ZABURI 44
44
Ogosaba gw’okonyora okorendwa okuya
(Ogotera kwa basinto ba Kora)
1Nyasae, intwe tweigwereire namato aito,
chisokoro chiaito nchiatotebetie
amang’ana gwakorete ase amatuko a kare.
2Aye omonyene nigo gwaseretie abanto b’ebisaku nokoboko kwao,
korende chisokoro chiaito okabarenta okabasimeka aroro;
nigo kwarentete emechando ase abanto b’ebisaku,
korende chisokoro chiaito okabamentekania bakaranda.
3Abanto bao tibairete ense eria ase okoyerwania nemioro,
gose tari chinguru chi’amaboko abo chiabarenterete obobui,
korende nokoboko kwao gw’okorio ne chinguru chi’amaboko ao,
amo noborabu bwaruete ase obosio bwao,
ekiagera aye nigo kwagogetigwe nabarabwo.
4Aye naye omoruoti one, na Nyasae one,
ase ayio, chika ng’a abanto b’ororeria rwa Yakobo baegwe obobui.
5Ase chinguru chiao nigo toraiyerie inse ababisa baito;
goetera ase erieta riao nigo toratiringere inse abwo bagocha gotorwania esegi.
6Inche tinsemeretie obota bwane; gose omoro one tong’a obobui.
7Korende naye gwatoete obobui igoro y’ababisa baito,
abwo batogechete nigo kwabasoogetie.
8Intwe ntogenderere gwetogia asore aye Nyasae,
ntobe tokoiraneria ng’a mbuya mono ase erieta riao kogenderera botambe.
9Nonya naboigo gwatotigire na gotosookia,
tori kogenda amo nabarwani baito b’esegi.
10Gwatokorire gotama ababisa baito,
na barabwo babeire bagosakora ebinto biaito.
11Aye kwarure ribaga toriegwe buna ching’ondi chikoriegwa,
gwatosiareire gochia ase abanto b’ebisaku.
12Aye kwaoonirie abanto bao ase rigori risinini mono;
tikwababekerete rigori rinene.
13Gwatokorire koba okogechia ase abanto baito;
twabeire togochaywa na gosekererwa nabanto batoetanaine.
14Gwatokorire koba omorabaaro ase egati y’abanto b’ebisaku,
twabeire togosingiserigwa emetwe nabanto.
15Ogochaywa kwane nigo kogendererete asende omobaso boira,
na obosooku bwatubire obosio bwane
16ekero nkoigwa amang’ana ’abagonchecheria na gonkwana bobe,
na ekero nkorora obosio bw’omobisa na obw’oyo okorusia egesiomba.
17Amang’ana aya onsi atonyorire,
nonya intwe titoraba togokweba,
gose titorasaria okobwatana kwao kw’ogotianania.
18Chinkoro chiaito tichionchogeti chigotige,
gose titotigeti kobwatia enchera yao,
19erinde otoake na gototuguta ase chisese chi’orosana chimenyete,
gose gototuba ekiriri ki’amakweri.
20Onye ntwebire erieta ria Nyasae oito,
gose ntwaramboire amaboko aito ase ogosasima enyasae ende eng’ao,
21Inee, Nyasae tari komanya amang’ana ayio?
Ere nigo amanyete obobisi bwonsi bore ime ase enkoro.
22Korende ase engencho yao nigo togoitwa omobaso boira,
nigo tokobarwa buna ching’ondi chikonyenywa.
23Aye Omonene, boka oimokerere igoro?
Nase ki oraire?
Boka, tototuguta kegima!
24Nase ki aye kwabisire obosio bwao korwa asetore?
Nase ki aye kwebire emechando yaito na ogokorerwa bobe gwaito?
25Amaene, emioyo yaito yaiyerigwe inse ase orotu,
emebere yaito yabwateranigwe inse ase riroba.
26Imokerera igoro, ochiche otokonye!
Ototoorie ase engencho y’obwanchani bwao bogendererete botambe.
Currently Selected:
ZABURI 44: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
