ABALAWI 25
25
Omwaka o gatano na kabere
(Okoir 15:1–11)
1Omonene agakwana na Musa ase egetunwa gia Sinai, akamotebia, 2“Kwana n’Abaisraeli, obatebie: Ekero moraike ase ense eria Omonene arabae, ense eyio ebe n’Esabato ase Omonene, etimoke. 3Namosimeke emegondo yaino na gochera emesabibu yaino, naende mogese okwama kw’emegondo y’ense eyio ase emiaka etano nomo. 4Korende omwaka o gatano na kabere obe omwaka bw’ogotimoka; ense etimokigwe kegima ase Esabato y’Omonene. Ase omwaka oyio timosimeka kende ase emegondo yaino, gose gochera emesabibu yaino. 5Timobaisa kogesa echikwemeria korwa ase chimbusuro chiagwete, gose timosangereria amasabibu ’emesabibu etacheretwe. Oyio nigo orabe omwaka bw’ogotimoka kegima gw’ense eyio. 6Echio chiremerie ase omwaka bw’ogotimoka gw’ense eria, nachio chirabe chindagera chibaisaine, aye omonyene, na abasomba bao, abamura na abaiseke, na omokori emeremo oo orikire, na omomenyi omenyete bwoo. 7Boigo ching’iti chitugire, ne ching’iti chi’orosana chire ase ense eyio nachirie okwama okwo kwemeretie.
Omwaka bw’Omochengo
8“Mobare chichuma isano na ibere ara gatano na kabere. (Kera echuma eyemo ebe ey’engaki y’omwaka omogima.) Naboigo engaki eyio ebe ey’emiaka emerongo ene, na kianda. 9Erio ase rituko ria ikomi ri’omotienyi o gatano na kabere, Rituko ri’Okobwatanigwa, egetureri kebugigwe ase ense yaino yonsi. 10Mwatanane omwaka oyio bw’emerongo etano, moyochene. Morarie obosibore ase abanto bonsi bamenyete ase ense yaino. Omwaka oyio nobe omwaka bw’Omochengo asemore. Kera omonto ore asemore airanigwe ase omwando oye, na kera oyomo ase eamate yaye. 11Omwaka oyo bw’emerongo etano nobe oyio bw’Omochengo asemore. Ase omwaka oyio timobusura kende, gose kogesa echiemeretie korwa ase chimbusuro chiagwete inse, gose timosangereria amasabibu korwa emesabibu etacheretwe. 12Omwaka oyio noyo bw’Omochengo. Nobe omochenu asemore. Inamorie chindagera chiemeretie chinyene korwa ase riroba.
13“Ase Omwaka oyio bw’Omochengo kera omonto airanigwe ase omwando oye. 14Ase igo onye gokooneria omonto onde gento kende gionsi, gose kogora korwa asare, timobaisa gokorerana oborianania. 15Koragore omogondo korwa ase omonto onde oakane omonto oria koreng’ana nemiaka eyio etigarete aragese ekero Omwaka bw’Omochengo otaraika. 16Onye emiaka ere emenge, nomente rigori, onye ere emeke, norikeeyie, ekiagera egento ekio agokooneria nomobaro bw’okwama kw’omogondo. 17Timobaisa gokorerana oborianania, korende moiroke Nyasae oino, ekiagera inche ninche Omonene, Nyasae oino.
Omwaka o gatano na kabere
18“Ase ayio, mobwate amachiko aane na koyakora, na mobwatie emeroberio yane echikire; erio nario moramenye ase ense na mobe nobotoereru. 19Ense eria iyame okwama kwaye, na inwe monyore endagera mokoria na koigota, naende momenye ase obotoereru. 20Namoisa koboria: Ninki torarie ase omwaka o gatano na kabere, onye titogosimeka gose gosangereria okwama? 21Momanye ng’a ninche Omonene ndasesenie ense yaino ase omwaka o gatano na rimo, erinde yaame endagera eraisane ase engaki y’emiaka etato. 22Ekero morabusure chindagera ase emegondo yaino ase omwaka o gatano na gatato mogenderere koria endagera eria enkoro, goika endagera y’omwaka o kianda egeswe.
Okoiranigwa gwe chinibo
23“Ense tekoonigwa ebe egenderere koba ey’oyio oyegora, ekiagera ense neyane; inwe nigo more abamenyi momenyete asende.
24“Ase ense eyio yonsi moranyore ebe eyaino, ekero amaremo araoonigwe, namotige ribaga ri’okoyabooria naende. 25Onye oyomino obeire omotaka na aoonie ensemo y’omwando oye, omoamate omwabo ore ang’e namoboorerie ensemo eyio konya aoonirie. 26Omonto oria otabwati omonto omwabo oranyare komobooreria eria aoonetie, korende ere omonyene aise konyora enibo eisaine kobooria omwando oye, 27rirorio omonyene oyio aboorie omwando oye, na abare emiaka gochakera engaki eria ayoonetie, erio aakane omonto oria onde korwa ekero keria goika ase omwaka bw’omochengo. Erio airanerigwe omwando oye. 28Korende onye omonyene oria tabwati enibo eisaine akobooria omwando oye, nabo omwando oyio oratigare ase okoboko kw’omonto oria oyogorete goika Omwaka bw’Omochengo. Korende ase omwaka oria omwando oyio noiranigwe, na ere omonyene airane ase omwando oye.
