ABALAWI 22
22
Obochenu bw’ebing’wanso
1Omonene agakwana na Musa, akamotebia, 2“Kwana na Haroni na abamura baye, obatebie ng’a barende na bakore amasikani ase ebinto ebichenu, biria Abaisraeli bagwatanana asende, erio tibabaisa korenta obosooku ase erieta riane richenu. Inche ninche Omonene. 3Obatebie ng’a onye omonto onde bwensi ase ororeria rwabo, ekero are oyotachenegeti; aise goika ang’e nebinto ebio Abaisraeli barabe bagwatanana asende inche Omonene, omonto oyio naatananwe korwa ase obosio bwane, tagonkorera ase emeremo y’obokuani. Inche ninche Omonene.
4“Omonto onde bwensi ase ororeria rwa Haroni obwate oborwaire bwa ukoma, gose okorua amache anga buna chimengere, tabaisa koria ebinto ebichenu goika ekero arabe ochenekire; naboigo na onde bwensi orakune egento getachenegeti, buna egetondo, gose omonto ogosokia embusuro yaye y’oroiboro, 5na onde bwensi orakune eng’iti ekwagura, eye eramokore abe oyotachenegeti, gose akune omonto oragere abe oyotachenegeti, ogotacheneka kwaye gakorabe okw’engencho ende yonsi. 6Omokuani onde bwensi orakune egento buna ekio nabe oyotachenegeti goika omogoroba oyio; ere takoria ebinto ebichenu goika ekero arabe bwesibirie omobere oye namache. 7Ekero erioba riagure, abe ochenekire, na nyuma y’ayio amanye koria ebinto ebichenu, ekiagera ebinto ebio nabio endagera yaye. 8Taria enyama y’eng’iti ekwete yoka enyene, gose eye eitire neng’iti ende y’orosana. Aise koria enyama buna eyio, nigo arabe oyotachenegeti. Inche ninche Omonene.
9“Abakuani bonsi goika barende amang’ana aya nachikire. Batayabwateti, nababe abakori ebibe ase ayio, na barabwo mbakwe, ekiagera bagosaria aya nachikire. Inche ninche Omonene, ninche nkobachena.
10“Omonto otari bw’eamate y’omokuani tabaisa koria ebinto ebichenu. Omomenyi omenyete amo nomokuani, gose omonto orikire komokorera emeremo, abwo tibabaisa koria ebinto ebichenu. 11Omosomba onde bwensi omokuani agorete ne chibesa chiaye omonyene, gose omosomba oiboreire ase enka yaye, abwo nabarie endagera eria omokuani akoegwa. 12Omoiseke bw’omokuani karanyuomwe nomonto otari omokuani tabaisa koria ebinto ebichenu bikoruegwa bibe ebing’wanso. 13Korende omosubati bw’omokuani osogete otigirwe ore omoboraka, gose batiganire nomosacha oye, na tabwati omwana, na bono oiranire gocha o ise komenyao buna ekero arenge omoke, nanyare koria endagera eria ya ise. Korende omonto otari bw’eamate y’omokuani tabaisa koria endagera eria.
14“Omonto onde bwensi otari bw’eamate y’omokuani orarie ebinto biria ebichenu ase ogotamanya, goika airanie egento egechenu ase omokuani, buna keria airete, na amente ensemo ya isano ye rigori ri’egento ekio. 15Abakuani tibabaisa gokora ebinto ebi ebichenu Abaisraeli bagwatanana na kobirua ase Omonene bibe ebitachenegeti, 16na igo bakogera abanto babogorie ebibe biabo, na okomocha kwabo, ase okoria ebinto ebichenu baruete. Inche ninche Omonene, ninche nkobachena.”
17Omonene agakwana na Musa, akamotebia, 18“Tebia Haroni na abamura baye, na Abaisraeli bonsi, ng’a ekero omonto onde bwensi bw’Abaisraeli, gose omomenyi omenyete ase egati yabo, aganetie konduera inche Omonene ekeng’wanso ki’ogosambwa, kerabe nase engencho y’eira, gose neki’ogwancha kwaye, 19goika arue eeri, gose egoree, gose emingichi, chitari na kemocho ase emebere yabo, erio nario ekeng’wanso kerancherwe. 20Timobaisa korua eng’iti ende yonsi ere na kemocho ase omobere oye, naki ase ekeng’wanso buna ekio timogwancherwa. 21Ekero omonto onde bwensi akorua ekeng’wanso ki’omorembe asende, ase engencho y’eira ariete, gose eki’ogwancha kwaye, korwa ase chiombe gose ching’ondi, goika ebe eng’iti eng’ikeranu, etari na kemocho ase omobere oye, eyio nero erancherwe. 22Timobaisa konduera ching’iti chiukorete, gose chire ebisegora, gose ebirema, gose chire namaote akorua amaira, gose chibwate egesuneri, gose amaote, ng’a chibe ekeng’wanso kegosambwa nomorero asende. 23Eeri gose emanwa y’eng’ondi ebwate ekiimo egetambe goetania ekende, gose ekieng’e mono, nabo oranyare koyerua ebe ekeng’wanso ki’ogwancha, korende ase okoyerua ebe ekeng’wanso ki’ogoikerania eira kwariete, tegwancherwa nainche. 24Eng’iti ende yonsi chingetia chiaye chisaregete ase ogosunyuntwa, gose ase okomiorigwa, gose ase okobutorwa, gose ase okonatwa, timobaisa koyerua ebe ekeng’wanso asende. Timokora igo ase ense yaino.
25“Eng’iti ende yonsi ere buna echio moranyore korwa ase omomenyi, timobaisa koyerua ebe okoruegwa kw’endagera asende. Echio nigo chire nebimocho ase emebere yabo, na ase ebing’wanso buna ebio timogwancherwa.”
26Naende Omonene agakwana na Musa, akamotebia, 27“Ekero emori, gose emanwa y’eng’ondi, gose ey’embori, yabiarirwe, etigwe ebe ase eng’ina ase engaki y’amatuko atano na abere, korende korwa ase rituko ria gatano na gatato yancherwe ebe ekeng’wanso kegosambwa nomorero asende. 28Timobaisa konyenya eng’ombe amo nemori yaye ase rituko erimo, gose eng’ondi, gose embori amo ne chimanwa chiabo ase rituko erimo. 29Ekero moganetie konduera inche Omonene ekeng’wanso ki’ogoaka ng’a mbuya mono, mokerue ase enchera endonge, erinde monyare gwancherwa. 30Ekeng’wanso ekio keriegwe keere ase rituko erio erio, tigetigara nonya ngesinini goika rituko ria kabere. Inche ninche Omonene.
31“Ase ayio mobwate amachiko aane na koyakora. Inche ninche Omonene, 32Timobaisa korentera erieta riane obosooku, korende nincheneke ase Abaisraeli. Inche ninche Omonene, ninche nkobachena. 33Ninche nabarusetie korwa ase ense ya Misiri, erinde imbe Nyasae oino. Inche ninche Omonene.”
Currently Selected:
ABALAWI 22: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
