MIKA 5
5
1Aye Omochie bw’emeganda, sangereria emeganda yao y’esegi. Ababisa banaaririe omochie oito bayorwanie esegi. Barabwo mbaake omogambi bw’Abaisraeli orosea rwaye nenyimbo.
Eira ya Nyasae igoro y’Omogambi orarwe Bethlehemu
2“Korende aye Bethlehemu Efarata, aye ore omoke ase egati ye chiamate chi’egesaku ki’Abayuda, korwa asore nang’orokere oyomo orabe omogambi bw’Abaisraeli. Oyio nao arenge korwa agwo kare, ee, korwa kare na kare.”
3Ase ayio Omonene natige abanto baye goika engaki eike, ekero oyio okobina araibore; erio nario abanto bamwabo abatigari barairane gocha ase Abaisraeli. 4Ekero oyio oraiborwe arache, narisie riicho riaye ore ne chinguru chi’Omonene, ee, narisie nobonene bw’erieta ri’Omonene, Nyasae oye. Riicho riaye ndibe rirendire buya, ekiagera bono ere nabe omonene goika chinsinyo chionsi chi’ense. 5Omorisia oyio nabe omorembe oito.
Ogotooreka na egesusuro
Ekero Abaasuri barache ase ense yaito gotorwania na basoe ase chinyomba chiaito chi’obonene, intwe ntosokie abarisia batano na babere, na abagambi batano na batato, babatange. 6Barabwo mbasirie ense y’Abaasuri nemioro, na ense ya Nimurodi bayesirie nemeyio ya birende. Boigo mbatotoorie korwa ase Abaasuri ekero barasoe ase ense yaito goetera ase chimbebe chiaito.
7Erio abatigari ba Yakobo mbabe ase egati y’abanto b’ebisaku ebinge, buna riime rigotonya korwa ase Omonene, na buna embura engiya egotwera obonyansi, embura eria tegotebana koganya monto gete, gose mwanyabanto onde bwensi. 8Ee, abatigari abwo ba Yakobo mbabe ase egati y’abanto b’ebisaku ebinge, babe buna endo ere ase egati ye ching’iti chire ase rinani, na buna endo ensae ere ase egati ye riicho rie ching’ondi, eyio ekero yasoire ase riicho nigo egotachera inse na gotandorana eyaitire, na onde tari oranyare koyetooria. 9Ase enchera eyio amaboko aino naimokererigwe igoro y’abachandi baino, na inwe mosirie kegima ababisa baino bonsi.
10Omonene nigo agoteba iga: “Ase rituko erio ninsirie chibarasi chiaino, ne chigari chiaino chirue asemore kegima. 11Ninsarie emechie yonsi ere ase ense yaino, naende nintagore chindwaki chiaino echio mogwekengera. 12Ninsirie oborogi korwa ase amaboko aino, na abaringoria tibakonyorekana asemore nonya ng’ake. 13Ninsirie emegwekano yaino yonsi amo, ne chisiiro chiaino, ebinto ebio mogosasima, na inwe timokogenderera gosasima emeremo y’amaboko aino. 14Ninsimore emete y’Asera eyio mogosasima, ninyerusie korwa asemore, ninkore emechie yaino ebe bosa. 15Ninyeruserie egesiomba ase abanto b’ebisaku, abwo batari koigwera, inde nendamwamu na ekeririanda.”
Currently Selected:
MIKA 5: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
