YOSHUA 8
8
Okobugwa na ogosarigwa kwa Ai
1Omonene agatebia Yoshua, “Toondoka, gose toiroka, imoka oire abarwani b’esegi amo naye, ogende orwanie omochie o Ai, Rora, nabekire omoruoti o Ai, na abanto baye, amo nomochie na ense yaye, ase amaboko ao. 2Okore omoruoti o Ai na omochie oye buna gwakorete Yeriko na omoruoti oye. Korende ase engaki eye monyare koira ebinto ne chitugo morasakore, bibe ebiaino. Obeke abanto baboere omochie, na koyoumokera korwa nyuma.”
3Erio Yoshua amo nabarwani bonsi, bakebeka ang’e kogenda korwania Ai. Agachora abanto chilifu emerongo etato abaare chituoni chie chinguru, akabatoma aroro botuko. 4Akabachika akabatebia, “Genda mwebise, moboere omochie korwa nyuma, timobeera aare, korende mwebeke ang’e koyoumokera. 5Inche amo nabarwani bonsi tore komo natoumokere omochie. Ekero abanto ba Ai barasoke gotorwania, buna bakorete engaki eria ye ritang’ani, intwe ntotame. 6Erio batobwatie, naintwe tobang’use gochia aare korwa ase omochie. Barabwo barengererie iga: Bono batamire korwa asetore, buna bakorete engaki eria ye ritang’ani. 7Bono ekero togotama, inwe morue ase moboete, moumokere omochie, ekiagera Omonene, Nyasae oino, oyobekire ase amaboko aino. 8Ekero mwabwatire omochie goika moyosambe, buna Omonene achikire, Morigererie mono, mokore buna nabachikire.” 9Naboigo Yoshua akabatoma, na barabwo bakagenda, bakaboa egati ya Beteli na Ai, bosongo ya Ai. Korende Yoshua agatigara, akabeera amo nabanto obotuko obwo.
10Rituko ria kabere, mambia chuni, Yoshua akaroberia abanto baye, ere amo nabagaaka b’Abaisraeli bagatang’ana abanto gochia Ai. 11Abarwani bonsi, abarenge amo nere, bagatiira, bagaika ang’e nomochie, bagatoora sugusu ya Ai; rikura ndiarenge egati yabo na Ai. 12Yoshua agachora abarwani chilifu isano, akababisa bosongo y’omochie, ase egati ya Beteli na Ai. 13Naboigo abarwani baroberetigwe: Omoganda omonene bw’abarwani okabekwa sugusu y’omochie, na abarwani bande bakabekwa koboa bosongo y’omochie. Yoshua akagenda, akabeera gati‐gati ye rikura obotuko boria. 14Ekero omoruoti o Ai aroche amang’ana buna are, akaayerera amo nabanto baye baare omochie ime, bakebeka ang’e. Mambia chuni bagasoka korwania Abaisraeli agwo aase aragetwe, kororia Ekerubo Ekiomo. Korende omoruoti tamanyete ng’a abarwani mbaboete magega y’omochie. 15Yoshua amo n’Abaisraeli bonsi bagekora buna babuirwe, bagatama gochia erooro. 16Abanto bonsi b’omochie bakarangerigwa kobabwatia, na kobabwatirie Yoshua, bakang’uswa gochia aare korwa ase omochie. 17Kera omonto agatiga omochie ase okobwatia Abaisraeli. Onde tatigarete ime ya Ai, gose Beteli; omochie ogatigwa bosa otari na getango.
18Omonene agatebia Yoshua, “Raga ne ritimo riao rire koboko kwao gochia Ai, ekiagera ninkoe omochie oyo ase amaboko ao.” Yoshua akaraga omochie ne ritimo abwate koboko kwaye. 19Bwango ekero Yoshua aramborete okoboko kwaye, abarwani baria bakaimoka korwa ase baboete bakaminyoka gochia ase omochie, bakayobwata. Erio bwango bakayosamba nomorero. 20Abanto ba Ai bagachia korigereria nyuma, bakarora erioki korwa ase omochie rikoimoka igoro. Bagasinywa gotama gochia aaria na aaria, ekiagera Abaisraeli abwo konya batamire gochia erooro bakairana kobaumokera. 21Ekero Yoshua na Abaisraeli bonsi baroche ng’a abwo baboete babwatire omochie na koyosamba, bakairana, bagachaka goita abanto ba Ai. 22Abaisraeli abarenge ase omochie ime bagatirimboka gochiao. Ase igo abanto ba Ai bagaetananwa kegima n’Abaisraeli, na bonsi bagaitwa. Onde tatigarete otooregete, 23otatiga omoruoti o Ai. Ere akabwatwa, akarentwa ore moyo ase Yoshua.
24Ekero Abaisraeli bakoorire goita abanto bonsi ba Ai abarenge agwo aase aarabu, na ase erooro, ase babaseretie gochia, bakairana Ai, bagaita nemioro bonsi abarenge aroro. 25Bonsi abaitetwe ase rituko erio nigo barenge chilifu ikomi na ibere. Abwo nabwo barenge abanto bonsi ba Ai. 26Yoshua taringete okoboko kwaye, okwo kwabwatete ritimo goika ekero abanto bonsi ba Ai baitetwe. 27Abaisraeli bakaira chitugo na ebinto binde basakorete bikaba ebiabo, buna Omonene atebetie Yoshua. 28Yoshua agasamba omochie o Ai, akayotiga ore ritombe, nabo ore goika rero iga. 29Agatonga omoruoti o Ai ase omote igoro, akamotigao goika mogoroba. Ekero erioba rikogwa Yoshua agachika ng’a egetondo gesungorwe, getugutwe ase egeita ki’omochie; na abanto bagakora bo. Erio bakagetuba amagena, akaba etui eyereo goika rero iga.
Amachiko a Nyasae agosomwa ase egetunwa ki’Ebali
30Yoshua akaagachera Omonene, Nyasae bw’Abaisraeli, egesasimero ase egetunwa ki’Ebali. 31Agakeagacha buna Musa, omosomba bw’Omonene, achigete Abaisraeli, buna arikire ase Ebuku y’Amachiko a Musa: “Egesasimero keagacheire amagena atabaachetwe negekorero gi’ekioma.” Agwo bakaruera Omonene ekeng’wanso ki’ogosambwa, na eki’omorembe. 32Abaisraeli kobarigereretie, Yoshua akarika ase amagena amachiko aria aria Musa konya arikire. 33Omoganda bwonsi bw’Abaisraeli amo nabagaaka babo, na abatang’ani, na abagambi ebina, amo nabamenyi bonsi, abamenyete ase egati yabo, bagatenena ase chinsemo ibere chi’Esanduku y’Okobwatana kw’Omonene, barigereretie abakuani Abalawi abayebogoretie. Ekeng’ese ki’abanto bakarigereria egetunwa kia Gerisimu, na ekeng’ese kende egetunwa ki’Ebali. Musa omosomba bw’Omonene, konya ochikire kare ng’a Abaisraeli banyore ogosesenigwa ritang’ani. 34Erio Yoshua akabasomera amang’ana onsi ay’amachiko, ogosesenigwa na okoragererigwa, buna arikire ase Ebuku y’Amachiko. 35Yoshua agasomera omoganda bwonsi bw’Abaisraeli, amo nabakungu na abana, na abamenyi, abamenyete ase egati yabo, amang’ana onsi Musa achigete, tatigete nonya nerimo.
Currently Selected:
YOSHUA 8: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
