OMOBARO 16
16
Ogosaria gwa Kora, na Datani, na Abiiramu
1Kora, mosinto o Isari, Omolawi bw’eamate ya Kohati, na Datani, na Abiiramu, basinto b’Eliabu, na Oni, mosinto o Peleti bw’egesaku kia Reuben, 2bakabwatana, bakaanga koigwera Musa. Amo nabwo mbarenge abanto bande b’Abaisraeli, amagana abere, na emerongo etano. Abwo barenge abaraai bachorire korwa ase omosangererekano, bamanyekanete, naende basikire. 3Barabwo bakabwatana, bakaba mamincha ya Musa na Haroni, bakabatebia, “Bono ayio aisanire. Abanto bonsi b’omoganda oyo nigo bare abachenu; Omonene nigo are amo na kera oyomo. Nase ki rende inwe mweimokereirie igoro na mogwekora abanene igoro y’omosangererekano bw’Omonene?”
4Ekero Musa aigwete amang’ana ayio agatung’ama inse akaumama. 5Erio agakwana na Kora na abanto bonsi b’ekeombe kiaye, akabatebia, “Ankio mambia Omonene nache aorokie ng’a ning’o ore oyoye, naende ning’o ore omochenu na ning’o arae ribaga amoike ang’e. Nache arente omonto oyo achorire aike ang’e nere. 6Ankio mambia moche mokore iga: Aye Kora amo na bonsi abagokobwatia, moimokie chindogio, 7mwanchare omorero mobekeo, na igoro y’omorero oyio mobeke ubani, naende mochirente ase obosio bw’Omonene. Omonto oria Omonene arachore, nere oyio orabe oria omochenu. Inwe Abalawi, bono ayio abaisanire.”
8Musa akagenderera gokwana na Kora, agateba, “Bono inwe Abalawi, igwa! 9Inee! Nigo moroche ng’a negento egesinini asemore ng’a Nyasae bw’Abaisraeli obaatananire inwe korwa ase omoganda bw’Abaisraeli, na kobarenta mobe ang’e nere, na komokorera Omonene ase Obomenyo bwaye Obochenu, na gotenenera omoganda bw’abanto, na kobakorera? 10Omonene nigo akoete aye amo n’Abalawi bamino ribaga mobeere ang’e nere. Inee! Igo mokorigia obokuani boigo? 11Haroni ninki aisaine inwe mwamwemurunganeirie mamincha yaye? Ase ayio, mwerende, aye amo na bonsi abagokobwatia. Igo mwasangererekanire mamincha y’Omonene.”
12Erio Musa akarangeria Datani na Abiiramu, basinto b’Eliabu. Barabwo bakairaneria, “Intwe titogocha. 13Inee! Aya namang’ana amagusu asore ng’a gwatorusetie korwa ase ense eria entenenku ere namabeere na amooke, na ogatorenta aa, erinde otoite tokwere aa ase erooro eye? Na bono aye nigo ogwekora koba omonene igoro asetore? 14Naende nonya naboigo, aye totorenteti ase ense eria entenenku ere namabeere na amooke, gose totoeti emiando y’amaremo na emegondo y’emesabibu. Inee! Igo ogochia kobaukoria abanto aba bonsi? Intwe titogocha.”
15Musa akagechigwa mono, agatebia Omonene, “Tobaisa gwanchera ebing’wanso biabo. Inche tindaira nonya netigere yabo eyemo, gose tindakorera nonya noyomo obo bobe.”
16Musa agatebia Kora, “Ankio aye amo na bonsi abagokobwatia mochiche ase obosio bw’Omonene. Haroni nere nache boigo. 17Kera oyomo oino aimokie orogio rwaye rw’omorero, na arobekere ubani na kororenta ase obosio bw’Omonene. Chindogio chionsi nigo chirabe amagana abere, na emerongo etano; naye orente orwao, na Haroni nere arente orwaye.” 18Ase ayio kera omonto akaimokia orogio rwaye, akarobeka omorero, na igoro yaye ubani, bagacha bagatenena ase egesoero ki’Eema y’Omosangererekano. Musa na Haroni bagatenenenao boigo. 19Erio Kora agasangereria omoganda bwonsi, na barabwo bagatenena bosio bwa Musa na Haroni agwo ase egesoero ki’Eema eria. Erio obonene bw’Omonene bokaorokera omoganda bwonsi. 20Omonene agakwana na Musa na Haroni, akabatebia, 21“Tigera, morue ase abanto b’omoganda oyo, erinde mbasirie ara rimo.”
22Musa na Haroni bagatung’ama inse bakaumama, bagateba, “Aye Nyasae, Nyasae okorua obogima ase abanto bonsi, Inee, omonto oyomo gakorire ebibe, naye igo okogechigwa nomoganda oyo bwonsi?”
23Omonene agakwana na Musa, akamotebia, 24“Kwana nomoganda bw’abanto oyotebie: Tigera morue aase aetanaine chiema chia Kora, na Datani, na Abiiramu.”
25Musa akaimoka amo nabagaaka b’Abaisraeli, bakagenda ase Datani na Abiiramu. 26Erio agatebia omoganda bwonsi bw’abanto, “Eatanane, nabasoroire, morue ase chiema chi’abanto aba abakori amabe. Timobaisa gokuna gento kende gionsi kiabo; moise kogekuna nigo mogochia gosirigwa ase engencho y’ebibe biabo bionsi.” 27Ase ayio abanto abwo bageatanana bakarua ase chiema chia Kora, na Datani, na Abiiramu.
