OMOBARO 32
32
Ebisaku bire moocha ya Yorodan
(Okoir 3:12–22)
1Abanto b’egesaku kia Reuben, na ab’ekia Gadi, nigo babwate amaicho amange mono. Ekero baroche ense ya Yaeseri na eya Gileadi ng’a nigo chire chingiya ase oborisia, 2bakagenda ase Musa, na Eleazari omokuani, na ase abaraai b’omoganda bw’Abaisraeli, bakabatebia, 3“Ataroti, na Diboni, na Yaeseri, na Nimura, na Hesiboni, na Eleali, na Sibamu, na Nebo, na Beoni, 4nemechie y’ense eyio Omonene atigete omoganda bw’Abaisraeli okayebua, na ense eye nigo ere engiya ase oborisia bwe chitugo, na intwe abasomba bao nigo tobwate amaicho amange e chitugo.” 5Naende bagateba, “Onye twanyorire ogwancherwa korwa asore, tiga intwe, abasomba bao, toegwe ense eye ebe eyaito, korende tobaisa gotwambokia gochia ng’umbu ya Yorodan komenyao.”
6Musa agakwana nabanto ba Gadi na aba Reuben, akabora, “Inee! Abanto bamino nigo bakogenda korwana esegi, nainwe mobe motigarete aase aa? 7Nase ki inwe mogoita Abaisraeli emioyo, erinde tibabaisa kwamboka gochia ng’umbu ya Yorodan, na koira ense eria Omonene abaeire? 8Amang’ana aya naro chisokoro chiaino chiakorete ekero nabatomete korwa Kadeshi‐Barinea gochia koroota ense eyio. 9Barabwo bakagenda bagaika ase ense omweya y’Esikoli, na ekero baroche ense eria, bakairana bagaita Abaisraeli emioyo ase ogotagenda ase ense eria Omonene konya abaeire. 10Ase rituko riria Omonene akaba nendamwamu enene, agatiana, akabora: 11Ekeene ase abanto bonsi baruete Misiri, aba bakoorire emiaka emerongo ebere na goetania, onde tari, nonya noyomo oranyare korora ense eria narierete Ibrahimu, na Isaka, na Yakobo eira ng’a nimbae, ekiagera abanto aba bangire koba abegenwa asende. 12Ase barabwo onde tari oranyare goika aroro otatiga Kalebu, mosinto o Yefune Omokenisi, na Yoshua, mosinto o Nuni. Barabwo nabaike aroro, ekiagera babeire abegenwa asende, inche Omonene. 13Omonene akaba nendamwamu enene ase Abaisraeli, akabatiga bakana‐goetanana ase erooro ase engaki y’emiaka emerongo ene, goika abanto bonsi b’ekiaare keria, abwo konya bakorire ebibe ase Omonene, bagasirigwa kegima. 14Na bono, inwe oroiboro rw’abanto abanyabibe, mwabeire mamincha y’Omonene, buna chisokoro chiaino chiarenge, na mwagerire Omonene omentire endamwamu yaye ase Abaisraeli. 15Inwe komoraange koigwera Omonene, ere nigo aratige abanto aba bonsi agwo ase erooro, nainwe mogere abanto aba bonsi basire.”
16Abanto b’egesaku kia Reuben, na ab’ekia Gadi bagacha ase Musa bakabora, “Toe ribaga toagache ameri amakong’u aiga ase chitugo chiaito chikobeera, naende toagache emechie egiteire chindwaki ase abana baito baramenye. 17Erio intwe toimokie ebirwanero bi esegi, twebeke ang’e totang’ane Abaisraeli korwana esegi goika tobaikie aase abo. Korende abana baito batigare aa, bamenyete emechie egiteire chindwaki, erinde abanto b’ense eye tibabaisa kobakora bobe. 18Titokoirana ase chinka chiaito goika torore ng’a Abaisraeli baminto banyorire kera omonto orogongo rw’omwando oye. 19Intwe titokonyora omwando oito amo nabarabwo agwo ng’umbu ya Yorodan, ekiagera twanyorire omwando oito aiga moocha ya Yorodan.”
