ABALAWI 8
8
Haroni na abamura baye bagwatananwa ase emeremo y’obokuani
1Omonene agakwana na Musa, akamotebia, 2“Ira Haroni na abamura baye amo ne chianga chiabo chi’obokuani, na amaguta akweakwa, na eeri ekoruegwa ekeng’wanso ki’ebibe, ne chimingichi ibere, na egetonga kere nemegati etabekiri memera. 3Naende orangerie omoganda bwonsi osangererekane ase egesoero ki’Eema y’Omosangererekano.”
4Musa agakora buna Omonene amochigete, na ekero omoganda bwonsi osangererekanete ase egesoero ki’Eema y’Omosangererekano, 5Musa akayotebia. “Aya naro Omonene achikire akorwe.”
6Musa akarenta Haroni na abamura baye, akabasibia namache. 7Akabekera Haroni eganchwa erobekanire eigete inse, na eganchwa eria ende, akamoboeria norokini. Naende akamobekera egesibao ki’obokuani, akamoboeria norokini rw’egesibao roroisirie nomonto omong’aini. 8Erio akamobekera egesembe, na ime ase egesembe ekio akabeka Urimu na Tumimu (omobaso na oboikeranu). 9Akamobekera ekegogwa ase omotwe oye, na bosio ase ekegogwa ekio agasiberania ekemanyererio egechenu gi’etahabu kiarenge kworokia ng’a bwatananirwe. Ase igo Musa agakora buna Omonene amochigete.
10Musa akaimokia amaguta akweakwa, agaaka Obomenyo Obochenu, na kera egento kiarenge imeo, akabiatanana bikaba ebichenu. 11Akanyororokeria egesasimero namaguta akweakwa ara gatano na kabere, naende agaaka egesasimero amaguta aria, agaaka nebikorero bionsi, na egetuba amo nenterekerero yaye ase okobiatanana bibe ebichenu. 12Akaumora amaguta akweakwa igoro ase omotwe o Haroni, na akamoaka amaguta ase okomwatanana na komochena. 13Naende Musa akarenta abamura ba Haroni, akababekera chiganchwa, akababoeria chinkini na akababekera ebigogwa ebike ase emetwe yabo, buna Omonene amochigete.
14Musa akarenta eeri ebe ekeng’wanso ki’ebibe, erio Haroni amo nabamura baye bakabeka amaboko abo igoro ase omotwe bw’eeri eyio. 15Eeri eyio ekanyenywa, erio Musa agatobeka ekiara kiaye ase amanyinga ’eeri eyio, akayagindia ase emegwekano yonsi ye chingunchara ere ase chikoona chi’egesasimero, na agachena egesasimero; na amanyinga aria atigarete akayaumora ase egesasimero inse, akagiatanana na kogechena, na igo akagekorera okobwatanigwa. 16Akaimokia ebitinya bionsi biarenge ase chinyama chi’enda, na ebitinya bie riini, ne chinyigo chionsi ibere amo nebitinya bichitubete, Erio Musa akabisambera ase egesasimero. 17Korende ebiatigarete korwa ase eeri eria, riiyo riaye, ne chinyama, na esike, akabisokia isiko y’egetwori akabisambera aroro, buna Omonene amochigete.
18Erio akarenta emingichi ebe ekeng’wanso ki’ogosambwa, na Haroni amo nabamura baye bakabeka amaboko abo ase omotwe bw’emingichi eyio. 19Emingichi eyio ekanyenywa, na Musa agasiara amanyinga ’emingichi eyio ase egesasimero chinsemo chionsi. 20-21Akanachana chinyama chi’emingichi eyio chikaba ebitari, agasibia chinyama chi’enda na ebirenge namache. Erio agasamba omotwe, na ebitari biria, na ebitinya, ne chinyama chionsi chi’emingichi eyio ase egesasimero. Emingichi eyio ekaba ekeng’wanso kegosambwa nomorero, kere ne rimisu rigiya rikomogwenera Omonene. Naboigo Omonene achigete Musa.
