ABALAWI 21
21
Amachiko ase abakuani
1Omonene agakwana na Musa, akamotebia, “Kwana nabakuani, abamura ba Haroni, obatebie ng’a omokuani tabaisa gwesoyia ase ogotacheneka ase ogokuna egetondo ki’omonto okure ase egati y’abanto baye. 2Nare ne ribaga gwesoyia ase ogotacheneka ase abanto aba: Ng’ina na ise, na omwana oye, omomura gose omoiseke, na momura omwabo; 3boigo na omoiseke omwabo ore omwekungi, oyo otaraba nomosacha; asare nigo are ne ribaga gwesoyia ase ogotacheneka. 4Ekiagera omokuani are omotang’ani ase abanto baye, tabaisa gwesoyia ase ogotacheneka.
5“Omokuani tabaisa kogingira ensemo ende y’etukia y’omotwe oye, gose konacha chinderu chiaye mesia, gose gwesaraga omobere. 6Abakuani mbabe abachenu asende inche Nyasae obo, na tibarentera erieta riane obosooku, ekiagera nabwo bakorua okoruegwa kw’endagera kogosambwa nomorero asende inche Omonene. Ase ayio goika babe abachenu. 7Omokuani tabaisa konyuoma omokungu omotayayi, gose oyotari omwekungi, gose oyobatiganire nomosacha oye, ekiagera omokuani nigo achenegete ase Nyasae oye. 8Goika omobare ng’a nomochenu, ekiagera nere okorua okoruegwa kw’endagera asende inche Nyasae oo; nabe omochenu asore, ekiagera inche Omonene nomochenu inde, ninche nkobachena. 9Onye omwana omoiseke bw’omokuani ogwesaria ase okoba omotayayi, igo orenteire ise obosooku; omoiseke oyio goika asambwe nomorero akwe.
10“Oyore omokuani omonene ase abamwabo, oyio onyororokeretigwe amaguta akweakwa ase omotwe oye, naende bwatananirwe ase okobeka chianga chi’obokuani, ere tatiga etukia yaye esang’ang’are, gose tatandora chianga chiaye ase okoreera omonto okure. 11Tabaisa gosoa enyomba ase abanto babekire omobere bw’omonto okure, gose gwesoyia ase ogotacheneka, naba ise gose ng’ina. 12Tasoka korwa ase Obomenyo Obochenu, gose gokora Obomenyo obo Obochenu bwa Nyasae oye bobe obotachenegeti, ekiagera amaguta aagetwe nigo amwatananete ere agenderere koba oyone, inche Nyasae oye. Inche ninche Omonene. 13Ere anyuome omoiseke ore omwekungi. 14Tabaisa konyuoma omokungu omoboraka, gose oyobatiganire nomosacha oye, gose oyotari omwekungi, gose ore omotayayi, korende anyuome omoiseke omwekungi korwa ase abanto b’egesaku kiaye. 15Erio nario abana baye barabe abachenu, tibasareka ase egati y’abanto baye, ekiagera inche ninche Omonene, ninche nkobachena.”
16Omonene agakwana na Musa naende, akamotebia, 17“Kwana na Haroni, omotebie ng’a onde bwensi ore ekerema tabaisa goika ang’e kondetera inche, Nyasae oye, okoruegwa kw’endagera. Okwo nogochika koragenderere botambe ase ororeria rwaye ebiaare ase ebiaare. 18Omonto ore na kemocho ase omobere oye tabaisa goika ang’e, onye ore omouko, gose rigata, gose ore na kemocho ase obosio bwaye, gose ore nekiimo ekemo egetambe goetania ekende, 19gose omonto ore na kemocho ase okoboko gose ase okogoro, 20gose omonto ore nesukubi ase omogongo oye, gose ore oboengere, gose oyore na kemocho ase eriso, gose oyo obosisa boriete, gose oborwaire bonde ase risankwa, gose omosacha chingetia chiaye chisaregete. 21Omonto onde bwensi ase ororeria rwa Haroni omokuani ore na kemocho ase omobere oye tabaisa goika ang’e kondetera inche Omonene okoruegwa kw’endagera kogosambwa nomorero, ekiagera oyio ore na kemocho ase omobere oye tagoika ang’e andetere inche, Nyasae oye, okoruegwa kw’endagera kogosambwa nomorero. 22Ere nabe ne ribaga ri’okoria okoruegwa kw’endagera gokoruegwa asende inche Nyasae oye, okoruegwa okore ogochenu, amo nokore ogochenu mono. 23Korende ekiagera are na kemocho ase omobere oye, tagoika ang’e netoto enachete Obomenyo Obochenu, gose tagocha aike ang’e negesasimero. Aise goika ang’e, nigo aragere Obomenyo bwane Obochenu bobe botachenegeti. Inche ninche Omonene, ninche nkobachena.”
24Amang’ana ayio naro Musa atebetie Haroni, amo nabamura ba Haroni, na Abaisraeli bonsi.
Currently Selected:
ABALAWI 21: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
