ZABURI 68
68
Ogotera kw’egesaku ase engencho y’obobui
(Ogotera gwa Daudi)
1Tiga Nyasae aimokerere igoro, na ababisa baye basiarerwe,
abanto abwo bamogechete, tiga batame barue asare.
2Tiga baserigwe gochia aare, buna erioki rikoirwa aare;
abakori amabe tiga basirigwe barue ase obosio bwa Nyasae,
basirigwe buna obochoe bokonyititoka ase omorero.
3Korende abanyene oboronge tiga babe nomogoko omonene,
tiga babe nomochengo ase obosio bwa Nyasae,
babe bagotera bare nomogoko.
4Moterere Nyasae, tera amatera agotogia erieta riaye.
Moroiserie enchera ere agoetera ase chirooro.
Erieta riaye n’Omonene, kabe nomochengo ase obosio bwaye!
5Nyasae oria omenyete aase aye aachenu,
nere ise bwe chintakana, na omorendi bw’ababoraka.
6Nyasae nigo akoa abatigirwe bosa chinka ase bakomenya.
Nigo agosibora abanto basibire baseseneka,
korende abasaria nigo bakomenya ase ense enyomo pa.
7Aye Nyasae, ekero gwatang’anete abanto bao
na ogotaara ase erooro,
8ense nigo yatengechete,
embura egatwa korwa igoro,
na aye Nyasae nao kwarenge.
Nonya negetunwa gia Sinai nigo giatengechete,
ekero aye Nyasae kwarengeo;
aye ore Nyasae bw’Abaisraeli.
9Aye Nyasae, nigo kwarentete embura enyinge mono,
na igo omwando oo oria konya orosire okayoiraneria chinguru.
10Omoganda oo okanyora obomenyo aase agwo.
Aye Nyasae, ase engencho y’obuya bwao, kwaeire abanto abataka aya baremeire.
11Omonene akarua ogochika,
na omoganda omonene bw’abakungu bakararia amang’ana ayio:
12“Abaruoti b’abarwani esegi batamire, ee, batamire!”
Abakungu batigarete ase chinka ngwatanana bare ebisakorwa.
13Nonya bagendererete kobeera ase ameri e ching’ondi,
nigo bare buna amaruma are ne chimbaba chiatubire nefeta,
na amarionya abo atubire netahabu ekomeka‐meka.
14Ekero Omonene ore Omobui asiarerete abaruoti b’aase agwo,
amagena ’embura agatwa ase egetunwa gia Salimoni.
15Aye egetunwa kia Basani, nigo ore egetunwa kia Nyasae,
aye egetunwa kia Basani, nigo obwate ebichuria ebinge.
16Aye egetunwa ki’ebichuria ebinge,
nase ki okorigereria ne ribero
ase egetunwa ekio Nyasae achorire koba obomenyo bwaye?
Ee, Nyasae ochorire komenya aroro kogenderera botambe.
17Chigari chia Nyasae nigo chire chilifu chinyinge mono,
Omonene nigo are ase egati yabo buna nase Sinai, aase aye aachenu.
18Aye ogatiira gochia igoro ogoosa abasibwa,
na okanyora ebiegwa ase egati ya mwanyabanto,
ee, nonya nase egati y’abasaria,
ng’a aye Omonene Nyasae onyare komenya aroro.
19Omonene atogigwe,
rituko ase rituko nigo agotobogoreria chigurube chiaito.
Nyasae nere ogotooreka gwaito.
20Nyasae oito nigo are Nyasae ogotooria.
Nyasae ore Omonene nigo agototooria korwa ase amakweri.
21Omonene nasenyente emetwe y’ababisa baye,
nasenyente ebiore bire netukia bi’abwo
bakogenderera ne chinchera chiabo chi’ebibe.
22Korende Omonene agateba,
“Ning’iranie abanto abwo korwa Basani,
mbarente korwa ase chindiba chi’enyancha,
23erinde motache amanyinga abo namagoro aino,
ne chisese chiaino chinyore ebitari biabo bi’ababisa baino.”
24Aye Nyasae, omoganda oo ogotaara ororekanire;
ee, aye Nyasae one, na omoruoti one,
omoganda oria oo ogosoa ase obomenyo bwao obochenu.
25Abateri nigo batang’aine bosio,
nyuma yabo abakobugia amakano,
na ase egati yabo abaiseke bakobugia chinchigiri:
26“Inwe abamore ab’ororeria rw’Abaisraeli,
motogie Omonene Nyasae ase egati y’omosangererekano omonene.”
27Abanto ba Benjamin, abare abasinini mono ase egati yabo,
nao bare babatang’aine,
na abanene b’Abayuda nao bare
amo nomoganda obo,
na abanene b’Abasabuloni na ab’Abanafutali.
28Aye Nyasae, oorokia okobua kwao;
ee Nyasae, ayio gwatokoreire, genderera koyabeka chinguru.
29Abaruoti nigo bagokorentera ebiegwa
ime ase Hekalu yao ere agwo Yerusalemu.
30Togonyera eng’iti eria y’orosana emenyete ase ebitonto ime,
na amaicho e chieri amo ne chimori chiabo, nabwo abanto.
Togonyera abanto goika bekeyie na gokoruera chifeta chiabo.
Osiarere abanto banchete esegi.
31Abanto bare ne chinguru mbarue Misiri,
na abanto b’Etiopia baayerere koramborera Nyasae amaboko abo.
32Inwe amaruoti are ase ense, tera motogie Nyasae;
tera amatera ay’okomotogia Omonene!
33Moterere ere oria oriinete igoro,
igoro eria yarengeo korwa chingaki chia kare.
Rora, nigo agoaka eriogi riaye rire ne chinguru riaigugwa.
34Inwe raria okobua kwa Nyasae,
oyio obonene bwaye bore igoro y’Abaisraeli,
na okobua kwaye nigo kore igoro onsi.
35Nyasae nigo are oyo bw’okogosa korwa ase obomenyo bwaye obochenu;
ere Nyasae bw’Abaisraeli;
nigo akoa abanto baye okobua ne chinguru.
Nyasae atogigwe!
Currently Selected:
ZABURI 68: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
