ZABURI 59
59
Ogosaba gw’okonyora oborendi bwa Nyasae
(Ogotera gwa Daudi ekero Saulo atomete abanto bamoite)
1Aye Nyasae one, ntoorie korwa ase ababisa baane,
indende korwa ase abanto aba banyimokeire gonkora bobe.
2Nkonye korwa ase abakori amabe;
ntoorie korwa ase abaiteri amanyinga.
3Rora, abanto aba bebisete na komboera bang’ite,
abanto abatindi basangererekanire amo bankore bobe;
Omonene, ayio tari ase engencho y’ogosaria gose ebibe nakorire.
4Tindakora bobe bonde bokogera baminyoke gocha gonkora bobe.
Omonene imoka, orore amang’ana ayio, onkonye!
5Aye Omonene, Nyasae bw’Emeganda, naye Nyasae bw’Abaisraeli!
Imoka, orue egesusuro ase abanto b’ebisaku bionsi,
tobaisa gotigaria nonya noyomo ore moyo
ase abwo bagokora amabe ase obong’ainereria.
6Kera omogoroba nigo bakoirana,
baetanana omochie, bakoga buna chisese.
7Oise kobarigereria, orore buna bakona‐gokwana‐kwana!
Ebikoba biabo nigo bire buna emioro emioge,
bateba, “Ning’o oranyare gotoigwa?”
8Korende aye Omonene nigo okobasekerera,
aye nigo ogochecheria abanto bonsi batakomanyeti.
9Aye Nyasae ore chinguru chiane, nimbe nkoganyete,
ekiagera naye ore obotamero obokong’u.
10Nyasae one nigo agonchichera nobwanchani bwaye botari koera,
Nyasae one nankore nchenge igoro y’ababisa baane.
11Aye Omonene, enguba yaito, tobaisa kobaita!
Abanto baane nigo barabaise kweba.
Obaomboganie ase chinguru chiao,
erio omanye kobasiria.
12Ebibe nigo bire ase emenwa yabo,
na amang’ana bagokwana namabe.
Ase igo, tiga oboenenu bwabo bobabwate buna oboreba bokobwata.
Barabwo nigo bakoragereria na gokwana amang’ana ’oborimo.
13Ase ayio, obasirie nendamwamu yao;
basirie kegima, onde tanyorekana ore moyo nonya noyomo,
erio abanto b’ense yonsi mbamanye
ng’a Nyasae nere okogambera abanto ba Yakobo.
14Kera omogoroba nigo bakoirana,
baetanana omochie, bakoga buna chisese.
15Nigo bakoong’anya korigia endagera,
batayenyoreti nigo bakogeesa bokia.
16Korende inche nintere igoro y’okobua kwao,
kera emambia nintere neriogi rinene
igoro y’obwanchani bwao bogendererete botambe,
ekiagera ase chingaki chi’emechando
nigo kwabeire egekengero kiane na obotameru bwane.
17Aye Nyasae ore chinguru chiane, nintere ogotera gw’okogotogia;
aye naye egekengero kiane,
aye naye Nyasae onyanchete mono.
Currently Selected:
ZABURI 59: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