Datani na Abiiramu bagasoka isiko, amo nabakungu babo na abana babo, abanene na abake, bagatenena ase ebisoero bie chiema chiabo. 28Musa agatebia abanto, “Ase aya namomanye ng’a Omonene ontomire gokora aya onsi, naende ng’a tari inche omonyene nebegete gokora buna inyanchete. 29Onye abanto aba bagochia gokwa buna mwanyabanto onde bwensi agokwa, gose bakonyora egesusuro buna mwanyabanto onde bwensi akonyora, rirorio Omonene tantometi. 30Korende onye Omonene ogochia gokora egento ekeyia, erinde riroba ritandoke, rimere abanto abwo amo nebinto biabo bionsi, na barabwo barimere riroba ime bare moyo, bagende gochia aase abakure, erio namomanye ng’a abanto aba bachayire Omonene.”
31Ekero Musa akoorire gokwana amang’ana aya onsi, riroba rigatandoka inse yabo. 32Riroba rikabwereka, rikabamera, amo ne chiamate chiabo, na abanto bonsi ababwatetie Kora, amo nebinto biabo bionsi. 33Ase ayio barabwo bonsi bakamerwa bare moyo, bakagenda gochia aase abakure, boigo nebinto biabo, erio riroba rikairanerana, rikabatindeka, na barabwo bagasirigwa bakarua ase omosangererekano oria. 34Abaisraeli bonsi abarenge ang’e nabarabwo bagatama, bakarera, bakobora, “Boigo naintwe riroba ndibaise gotomera.”
35Erio omorero okarua ase Omonene, ogasamba abanto baria amagana abere, na emerongo etano, abwo konya barentire ubani.
Chindogio chi’omorero
36Omonene agakwana na Musa, akamotebia, 37“Tebia Eleazari, omomura o Haroni omokuani, ng’a arusie chindogio chiria chi’omorero korwa ase omorero oyio ogwoka, na omorero oyio ayosiare gochia aare. Chindogio chiria chi’omorero konya chiabeire chinchenu. 38Chindogio echio chi’abanto baria basirete ekiagera bakorete ebibe, tiga chisunyuntwe chiroisigwe, chibe ekemumeko gekomumeka egesasimero, ekiagera abanto baria nigo bachiruete ase obosio bw’Omonene; ase ayio chindogio echio konya chiabeire chinchenu. Echio nachio ekemanyererio ki’ogokurera.” 39Nabo Eleazari omokuani akaimokia chindogio chiria chi’etaai, echio abanto baria omorero osambete konya barentire ase obosio bw’Omonene. Echio chikaroisigwa, chikaba ekemumeko ki’egesasimero. 40Ekio nakebe ekemanyererio ki’ogokurera Abaisraeli, ng’a nonya noyomo otari omokuani, otari bw’ororeria rwa Haroni, tabaisa goika ang’e gosamba ubani ase obosio bw’Omonene. Aise gokora bo, nasire buna Kora amo nabanto baria bamobwatetie basirete. Aya onsi nigo akoretwe buna Omonene konya achikire Eleazari goetera ase Musa.
Haroni ogotooria abanto
41Korende rituko ria kabere, omoganda bwonsi bw’Abaisraeli okemurunganeria Musa na Haroni, okabora,
“Ninwe mwaitire abanto b’Omonene.” 42Ekero omoganda oria konya osangererekanire amo ase okoba mamincha ya Musa na Haroni, barabwo bakeonchora bakarigereria Eema y’Omosangererekano bakarora riire riayetubire, na obonene bw’Omonene bokaoroka. 43Musa na Haroni bagacha bosio bw’Eema eria. 44Na Omonene agatebia Musa, 45“Karue ase omoganda oyo, otigere gochia aare, erio inche mbasirie ara rimo.”
Musa na Haroni bagatung’ama inse bakaumama. 46Musa agatebia Haroni, “Imokia orogio rwao rw’ogosambera ubani rusia omorero ase egesasimero oyobeke igoro yaye, erio obeke ubani igoro ase omorero oyio, oroimokie ogende bwango ase omoganda bw’abanto, erinde okore okobwatanigwa asebare, ekiagera Omonene obeire nendamwamu: amaakwa achakire goita abanto.” 47Haroni akaimokia orogio rwa ubani buna Musa amotebetie, akaminyoka gochia ase egati y’omoganda oria. Amaakwa konya achakire ase egati y’abanto, korende Haroni akabeka ubani ase orogio roria, agakora okobwatanigwa asebare. 48Ekero Haroni atenenete gati gati ya baria bakwete na baria barenge moyo, amaakwa aria agatiga goita abanto. 49Abanto konya bakure nigo barenge chilifu ikomi na inye, na amagana atano na abere (14,700). Baria bakwete ase ogosaria gwa Kora tibarenge ase omobaro oyo. 50Ekero amaakwa atigete goita abanto, Haroni akairana ase Musa agwo ase egesoero ki’Eema y’Omosangererekano.
Currently Selected:
OMOBARO 16: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