22Musa akarenta emingichi ya kabere, eyio yaruetwe ase ogwatanana abakuani ase emeremo emechenu, Haroni na abamura baye bakabeka amaboko abo igoro ase omotwe bw’emingichi eyio. 23Emingichi eyio ekanyenywa, na Musa akaimokia amanyinga make, akagindia mesia y’ogoto kwa borio kwa Haroni, na ekiara ekenene gi’okoboko kwaye kwa borio, na ekiara ekenene gi’okogoro kwaye kwa borio. 24Boigo abamura ba Haroni bakarentwa na Musa akagindia amanyinga mesia y’amato abo a borio, na ebiara ebinene bi’amaboko abo a borio, na ebiara ebinene bi’amagoro abo a borio. Erio amanyinga aria atigarete akayasiarera ase egesasimero chinsemo chionsi. 25Akaimokia ebitinya, na omokera, na ebitinya bionsi bie chinyama chi’enda, na ebitinya bie riini, ne chinyigo ibere, amo nebitinya bichitubete, na ekenama kia borio. 26Naende korwa ase egetonga keria kiarenge agwo ase obosio bw’Omonene akarusia omogati oyomo otabekiri memera, ne rindasi erimo, na omogati oyomo omoo, erio akabibeka igoro ase ebitinya ebio na ekenama ekio kia borio. 27Akabeka ebinto ebio bionsi ase amaboko a Haroni, na ay’abamura baye, akabisungusia bibe ekeng’wanso ki’ogosungusigwa ase obosio bw’Omonene. 28Naende Musa akabirusia korwa ase amaboko abo, akabisambera ase egesasimero amo nekeng’wanso ki’ogosambwa, bibe ekeng’wanso gi’okobaatanana. Eke nekeng’wanso kegosambwa nomorero ase Omonene, kere ne rimisu rigiya rikomogwenera. 29Erio Musa akaimokia ritaana, akarisungusia ribe ekeng’wanso ki’ogosungusigwa ase Omonene. Nigo riabete egetari kiaye kiarusetiwge korwa ase emingichi eria yaruetwe ase ogwatanana abakuani. Ase igo Musa agakora buna Omonene amochigete.
30Musa akaimokia amaguta akweakwa amo namanyinga arenge igoro ase egesasimero, akanyororokeria Haroni amo ne chianga chiaye, akanyororokeria na abamura ba Haroni amo ne chianga chiabo. Naboigo agaatanana Haroni na abamura baye amo ne chianga chiabo ase emeremo emechenu.
31Erio Musa agatebia Haroni na abamura baye, “Iyekera enyama eyio agwo ase egesoero ki’Eema y’Omosangererekano, na moyeriere aroro, moyerie amo nemegati eria ere ime ase egetonga gi’okoruegwa ase ogwatananwa kw’abakuani! Naboigo inche nachigete, ngateba: Haroni amo nabamura baye mbayerie. 32Korende enyama amo nemegati biratigare mobisambe nomorero. 33Inwe timobaisa gosoka isiko goetania egesoero ki’Eema y’Omosangererekano, korende mobeereo ase engaki y’amatuko atano na abere, goika amatuko ’ogwatanana kwaino aere. 34Buna akorirwe ase rituko ria rero, naboigo Omonene achikire akorwe kogenderera ase ogokora okobwatanigwa asemore, erinde mwaberwe. 35Inwe nigo morabeere agwo ase egesoero ki’Eema y’Omosangererekano, omobaso na obotuko, ase amatuko atano na abere, mobe mogokora aya Omonene achikire. Motakoreti ayio, inwe nigo morakwe.” 36Ase igo Haroni na abamura baye bagakora onsi aya Omonene achigete goetera ase Musa.
Currently Selected:
ABALAWI 8: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