20Musa akabairaneria, agateba, “Onye mogochia gokora bo, rirorio bogoria ebirwanero biaino bi’esegi ase obosio bw’Omonene, erio mogende korwana esegi. 21Kera omonto ore asemore, oyobogoretie ebirwanero bi’esegi nigo aramboke gochia ng’umbu ya Yorodan, ase obosio bw’Omonene: mobeereo goika ere abue ababisa baye barue asare, 22na ense eria ebe yabuirwe ase Omonene. Nyuma y’ayio nario moranyare koirana aiga motari na komocha, na igo monyore ense eye ebe eyaino, monyare komenya ase obosio bw’Omonene. 23Korende motaikeraneti chiira chiaino mwarire, ekeene rirorio mwakorire ebibe ase Omonene, na mobe nobomaene ng’a nase engencho y’ebibe ebio biaino moranyore egesusuro. 24Ase ayio agacha emechie ase abana baino baramenye na ameri ase ching’ondi chiaino, erio mokore buna mwarire chiira chiaino.”
25Erio abanto b’egesaku kia Gadi na ab’ekia Reuben bakamotebia Musa, “Omonene oito, intwe abasomba bao inatokore buna gwachikire. 26Abana baito na abakungu barabwo tiga batigare amo ne ching’ondi ne chiombe chiaito aiga ase emechie ya Gileadi. 27Korende intwe abasomba bao, kera oyomo oito oyobogoretie ebirwanero bi’okorwana esegi agwo ase obosio bw’Omonene namboke gochia ng’umbu, buna aye omonene oito gwachikire.”
28Igoro y’amang’ana ’abanto abwo, Musa agachika Eleazari omokuani, na Yoshua, mosinto o Nuni, na abaraai be chiamate chi’ebisaku bi’Abaisraeli, 29akabatebia, “Onye Abagadi na Abareuben, abwo bonsi babogoretie ebirwanero bi’esegi, bakwamboka Yorodan amo nainwe korwana esegi ase obosio bw’Omonene, na inwe mobue ense eria, na koyeira, erio mobae ense ya Gileadi ebe eyabo. 30Korende onye tibakobogoria ebirwanero bi’esegi bamboke gochia ng’umbu ya Yorodan, rirorio nigo baranyore orogongo rwabo amo nainwe agwo ase ense ya Kanani.”
31Abagadi na Abareuben bakairaneria, bagateba, “Buna Omonene atochikire intwe abasomba bao, nabo torakore. 32Intwe ntobogorie ebirwanero biaito bi’esegi, na twamboke gochia ase ense ya Kanani ase obosio bw’Omonene, erio nario toratware ense eye ere aa moocha ya Yorodan ebe eyaito.”
33Ase ayio Musa akaa abanto b’egesaku kia Gadi, na ab’ekia Reuben, amo nekeng’ese ki’egesaku kia Manase, mosinto o Yusufu, orogongo rwa Sihoni, omoruoti bw’Abaamori, na orw’Ogi, omoruoti o Basani. Amo nechio akabaa emechie y’ense eria amo ne chinse chiaetanaineo. 34Abagadi bakaagacha emechie ya Diboni, na Ataroti, na Aroeri, 35na Ataroti‐Shofani, na Yaeseri, ne Yogibea, 36na Beti‐Nimura, na Beti‐Harani, emechie yagiteire chindwaki, naende yabwate ameri e ching’ondi. 37Abareuben bakaagacha emechie ya Hesiboni, na Eleale, na Kiriataimu, 38Nebo, na Baali‐Meoni (amarieta abo akaonchorwa), na Sibuma. Boigo bakaroka emechie eyio baagachete ase amarieta ande amayia.
39Abanto ba Makiri, mosinto o Manase, bakagenda bakaumokera ense ya Gileadi, bagaseria Abaamori bamenyeteo, erio bakaira ense eria. 40Musa akaa abanto ba Makiri, mosinto o Manase, ense ya Gileadi, na barabwo bakamenyao.
41Yairi, mosinto o Manase, akagenda, akaumokera na koira emechie emeke y’ense ya Gileadi, akayeroka Emechie ya Yairi. 42Na Noba nere akagenda akaumokera na koira Kenati amo nebichie biaetanaineo, nere akaroka Kenati Noba, erieta riaye omonyene.
Currently Selected:
OMOBARO 32: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
