ABALAWI 7
7
Ekeng’wanso gi’okorongeyia okomocha
1“Oko nakwo ogochika gw’okorua ekeng’wanso gi’okorongeyia okomocha. Ekio nekeng’wanso egechenu mono. 2Aase agwo eng’iti y’ekeng’wanso ki’ogosambwa ekonyenyerwa nao eng’iti y’ekeng’wanso gi’okorongeyia okomocha eranyenyerwe. Amanyinga aye asiarerwe ase egesasimero chinsemo chionsi. 3Ebitinya biaye bionsi birusigwe na koruegwa; omokera na ebitinya bitubetechinyama chi’enda, 4ne chinyigo chionsi ibere amo nebitinya bichitubete bire ang’e nomogongo, na ebitinya bie riini birusigwe amo ne chinyigo. 5Omokuani abisambere ase egesasimero, bibe ekeng’wanso kegosambwa nomorero ase Omonene. Ekio nekeng’wanso gi’okorongeyia okomocha. 6Kera omonto omosacha bw’enka y’omokuani nakeriere agwo aase achenire. Ekio negechenu mono.
7“Ogochika gw’okorua ekeng’wanso gi’okorongeyia okomocha nigo kore okomo nogw’ekeng’wanso ki’ebibe. Omokuani oria ogokora okobwatanigwa nakerokio aire chinyama chi’ekeng’wanso eke chibe echiaye. 8Omokuani okorua ekeng’wanso ki’ogosamwa ase engencho y’omonto onde, aire risankwa ri’ekeng’wanso keria ribe eriaye. 9Kera okoruegwa kw’endagera okoroiseirie riko, na kende gionsi ekeroiseirie ase orogio, gose ase egetega, okwo nakobe okw’omokuani oria okoruete asende inche Omonene. 10Kera okoruegwa kw’endagera gwochoganirie namaguta, gose ogotari namaguta, abamura ba Haroni baegwe, baatananerwe bareng’anerigwe.
Ekeng’wanso ki’omorembe
11“Oko nakwo ogochika gw’okorua ekeng’wanso ki’omorembe, ekio omonto ararente ase Omonene. 12Onye omonto okorua ekeng’wanso ekio ase ogoaka ng’a mbuya mono, rirorio amo nekeng’wanso ekio arue okoruegwa kw’amaandasi atabekiri memera aroisirie namaguta, na emegati emeoo etabekiri memera eakire amaguta, na emegati y’obosie obonuke bwochoganirie namaguta. 13Amo nekeng’wanso kiaye ki’omorembe ki’ogoaka ng’a mbuya mono, arente emegati ebekire ememera. 14Korwa ase okoruegwa okwo arue omogati oyomo bwa kera egesaku, ebe ekeegwa ase Omonene. Eyio ebe ey’omokuani oyio ogosiarera amanyinga ’ekeng’wanso keria ase egesasimero. 15Chinyama chi’ekeng’wanso kiaye ki’omorembe ki ogoaka ng’a mbuya mono chiriegwe ase rituko riria gekoruegwa; tichibaisa gotigara nonya ne chinsinini goika rituko ria kabere.
16“Korende onye omonto okorua ekeng’wanso ase engencho y’eira ariete, gose neki’ogwancha kwaye, nakeriegwe ase rituko riria gekoruegwa, na ekegotigara keriegwe ase rituko ria kabere. 17Chinyama chi’ekeng’wanso ekio chigotigara ase rituko ria gatato goika chisambwe nomorero chiyie chiere. 18Onye enyama ende yonsi y’ekeng’wanso kiaye ki’omorembe ekoriegwa ase rituko ria gatato, ekeng’wanso ekio tikegwancherwa, gose oyo okeruete takobarerwa ekeng’wanso ekio. Ekio nakebe okogechia, na onde bwensi orarie enyama y’ekeng’wanso ekio nabarerwe obobe bwaye. 19Enyama eyio kerakune gento kende gionsi getachenegeti esambwe nomorero, eyie eere.
