EMERENG’ANIO 6
6
Ogokurerwa konde
1Omwana one, ande kwerure koba intenenera ase omonto omino, na kwarire eira ase omonto omoao na kobwatana nere amaboko. 2Bono amang’ana gwakwanete korwa ase omonwa oo akobwatire buna oboreba. 3Ase ayio omwana one, bono nigo ore inse y’okobua kw’omonto oyio, na onye korigetie gwetooria korwa asare okore iga: Kabe omoitongo, ogende asare omosorore, erinde agosibore korwa ase eira eyio. 4Tobaisa korara gose gosundoka; 5minyoka buna engabi egotama erue ase omotwari, na buna enyoni egotama erue ase omotegi.
6Aye ore omworo, genda ase amage, origererie orore buna agokora emeremo nomokia onyore obong’aini. 7Ayio tabwati omogambi, gose omoteneneri, gose omoraai, 8korende nigo agosangereria chindagera chiabo ekero chikonyorekana, achigacha goika ekero ki’eguru‐gura. 9Aye omworo, ngoika ririri oragenderere korara? Ndiriri oraboke korwa ase chitoro chiao? 10Orare ake igo, bwegondie ake igo; oringanie amaboko otimoke, 11erio obotaka mbogochere buna omouri agocha, na oboremerwa boche buna omonto obwate ebirwanero agocha.
12Omonto otagwenereti kende ore omokori amabe nigo agoeta‐eta, ogokwana oborimo korwa ase omonwa oye. 13Nigo agosimera ebioge bi’amaiso aye, naende nigo agosimera amagoro, na okworokia ebimanyererio namaboko aye. 14Ogoitania abanto nigo goichire ase enkoro yaye, botambe nigo akoroberia korenta amabe; nigo agosimeka chimbusuro chi’amariomana. 15Ase engencho eyio emechando nemochere mobosokano; nigo arasirigwe mobosokano atanyare gotoorigwa.
16Mbire ebinto bitano na ekemo Omonene agechete, ee, mbire bitano na bibere bire okogecha asare, nabio ebi:
17Okorigereria kw’oboenenu, na oromeme rogokwana oborimo,
na amaboko agoitera amanyinga atari na komocha;
18enkoro ekoroberia ebirengererio bi’amabe, na amagoro akominyoka gochia gokora amabe;
19kirori bw’oborimo, ogokwana oborimo,
na omonto ogosimeka chimbusuro chi’ogoitania ase egati y’abanto abamo.
Ogokurerwa gw’okwanga obonyaka
20Omwana one, igwera aya inche iso nkogochika, na totiga amorokererio a nyoko. 21Yasibe, agenderere kobeera botambe ase enkoro yao, naende oyasibe ase rigoti riao. 22Ekero orabe kogotaara, ayio nakoraae; ekero orabe koraire, nakorende, na ekero orabe gokoboka, ayio nakwane naye. 23Amachiko nigo are etaya, na amorokererio nigo are oborabu; ogokurera gw’okorongeigwa nigo kore enchera y’obogima. 24Nigo korakorende korwa ase omokungu omonyaka, na korwa ase amang’ana ’oromeme rwaye oroterere rokoebereria. 25Tobaisa komogania ase enkoro yao ime ase engencho y’ekieni kiaye ekiya; amaiso aye tabaisa gokong’usa. 26Ase engencho y’omokungu omotayayi omonto nigo akoremerwa oborwa nonya negesamunye ki’omogati, na omokungu bw’omonto omoao nigo akorigia obogima bw’omonto obosaria.
27Inee! Omonto nabogorie omorero ayobeke ase egekuba kiaye, ne chianga chiaye tichiyia? 28Gose nataare ase rieera ri’omorero, na amagoro aye tayia? 29Naboigo erabe ase omonto ogotomana nomokungu bw’omonto onde; onde bwensi okoba nomokungu oyio goika aegwe egesusuro. 30Abanto tibari gochaya omoibi onye ore koiba endagera ekiagera are nenchara. 31Nonya naboigo omoibi oria kanyorirwe, goika airanie ara gatano na kabere; nigo araakane ebinto bionsi abwate nyomba mwaye. 32Omonto ogotomana nomokungu onde bwensi, oyio tabwati chisemi; oyo ogokora ayio nigo agwesaria ere omonyene. 33Omonto oyio nigo arabe namaakwa naende asirie amasikani onsi, obosooku bwaye tibogotinyigwa boeere. 34Risemi nigo rigokora omosacha oba nekeririanda, na takoba namabera ekero akorusia egesiomba. 35Ere tagwancha embooria ende yonsi, naegwa ebiegwa ebinge takobiancha.
Currently Selected:
EMERENG’ANIO 6: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
