EMERENG’ANIO 23
23
6
1Ekero ogoikaransa koria endagera amo nomogambi, orengererie mono ng’a ning’o ore ase obosio bwao. 2Onye kore nenchara, obeke omoyio ase ring’orong’oche riao. 3Tobaisa kogania chindagera chiaye chinyansu, ekiagera nigo chire echi’obong’ainereria.
7
4Tobaisa gwechanda mono ng’a obe omonda; tobaisa gosemeria obong’aini bwao omonyene. 5Tobaisa korigereria ebio bire bosa, ekiagera obonda nigo bogochoma chimbaba, bwairuruka buna ensoti ekoiruruka yarimera igoro.
8
6Tobaisa koria endagera y’omonto ogokomogorera, gose tobaisa kogania chindagera chiaye chinyansu. 7Buna omonto akorengereria ime ase enkoro yaye, naboigo are. Nigo akogotebia, “Karie na konywa”, korende enkoro yaye tegwancheti. 8Ayio nigo aragere oroke endagera eria kwaria, naende amang’ana ao amaya asire bosa.
9
9Tobaisa gokwana amang’ana ao ase omonto omoriri aigwete, ekiagera nigo arachaye obong’aini bw’amang’ana ao.
10
10Tobaisa gotumana orobebe orokoro, gose totumana osoe ase emegondo ye chintakana, 11ekiagera Omobooria obo nigo are ne chinguru, ere nachirwanerere akorwanie aye.
11
12Karue enkoro yao oigwe amorokererio, na amato ao aigwe amang’ana e chisemi.
12
13Tobaisa gotiga korongeyia omwana oo; koramoake ekeranya, tagochia gokwa. 14Ee, koramoake ekeranya nigo oratoorie obogima bwaye korwa aase abakure.
13
15Omwana one, onye enkoro yao ekoba nobong’aini, rirorio enkoro yane nigo eragoke. 16Ekero ebikoba biao birakwane amang’ana amaronge, nigo ndabe nomogoko ime yane.
14
17Enkoro yao tebaisa koba ne ribero ase abanyene ebibe, korende aye ogenderere komoiroka Omonene kera rituko. 18Ekeene, eng’eria nekare bosio, na ogosemeria kwao tikogosira bosa.
15
19Aye omwana one, igwa na obe nobong’aini, naende orende enkoro yao ebwatie enchera endonge. 20Tobaisa koba ase egati y’abagotinda nedivai, gose ase egati y’abakoria chinyama bobe, 21ekiagera abagotinda, na abaria bobe, mbabe abataka; na obogondereria bwe chitoro nigo boraboyie omonto amachanchabe.
16
22Igwera iso okoiborete, na tobaisa gochaya nyoko ekero agotire.
23Gora ekeene, na tobaisa gokeoonia; boigo gora obong’aini, na amorokererio, na obomanyi.
24Ise bw’omonto ore omonyene oboronge nigo akoba nomogoko omonene. Ere oyoiboire omwana omomura omong’aini nagokigwe nere.
25Bagokie iso na nyoko, tiga oria okoiborete akogokere.
17
26Omwana one, ing’a enkoro yao, na amaiso ao tiga agokere chinchera chiane. 27Omokungu omotayayi nigo anga engoro entambe gochia inse, na omokungu bw’omonto onde nigo anga egesima ekenyerere. 28Ee, omokungu oyio nigo akoboera buna omouri, nigo akomentekania abasaria ase egati ya mwanyabanto.
18
29Ning’o oyio ore nobobe? Ning’o oyio oichanete? Ning’o oyio okorwana na kwerera? Ning’o oyio oakirwe chingoma chitagwenerete aakwe? Ning’o oyio obariiretie amaiso? 30Nabanto abwo bakona‐konywa edivai ase chingaki chintambe, na abwo bakona‐korigia konywa edivai yochoganirie neyende. 31Tobaisa korigereria edivai koyabariirire, ekero ekobera ase egekombe na koirana inse ng’ora ng’ora. 32Omoerio nigo ekoroma buna eng’iti na korasa buna rirubi. 33Amaiso ao nigo ararore amang’ana amageni, na ebirengererio biao mbibe ebikorekanu. 34Nigo orabe buna omonto oraire ase egati‐gati y’enyancha, gose buna omonto ore ase omote omotambe igoro okoirwa esiororia. 35Aye nigo oratebe, “Nigo bang’agete bororo, korende tinyigweti bobe; nigo bang’wanetie bokong’u, korende tinyigweti kende. Indi ngocha koboka? Ngende korigia eyende.”
Currently Selected:
EMERENG’ANIO 23: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