“Onye enyama echenegete, kera omonto ochenekire nare ne ribaga ri’okoyeria, 20korende oyotachenegeti takoria enyama y’ekeng’wanso ki’omorembe gekoruegwa ase Omonene. Aise gokora igo, nigo araatananwe korwa ase abanto baye.
21“Naende omonto karakune egento getachenegeti, gokerabe egetachenegeti kere ase omonto, gose ase eng’iti, gose okogechia konde gwonsi, na arie enyama y’ekeng’wanso ki’omorembe gekoruegwa ase Omonene, omonto oyio nigo araatananwe korwa ase abanto baye.”
22Omonene agakwana na Musa, akamotebia, 23“Kwana n’Abaisraeli, obatebie ng’a tibabaisa koria ebitinya binde bionsi, ebi’eng’ombe, gose ebi’eng’ondi, gose ebi’embori. 24Ebitinya bi’eng’iti egokwa yoka enyene, na ebi’eng’iti egoitwa neyende, ebio nabikorerwe emeremo emeao, korende tibikoriegwa nonya ng’ake. 25Monto onde bwensi orarie ebitinya bi’eng’iti yarurwe ekeng’wanso kegosambwa nomorero asende inche Omonene, oyio nigo eraatananwe korwa ase abanto baye. 26Naende timoria amanyinga e chinyoni, gose aye ching’iti aande onsi ase moramenye. 27Monto onde bwensi orarie amanyinga ande onsi, oyio nigo araatananwe korwa ase abanto baye.”
28Naende Omonene agatebia Musa, 29“Kwana n’Abaisraeli, obatebie ng’a omonto onde bwensi orarue ekeng’wanso ki’omorembe, arue korwa ase ekeng’wanso ekio gentungetie inche Omonene. 30Arente namaboko aye omonyene ekeng’wanso kiaye kegosambwa nomorero asende inche Omonene; arente ebitinya amo ne ritaana, ne ritaana erio risungusigwe ribe ekeng’wanso kegosungusigwa ase obosio bwane inche Omonene. 31Omokuani asambere ebitinya ase egesasimero, korende ritaana ribe eria Haroni na abamura baye. 32Ekenama kia borio okee omokuani buna ekeegwa korwa ase ebing’wanso biaino bi’omorembe. 33Omokuani, omomura o Haroni, oyio orabe okorua amanyinga ’ekeng’wanso ekio ki’omorembe amo nebitinya, nere oraire ekenama keria kia borio kebe egetari kiaye. 34Korwa ase ekeng’wanso ki’omorembe gekoruegwa n’Abaisraeli narusirie ritaana rigosungusigwa amo nekenama kia borio, nabieire Haroni omokuani na abamura baye. Ebio nabio Abaisraeli barabe bakoa abakuani, bibe ebitari biabo botambe.
35“Ekio negetari kemotungetie Haroni na abamura baye korwa ase ebing’wanso bigosambwa nomorero asende; nigo kiabete ekiabo korwa rituko riria baatananetwe bakaba abakuani bagonkorera inche Omonene. 36Rituko riria baagetwe amaguta inche ngachika ng’a egetari ekio korwa ase Abaisraeli kebe ekiabo kogenderera botambe, ebiaare ase ebiaare.”
37Oko nakwo ogochika igoro y’ekeng’wanso ki’ogosambwa, na okoruegwa kw’endagera, na ekeng’wanso ki’ebibe, na egi’okorongeyia okomocha, na eki’ogosungusigwa, na eki’omorembe. 38Ogochika okwo nakwo Omonene aete Musa ase egetunwa gia Sinai, agwo ase erooro ya Sinai, ase rituko riria achigete Abaisraeli bamoruere Omonene ebing’wanso biabo.
Currently Selected:
ABALAWI 7: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
