EMERENG’ANIO 8
8
Obong’aini bogotogigwa
1Inee! Obong’aini tibori korangeria? Okomanya tikori goaka eriogi rinene?
2Obong’aini nigo bogotenena aase aimokererete igoro, ang’e nenchera engendi,
nigo bokobeera ase amatabekania e chinchera.
3Mbarabare ase ebiita bosio bw’omochie ase ebisoero bi’ebiita
nigo bogokwana neriogi rinene, bwateba;
4“Inwe abanto, ninwe nkorangeria;
eriogi riane nigo rigochera mwanyabanto.
5Inwe aba motamanyeti amange, egera obong’aini;
na inwe abariri, egera okomanya.
6Tegerera moigwe, ekiagera nigo ndakwane amang’ana amaya mono;
amang’ana akorwa ase omonwa one nay’oboronge.
7Amang’ana ngokwana nay’ekeene;
amang’ana ’obobe nigo are okogechia ase ebikoba biane.
8Amang’ana aane onsi ngokwana nigo are ay’oboronge,
ande tari are ay’oborimo, gose ay’obokorekanu.
9Nigo akoigweka buya ase omonto oyio okoyamanya,
naende namaronge ase abwo banyorire chisemi.
10Ancha amorokererio aane kobua efeta,
ne chisemi kobua etahabu echenire.
11Obong’aini nigo bore obuya kobua amagena akomeka‐meka aye rigori rinene,
tibokoreng’anigwa nebinto bionsi bire ebiya biganeirie.
12Inche obong’aini nakorire okomanya kwabeire obomenyo bwane,
nigo inde ne chisemi, naende nimanyete kogamba buya.
13Okomoiroka Omonene nokogecha obobe;
nigo ngechete oboenenu, na obwerori, na orogendo orobe,
boigo namang’ana ’obong’ainereria.
14Inche nigo nkorua ogosemia na obong’aini bw’ekeene;
nigo inde nokomanya na okobua.
15Ase obokonyi bwane abaruoti nigo bakogamba,
na abagambi nigo bakobeka amachiko ay’ekeene.
16Ase obokonyi bwane abagambi nigo bakogamba,
boigo nabanene na abanachi ebina bonsi.
17Nigo nyanchete abwo banyanchete;
na abwo bakondigia nomokia mbanyore.
18Ninche nkorua obonda na ogosikwa,
amo nobotenenku na oboronge bitari koera.
19Okwama nkorua nigo kore okuya kobua etahabu, ee, kobua etahabu engiya,
na ebitoki nkorua mbibuete efeta enchore.
20Nigo nkobwatia enchera y’oboronge,
naba ngotaara ase oboeto bw’ekeene.
21Nigo nkoa abwo banyanchete obotenenku na goichoria chikungo chiabo.
22Omonene nigo arenge nainche korwa omochakano bwe chinchera chiaye,
agwo kare konya ataratonga kende gionsi;
23nao narenge korwa agwo kare na kare,
nonya nense konya etarabao.
24Inche nigo naiboretwe chindiba chitarabao,
nonya ne chinsoko chi’amache.
25Nigo naiboretwe oboroso bw’ebitunwa botarabekwa,
na ebigoro bitarabao,
26ekero ataratonga ense ne riroba riaye,
nonya norotu.
27Ekero atongete igoro chionsi nao narenge,
boigo nekero abekerete amache chimbebe.
28Ekero abegete igoro ekabao,
na ekero abegete chinsoko chigosokia amache korwa ase chindiba ne chinguru,
29na ekero abekerete chinyancha chimbebe,
amache tabaisa goetania ogochika kwaye;
na ekero abegete amaroso ’ense nao narenge.
30Inche nigo narenge amo nere buna oyomanyete emeremo eyio buya.
Kera rituko nigo arenge kogokigwa nainche,
na inche nkaba inde nomogoko ase obosio bwaye botambe.
31Nigo nagokerete ense yaye emenyire nabanto,
na nkaba nsasokerete mwanyabanto.
32“Na bono, inwe abana baane, ntegerere moigwe,
mbasesenirie abwo barendete chinchera chiane,
33Igwera amorokererio!
Ancha obong’aini, timobwanga!
34Nasesenirie omonto oyio okonyigwera;
oyio okorenda ase ebiita biane kera rituko,
oganyete ase ebisieri biane.
35Omonto onyorire inche, oyio onyorire obogima;
naende nancherwe n’Omonene.
36Korende oyio otari nainche nigo akwenachera ekina ere omonyene.
Bonsi abangechete nigo banchete amakweri.”
Currently Selected:
EMERENG’ANIO 8: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
