ZABURI 22
22
Okorera kw’obororo
(Ogotera gwa Daudi)
1Nyasae one, Nyasae one, naki gwantigire?
Nabeire nkorera ng’a ontoorie, korende kwambeereire aare.
2Aye Nyasae one! Nigo nkorera ase omobaso, korende tori kong’iraneria;
nase obotuko boigo, korende tindi konyora ogotimoka.
3Nonya naboigo, aye nigo ore omochenu;
aye obwate obonene, Abaisraeli nkogotogia bare.
4Chisokoro chiaito nigo chiagosemeretie,
ee, nigo chiagosemeretie, naye ogachitooria.
5Barabwo nigo barerete asore, bakanyora ogotooreka,
nigo babete bagosemeretie, na tibasoogetigwe.
6Inche nerikonde, tindi omonto,
nigo ngochecherigwa nabanto na gochaywa.
7Abanto bonsi abakondora nigo bagonchecheria na gonsekerera;
nigo bagoaka amariogi asende na gosinga‐singisia emetwe yabo,
8bagoteba, “Omonto oyo nigo asemeretie Omonene ng’a namotoorie,
tiga amotoorie, ekiagera agokirie nere!”
9Omonene, naye kwandusetie ase enda ya baba;
naye kwabete gokondenda buya ase amaboko a baba.
10Nigo narutetwe asore korwa ase okoiborwa kwane,
na korwa ekero narenge ase enda ya baba naye kwarenge Nyasae one.
11Tobaisa kobeera aare korwa asende, ekiagera emechando nigo ere ange,
na monto onde tari orankonye.
12Chieri chinyinge nching’etanaine,
ee, chieri chiria chia Basani chire ne chinguru nigo ching’etanaine.
13Baasamirie emenwa yabo gocha asende,
yabeire buna chindo chikoronya na koruma.
14Nabeire buna amache aiteirwe inse;
amauga onsi ay’omobere one achoga‐chogire;
enkoro yane yabeire buna obochoe, yanyititokire ime yane.
15Chinguru chiane chiang’ereire,
nabeire buna ekegionkorio ekiomo pa,
oromeme rwane rwabwatanire namang’ang’ura;
aye kwanyareirie ase amaroba nkwete.
16Chisese nigo ching’etanaine aande onsi,
ee, ekeombe ki’abakori amabe nigo kere chinsemo chionsi;
bambetire ebisanyi bi’amaboko, na ebi’amagoro boigo.
17Amauga ’omobere one atongororire ninyare koyabara;
abanto nigo bakondigereria na kogokera obobe bwane.
18Baatananire chianga chiane ase egati yabo;
baakeire eganchwa yaane obomera.
19Korende aye Omonene, tobeera aare korwa asende;
aye ore chinguru chiane, ayerera onkonye!
20Ntoorie korwa ase ogoitwa nomoro,
tooria obogima bwane korwa ase okobua gwe chisese chiria!
21Ntoorie, ondusie ase emenwa ye chindo chiria;
nkonya korwa ase chingunchara chie ching’era!
Ogotogia
22Nindarie erieta riao ase abaminto,
ase egati y’omosangererekano ningotogie.
23Inwe aba momoirogete Omonene, motogie!
Inwe mwensi ab’ororeria rwa Yakobo, togia obonene bwaye!
Inwe Abaisraeli bonsi, moiroke!
24Ere tari gochaya emechando y’abwo bachandegete, gose koyegecha,
tabisete obosio bwaye asebare;
ekero bamorangeretie nigo abaigwete.
25Ekero inde ase omosangererekano omonene ningotogie.
Chiira nariete ning’ikerane agwo ase obosio bw’abanto bamoirogete Omonene.
26Abwo bare abaitongo mbanyore endagera barie baigote.
Abanto bakorigia Omonene mbabe bakomotogia,
ne chinkoro chiaino nchigenderere koba moyo goika kare na kare.
27Abanto be chinsemo chionsi chi’ense mbainyore Omonene, bamoonchokere;
chiamate chionsi chi’ebisaku nchimosasime.
28Obogambi nobw’Omonene,
nere okogamba igoro ase ebisaku bionsi.
29Ee, abanto abatenenku bonsi bare ase ense
goika batung’ame ase obosio bw’Omonene,
abwo bonsi bakogenda ase chimbeera ime mbatung’ame ase obosio bwaye;
naboigo nabwo batanyare korenda obogima bwabo bogenderere.
30Abanto b’ororeria rwaye mbabe bakomokorera;
mbabe bagokwana igoro y’Omonene ase ebiaare bigochi‐gocha.
31Oboronge bwaye mbobe bokorarigwa ase abanto bataraiborwa,
ng’a ere oikeranirie onsi.
Currently Selected:
ZABURI 22: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
