ABALAWI 24
24
Okorendwa gwe chitaya
(Okong’ 27:20–21)
1Omonene agakwana na Musa akamotebia, 2“Chika Abaisraeli ng’a barente amaguta amaya amitire korwa ase amazeituni akobekwa ase chitaya, erinde chigenderere gwoka botambe. 3Agwo isiko y’etoto eye ekengete chibao chirikire oborori chibekire ime y’Eema y’Omosangererekano, Haroni abe okorenda chitaya korwa mogoroba goika mambia ase obosio bwane, incne Omonene. Okwo nogochika asemore koragenderere ebiaare ase ebiaare. 4Haroni arende chitaya echio chire ase ekebekerero gi’etahabu echenire, erinde chigenderere gwoka botambe ase obosio bwane inche Omonene.
Emegati ekoruegwa ase Nyasae
5“Aye goika oimokie obosie obonuke, oroisie emegati ikomi na ebere. Kera omogati oire obosie boisaine ebimunu bine. 6Oroberie emegati eyio ase chindwaro ibere, etano nomo ase kera orwaro, igoro ase emesa eoomire netahabu echenire, agwo ase obosio bwane inche Omonene. 7Obeke ubani echenire ase kera orwaro ebe ekemanyererio, ne ribaga ri’emegati eyio ubani eyio eruegwe buna okoruegwa kw’endagera kogosambwa nomorero asende inche Omonene. 8Kera rituko ri’Esabato botambe emegati eroberigwe ase emesa igoro, agwo ase obosio bwane. Okwo nokoruegwa korwa ase Abaisraeli, nakobe okobwatana kw’ogotianania kwa botambe. 9Emegati eyio nigo erabe eya Haroni amo nabamura baye, na barabwo nabayeriere aase achenire, ekiagera nemechenu mono, ebe egetari kiabo botambe gi’okoruegwa okwo kogosambwa nomorero asende.”
Ekiorokererio ki’egesusuro kia boronge
10Narenge omonto oyomo, ng’ina arenge Omoisraeli, na ise n’Omomisiri. Omonto oyio akagenda ase egetwori akomana nomonto onde Omoisraeli. 11Omonto oria ng’ina arenge Omoisraeli akarama erieta ri’Omonene na koriragereria. Abanto bakamobwata, bakamorenta ase Musa. Ng’ina omonto oyio nigo arenge korokwa Selomiti, omosubati o Debiri bw’egesaku kia Dani. 12Abanto bakamobeka echela, na bakaganya amang’ana korwa ase Omonene ng’a ninki omonto oyio agochia gokorerwa.
13Na Omonene agatebia Musa, 14“Mosokie isiko y’egetwori omonto oyio oragereretie Omonene, na abanto baria bonsi bamoigwete gakoragereria, babeke amaboko abo igoro ase omotwe oye, na omoganda bwonsi omoake amagena akwe. 15Erio otebie Abaisraeli: Monto onde bwensi oraragererie Nyasae oye nabogorie ebibe biaye na anyore egesusuro. 16Omonto orarame erieta ri’Omonene goika aitwe akwe; omoganda bwonsi omoake amagena. Karabe omomenyi gose omobiare, oyokorama Erieta ri’Omonene goika aitwe akwe.
17“Omonto oraite omonto onde, nere goika aitwe akwe. 18Omonto oraite engi’ti etugire goika nayeakane. Obogima boakanwe nobogima.
19“Omonto karaake omonto onde asarie omobere oye, buna omonto oria akorera oyonde, nere naboigo arakorerwe. 20Oyokobuna riuga ri’omonto onde, nere eriaye naribunwe; oyogwata eriso ri’omonto onde, nere eriaye nariaatwe; oyokogookora omonto onde erino, nere eriaye ndigookorwe; oyoraremarie omonto onde, nere goika aremarigwe. 21Omonto oraite etugo goika nayeakane, na omonto oraite omonto onde, nere goika aitwe akwe. 22Mobe ne richiko erimo rikogambera abanto bonsi, karabe omomenyi gose omobiare, ekiagera inche ninche Omonene, Nyasae oino.”
23Nabo Musa agatebia Abaisraeli, na barabwo bagasokia isiko y’egetwori omonto oria oragereretie, bakamoaka amagena, bakamoita. Naboigo Abaisraeli bagakora buna Omonene konya achikire Musa.
Currently Selected:
ABALAWI 24: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
