanywa.
22Tiga endagera ere ase amasio abo, ebe egesugunia asebare,
na oboreba ase abwo bekagete ng’a mbuya bare.
23Oukorie amaiso abo:
otengechie chibachwa chiabo kogenderera.
24Obaumorere ekeririanda kiao,
na endamwamu yao yoke igoro yabo.
25Tiga omochie obo otigare bosa,
monto onde tamenya ase chiema chiabo.
26Abanto abwo nigo bachandete omonto oria kwaagete,
na bagokwana igoro y’obororo bw’oyio kwabetete.
27Menta obobe igoro ase obobe bwabo;
tobatiga basoe ase oboronge bwao.
28Tiga amarieta abo atinyigwe korwa ase ebuku y’abare moyo,
tarikwa amo nay’abanyene oboronge.
29Inche nigo inde ase emechando na obororo;
aye Nyasae, ogotooreka kwao konyimokererie igoro.
30Nintogie erieta ria Nyasae ase okomoterera;
nindarie obonene bwaye ase okoiraneria ng’a mbuya mono.
31Ayio naro aragokie Omonene kobua komoruera eng’ombe koba ekeng’wanso,
gose komoruera eeri ere ne chingunchara na ebitaago.
32Abwo bakoreire bobe mbarore ayio, bagoke;
inwe aba mokorigia Nyasae, tiga chinkoro chiaino chikorwe chinyia.
33Omonene nigo akoigwa abanto baria baremeire;
ere tari gochaya abanto baye abwo bare ase obosibwa.
34Tiga igoro na ense chitogie Omonene,
naboigo na enyancha, na ebitongwa bionsi bire imeo.
35Nyasae natoorie Sayoni na aagache emechie y’Abayuda naende,
abasomba baye mbayeire ebe eyabo na komenya aroro.
36Abanto b’ororeria rw’abasomba b’Omonene mbayeire ebe eyabo,
boigo nabanto baria banchete erieta ri’Omonene mbamenye aroro.
Currently Selected:
ZABURI 69: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
