AYUBU 5
5
Elifasi ogendererete gokwana
1“Bono rangeria! Inee! Onde nareo oragoitabere?
Ase abwo abachenu, ning’o oraonchokere?
2Ekeene, ogwechanda nigo kogoita omoriri,
na emoko nigo egoita oyo otari omong’aini.
3Nabeire nkorora omonto omoriri okogenderera bokon’gu,
korende mobosokano nkaragereria enka yaye.
4Abana baye tibakonyora ogokonywa,
nigo bakomionogorerwa geita,
gose monto onde tari okobatooria.
5Abanto bare nenchara nabwo bakoria endagera eye omonto oria akogesa,
abwo nigo bakoyerusia nonya egiteire namagwa;
abasaneri nigo bagosanera obotenenku bwaye.
6Obobe tibori korwa ase riroba,
gose emechando teri korwa inse ase riroba,
7korende mwanyabanto nigo akoiborwa ase okonyora emechando,
buna chinsase chi’omorero chigotaroka gochia igoro.”
8“Yare koba ng’a ninche nanga nigo narigia Nyasae,
nere bweka nare gotebia amang’ana aane.
9Nyasae nigo agokora amang’ana amanene atari komanyekana buna are,
boigo namakumia atanyare kobareka.
10Nigo akorua embura yatwa igoro ase ense,
na emegondo yanyora amache.
11Ere nigo akoimokereria abanto abaitongo igoro,
na abwo bachandegete bakorera, nigo akobabeka ase oborendi obuya.
12Nyasae nigo agosaria emeroberio y’abang’ainereria,
erinde emeremo bagokora namaboko abo tegoikerana buna baganetie.
13Ere nigo akobwata abare nobong’aini ase obong’ainereria bwabo,
emeroberio yabo y’ogotega nigo egosirigwa bwango.
14Abanto abwo nigo bakobwatwa nomosunte mobaso gati,
bataba‐taba mobaso gati buna nobotuko bore.
15Korende Nyasae nigo agotooria abataka korwa ase emenwa egoita,
na abaremeire korwa ase abwo bare ne chinguru.
16Ase ayio abaremerwa mbabe nogosemeria,
korende abakori amabe nigo barakirigwe‐kiri.”
17“Nasesenirie omonto oyio Nyasae akoa egesusuro ase okomorongeyia;
ase ayio tobaisa gochaya ogoaka, gw’okorongeyia kw’oyore Omonguru.
18Omonene nigo akorenta amaote, naende oyaboa;
ere nigo agoaka chingoma, naende okoboko kwaye kwagwenia.
19Ere nagotoorie korwa ase emechando etano nomo,
ee, nonya nkorwa ase etano na ebere, na amabe tagokonyora.
20Ekero ki’enchara nagotoorie korwa ase amakweri,
na ekero gi’esegi korwa ase abwo bagoita nemioro.
21Ekero abanto bakogokwana bobe nobiswe,
na ekero amabe agoita arache, toyoboa.
22Ekero ogosiria na enchara birache, aye nobe gokobisekerera,
gose tokwoboa ching’iti chintindi chire ase ense.
23Nonya namagena are mogondo, nobwatane naro,
ne ching’iti chi’orosana nobe nomorembe nachirochio.
24Erio nonyare korora ng’a obomenyo bwao mborendire buya,
na ekero orabe gokorata ase ameri e chitugo chiao,
nonyore ng’a ende tesireti korwao.
25Norore buna abana bao babeire abange,
na ororeria rwao ndobuche robe oronge buna obonyansi bore ase ense.
26Nogende ase embeera kore nobogotu obuya,
buna emesaima y’endagera ekorentwa ekero engaki yabo yaikire.”
27“Naama! Twabeire togokora obotuki ase amang’ana ayio;
naro nay’ekeene.
Ase ayio bono igwa amang’ana ayio,
oyagache ase omoyo oo.”
Currently Selected:
AYUBU 5: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
