YOSHUA 7
7
Ebibe bi’Akani
1Korende Abaisraeli tibabete abegenwa; bakaira ebinto biria biatananetwe ase ogosirigwa. Akani, mosinto o Karimi, o Sabidi, o Zera bw’egesaku kia Yuda, akaira ebinto binde biaragereretigwe: na Omonene akaba nekeririanda ekenene ase Abaisraeli.
2Yoshua agatoma abanto korwa Yeriko gochia Ai, omochie ore moocha ya Beteli, ang’e na Beti‐Aveni, bagende baroote ense eria. Erio bagatiira kogenda koroota Ai. 3Barabwo bakairana ase Yoshua, bakamotebia, “Tobaisa gotoma abanto bonsi. Abanto koreng’ana chilifu ibere, gose isato, mbaisane babue Ai. Tobaisa gotiga bonsi bechande kogenda, ekiagera abanyene omochie oria nabake.” 4Ase igo abanto koreng’ana chilifu isato bagatiira kogendao, korende barabwo bagaserigwa nabanto ba Ai. 5Abanto ba Ai bagaita Abaisraeli emerongo etato, na batano nomo, bakabaseria korwa isiko y’egeita gochia Sebarimu, bakabaitera aroro ase ebitirimboko. Erio Abaisraeli bakoboa na kwerusia moyo.
6Yoshua amo nabagaaka b’Abaisraeli bagatandora chianga chiabo, bakagwa maumama bosio bw’Esanduku y’Omonene, bakarara agwo goika mogoroba, bagesiarera ebuse emetwe yabo 7Na Yoshua agasaba, akabora, “Ayee! Omonene Nyasae, nase ki kwambogetie abanto aba ase Yorodan? Inee! Nase ogotobeka ase amaboko ’Abakanani, batoite? Nanga mbuya, nonya tware kobeera ng’umbu ya Yorodan nanga nao tomenyete. 8Omonene, inki ndakwane bono, ekero Abaisraeli batamire korwa ase ababisa babo? 9Abakanani na abanto bande bonsi b’ense eye baise koigwa ring’ana eri nigo barache gotoetanana na korusia amarieta aito korwa ase ense, titoinyorwa. Inki rende otagete okore, erinde erieta riao rinene ritogigwe?”
10Omonene agatebia Yoshua, “Imoka, otenene! Nase ki okorara maumama igo? 11Abaisraeli bakorire ebibe. Basaririe okobwatana kwane kw’ogotianania okwo nabachigete ng’a babwate. Barusirie ebinto biragereirie. Baibire, batebire oborimo, babisire ebinto ebio ase egati y’ebiabo. 12Nakio kiagerire Abaisraeli babuirwe nababisa babo. Batamire, ekiagera barabwo abanyene baragererigwe ase ogosirigwa. Inche tinkoba amo nainwe goika mwarusirie korwa asemore ebinto ebi bionsi biragereirie ase ogosarigwa. 13Imoka, ochene abanto! Obatebie bechene na kwebeka ang’e goika ankio, ekiagera inche Omonene, Nyasae bw’Abaisraeli, natebire iga: Inwe Abaisraeli imobwate ase egati yaino ebinto biatananetwe na koragererigwa, timokonyara kobua ababisa baino goika mwarusirie ebinto ebio korwa asemore. 14Ankio mambia goika mwerente aa bosio, egesaku ase egesaku. Abanto b’egesaku keria Omonene aratige obomera bobagwere goika bache bosio, eamate ase eamate Abanto b’eamate eria obomera boragwere bache bosio, enyomba ase enyomba. Abanto b’enyomba eyio Omonene aratige obomera bobagwere goika bache bosio omonto ase omonto. 15Omonto oria oranyorwe obwate ebinto biria biragereirie, goika asambwe nomorero amo nebinto bionsi are nabio, ekiagera osaririe okobwatana kw’ogotianania kwane inche Omonene, naende orentire obosooku obonene ase egati y’Abaisraeli.”
16Rituko ria kabere, mambia chuni, Yoshua akarangeria Abaisraeli bache bosio, egesaku ase egesaku, na obomera bokagwera egesaku kia Yuda. 17Akarangeria egesaku kia Yuda, na obomera bokagwera eamate ya Zera, Akarangeria eamate ya Zera, enyomba ase enyomba, na obomera bokagwera enyomba ya Sabidi. 18Akarangeria enyomba ya Sabidi, omonto oyomo oyomo, na obomera bokagwera Akani, mosinto o Karimi, o Sabidi o Zera bw’egesaku kia Yuda. 19Erio Yoshua agatebia Akani, “Omwana one, mosike Omonene, Nyasae bw’Abaisraeli, oyaorokie erinde ere atogigwe. Ontebie aya gwakorire, toyabisa!”
20Akani akairaneria Yoshua, “Amaene, nakoreire Omonene, Nyasae bw’Abaisraeli, ebibe, na aya nakorire naya: 21Ase ebinto biria biasakoretwe nkarora egetambaa gi’okwambara kiarwete Babeli, ne chifeta chikiro ibere na ekeng’ese, na ebao y’etahabu eisaine ekeng’ese gi’ekiro. Nkaba nokogania kw’ebinto ebio, nkabiira. Mobinyore bibisire gati‐gati y’eema yane, ase amaroba ime, ne chifeta chiria chibekire inse kegima.”
22Erio Yoshua agatoma abanto, nabarabwo bakaminyoka ase eema eria, bakanyora ebinto biria ase amaroba ime, ne chifeta chibekire inse. 23Bakarusia ebinto biria korwa ase eema, bakabiira ase Yoshua na Abaisraeli, bakabibeka ase obosio bw’Omonene. 24Yoshua na Abaisraeli bonsi bakaira Akani, mosinto o Zera, amo ne chifeta chiria, na egetambaa keria gi’okwambara, na ebao eria y’etahabu, goika ebate ekorokwa Akori#7:24 Akori, engencho yaye: emechando. Bakaira na abana baye, abamura na abaiseke, ne chiombe, ne chitigere, ne ching’ondi chiaye, na eema amo nebinto binde bionsi ebi abwate. 25Agwo Yoshua akamotebia, “Naki gwatorenteire emechando iga? Bono naye Omonene okorenteire emechando.” Erio Abaisraeli bonsi bagaaka Akani amagena goika agakwa; bagaaka na baria bande amagena, bakabasamba nomorero.
26Abaisraeli bakaruta amagena igoro y’Akani goika amagena ayio akaba etui eyere aroro goika rero iga. Erio Omonene agatiga ekeririanda kiaye kegakenda. Ase ayio aase aria akarokwa Ebate y’Akori#7:26 Akori, engencho yaye: emechando buna akorokwa nonya ngoika rero iga.
Currently Selected:
YOSHUA 7: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