29“Onye omonto okoonia enyomba ere ime ase omochie ogiteire orwaki, nanyare koyebooria goika ase engaki y’omwaka oyomo korwa ekero ayeoonetie. Ase engaki y’omwaka oyomo omogima nabe ne ribaga ri’okoyebooria. 30Onye enyomba eria tekoboorigwa ase engaki eria y’omwaka omogima, rirorio enyomba eria nigo erabe ey’omonto oria oyegorete, amo ney’ororeria rwaye kogenderera botambe. Enyomba eria tekoiranigwa ase omonyene ekero Omwaka bw’Omochengo oraike. 31Korende chinyomba chire ase ebichie bitagiteiri chindwaki, nachibarwe koba echi’emegondo y’ense eria; nabo chiranyare koboorigwa na koiranigwa ase abanyene ekero Omwaka bw’Omochengo oraike. 32Korende nonya naboigo, abanto b’egesaku kia Lawi mbare ne ribaga kobooria chinyomba chi’emechie ere emiando yabo engaki ende yonsi. 33Onye omonto Omolawi takobooria enyomba aoonetie ere ime ase omochie ore omwando oye, enyomba eyio neiranigwe ase Omwaka bw’Omochengo, ekiagera chinyomba chire ime ase emechie y’Abalawi nigo chire omwando obo ase egati y’Abaisraeli. 34Korende ebitii bi’oborisia bietanaine emechie yabo tibikoonigwa, ekiagera ebio nebiabo kogenderera botambe.
Abataka bakoegwa singo
35“Onye oyomino obeire omotaka ere takonyara gwetenenera ere omonyene, aye nomoe ebio aremeire, abeere bwoo buna omomenyi, gose buna omorikwa. 36Tobaisa kwenyorera ebitoki, gose okomentekana konde korwa asare, korende aye omoiroke Nyasae oo, na otige omonto oyio omino amenye bwoo. 37Ekero oramoe chibesa chia singo, tobaisa komosaba ebitoki korwa asare. 38Inche ninche Omonene, Nyasae oino, nabarusetie korwa ase ense ya Misiri, erinde mbae ense ya Kanani, na inche imbe Nyasae oino.
Ogosiborwa kw’abasomba
39“Onye oyomino omenyete bwoo obeire omotaka, ere eoonie omonyene asore, tobaisa komokoria emeremo buna omosomba. 40Nabeere asore buna omonto orikire, na buna omomenyi oo, abe okogokorera goika ekero Omwaka bw’Omochengo oraike. 41Erio arue bwoo, ere amo nabana baye, airane gochia ase eamate yaye na amenye ase omwando bwe chisokoro chiaye. 42Abwo nabanto bagonkorera, ninche nabarusetie ase ense ya Misiri. Abwo tibakoonigwa buna abasomba. 43Tobaisa kobagambera nobotindi, korende aye omoiroke Nyasae oo. 44Onye koganetie abasomba, abamura gose abaiseke, nabo oranyare kobagora korwa ase abanto b’ebisaku bibaetanaine inwe. 45Nabo oranyare kogora abana b’abamenyi baria bamenyete asemore, abana babo baria baiboreire ase ense yaino babe abaino. 46Monyare gotiga abasomba abwo ase abana baino barache nyuma yaino, babe omwando obo bakobakorera kogenderera botambe. Abwo mbanyare koba abasomba baino. Korende abanto bamino Abaisraeli, timobagambera nobotindi.
47“Onye omomenyi, gose omonto orikire omenyete bwoo, obeire omonda, na omonto omino bw’Abaisraeli obeire omotaka, eoonie ere omonyene ase omomenyi oria ore bwoo, gose ase monto onde bwensi bw’eamate y’abamenyi; 48nyuma yaye omonto oyio nabo aranyare koboorigwa. Omonto omwabo nabo aramoboorie, 49gose ise moke, gose omwana o ise moke, gose omoamate omwabo ore ang’e, gose ere omonyene karabe nenibo, nabo areboorie ere omonyene. 50Ere amo noria omogorete babare emiaka gochakera korwa ekero eoonetie goika ekero ki’Omwaka bw’Omochengo oraike, erio bakore rigori ri’okoboorigwa kwaye, koreng’ana nemiaka eyio na koreng’ana neng’eria y’omonto orikire. 51Onye emiaka emenge etigarete goika Omwaka bw’Omochengo oike, goika airanie ang’e bionsi ebi aetwe ekero eoonetie. 52Korende onye emiaka etigarete nemeke, rirorio aakane ase emiaka eyio yoka ase okwebooria. 53Omonene oye amokorere buna akomokorera omonto orikire ase okomokorera emeremo omwaka ase omwaka. Aye goika origererie orore ng’a onde tari okomogambera ase obotindi. 54Onye takoboorigwa ase enchera eyemo y’echio, rirorio ere na abana baye batigwe babe abasibore ase Omwaka bw’Omochengo. 55Abaisraeli nabasomba baane, ee, barabwo nabasomba baane aba narusetie korwa ase ense ya Misiri. Inche ninche Omonene, Nyasae oino.”
Currently Selected:
ABALAWI 25: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
