AYUBU 32
32
Elihu, mosinto o Barakeli, okoba nendamwamu
1Bono ekiagera Ayubu arenge omonyaboronge ase amaiso aye ere omonyene, abanto baria batato bagatiga komoiraneria. 2Erio Elihu akaba nendamwamu ase Ayubu, ekiagera ekorete omonyakeene kobua Nyasae. Elihu oyio nigo arenge mosinto o Barakeli Omobusi, na oyo bw’eamate ya Ramu. 3Boigo akaba nendamwamu ase abasani baria batato b’Ayubu, ekiagera batanyorete amang’ana bakoiraneria, nonya batebete ng’a Ayubu nomomochi. 4Elihu akaba okoganya baria batato barakwana n’Ayubu, ekiagera ere arenge omoke ase emiaka. 5Na ekero aroche ng’a baria batato tibabwate ing’ana baare koiraneria, akaba nendamwamu.
Ogokwana kwa Elihu
6Elihu oyio, mosinto o Barakeli Omobusi, agateba:
“Inche nigo inde omoke ase emiaka, korende inwe nabakoro more;
ayio naro agerete nkaba nobwoba, ngakira‐kiri,
na tinakwana ay’ebirengererio biane asemore.
7Korende ngateba: Tiga abanto b’amatuko amange bakwane,
abanyamiaka menge borokererie obong’aini.
8Korende omoika nore ime ase mwanyabanto,
omoika oyio bw’Omonguru noro okobaa okomanya.
9Bono tari ng’a nabanto b’emiaka emenge bare abang’aini,
gose tari ng’a nabagotu bamanyete ayare boronge.
10Nigo nkoboria, montegerere,
erinde nkwane ayare ase ebirengererio biane.
11“Naama! Nigo nategererete mono ekero mwarenge gokwana;
nkaba ndemereretie koigwa chinkwana chiaino chi’obong’aini,
ekero mwarenge koriga‐rigia ng’a mang’ana ki mwagwenerete gokwana.
12Ee, nigo nabategererete mono,
korende onde tarenge asemore obuete Ayubu,
gose onde tanyarete koiraneria amang’ana aye.
13Inwe erende mono, timobaisa goteba:
Intwe twanyorire obong’aini.
Nyasae nere orabue Ayubu na amoiyerie, tari mwanyabanto.
14Ayubu takwanete nainche amang’ana ande ay’okweegerera,
na inche tinkomoiraneria buna inwe.
15“Bono batang’ang’ire, tibakonyara kong’iraneria nonya ng’ake;
tibabwati ring’ana bagokwana.
16Inee! Nainche nigo nkogenderera koganya, ekiagera tibari gokwana,
na ekiagera bateneine agwo batari koiraneria?
17Inche ngokwana inde ayane,
erinde ng’orokie ayare ase ebirengererio biane.
18Inche nimbwate amang’ana amange nganetie gokwana,
ekiagera omoika ore ime yane onsukirie.
19Rora, enda yane nigo enga buna edivai ekunekire mono,
buna ebirandi biroisirie korwa ase amasankwa amayia bire ang’e kworeka.
20Goika nkwane, erio nario ndanyore obotoereru;
goika imaanore omonwa nkwane, ing’iranerie.
21Inche tinkonyara gwanchereria monto onde bwensi, gose gokwana
amang’ana ay’okweansia.’
22Inche timanyeti gokwana amang’ana ’okweansia,
inse gokora bo, Omotongi one nigo aransirie bwango.”
Currently Selected:
AYUBU 32: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
