MIKA 4
4
Omonene nomogambi bw’omorembe ase ense yonsi
1Nebe ase amatuko ’omoerio ng’a
egetunwa ki’enyomba y’Omonene ngekong’igwe,
kebe ekenene goetania ebitunwa binde,
nkeimokererigwe igoro goetania ebigoro binde;
abanto abange mbaendoke gochiao.
2Abanto b’ebisaku ebinge mbabe bakogendao bagoteba:
“Inchuo totiire gochia ase egetunwa ki’Omonene,
gochia ase enyomba ya Nyasae o Yakobo,
erinde atworokererie chinchera chiaye,
na intwe tochibwatie.”
Amachiko narue Sayoni,
ne ring’ana ri’Omonene ndiiche korwa Yerusalemu.
3Erio Omonene nanache ekina ase egati y’abanto abange,
nagambie boronge ebisaku bire ne chinguru bimenyete aare.
Abanto mbature emioro yabo y’esegi ebe amakombe,
na amatimo abo abe emeyio chinkuro.
Egesaku ekemo tigekoimoka korwania ekende,
gose abanto tibakweorokereria korwana esegi nonya ng’ake.
4Kera omonto nigo araikaranse inse y’emesabibu yaye na ase emeko yaye,
na onde takoboboyia,
ekiagera Omonene bw’Emeganda nere okwanire ayio.
5Kera egesaku nigo kerabwatie erieta ri’enyasae yaye,
korende intwe nigo torabwatie erieta ri’Omonene Nyasae oito goika kare na kare.
Abaisraeli mbairane korwa ase obosomba
6Omonene nigo agoteba iga: “Ase rituko erio ninsangererie ebirema, naende ninsangererie abwo naseretie, na bonsi abwo naete amaakwa. 7Nintige abare ebirema babe abatigari, na abwo baseretigwe babe egesaku kere ne chinguru. Omonene nabagambere agwo ase Egetunwa gia Sayoni, korwa bono na goika kare na kare.
8“Naye Omorobiri bw’Oborendi, aye ekegoro ki’omochie o Sayoni, obogambi bwao obokoro mbokoiranere, ee, obogambi bw’omochie o Yerusalemu.” 9Bono, ninki okorera neriogi rinene? Inee! Omoruoti tari ime yao? Abasemia bao mbasirigwe goika kwabeire nobororo buna obw’omokungu okobina aibore? 10Inwe abanto ba Sayoni, bina moigwe obororo buna obw’omokungu okobina aibore; korwa bono karue ase omochie, momenye ase chinsana. Mogende Babeli, na aroro motoorigwe. Aroro agwo Omonene nabatoorie korwa ase amaboko ’ababisa baino. 11Bono abanto b’ebisaku ebinge basangererekanire amo babarwanie esegi, bagoteba: “Tiga omochie oyio okorwe obe oyotachenegeti, naintwe tobe torigereretie Sayoni.” 12Korende abanto abwo tibamanyeti ebirengererio bi’Omonene, gose tibamanyeti omoroberio oye ng’a obasangereirie amo buna emesaima ere ase ekeooreri gi’okoorera.
13“Inwe abanto ba Sayoni, imoka moore, ekiagera ninkore chingunchara chiaino chibe echi’ebioma, na ebitaago biaino bibe ebi’etaai, erinde moake abanto abange, mobasamunyore.”
Ebinto biabo morasakore mobiatanane bibe ebichenu ase Omonene, ne chinibo chiabo chibe echi’Omonene bw’ense engima.
Currently Selected:
MIKA 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
